Read Alladian PHILIPIA 1 Bible Online

PHILIPIA 1 - Alladian bible

PHILIPIA 1

¹Kristo Jisuke pakbo annyi, Paul lang Timothi, Philipilo duuna Kristo Jisume míngkesuna, yégebona delokke dikon kídílo,

²Ruutum Jisu Kristo delokke ngoluke Abu Shédí kelok yanggong elang yéponame nolukíng duumín daklangka.

³Ngo Shédíme koyitdung, nolum ngokke kumrum mipílo míípa suyardung.

⁴Noluk takam legape ngokke kumsukolo, ngo agínpe ashépe kumdung,

⁵kapeila atí delokke ila supaklope ngiitom agérem nolu ngom iguldola bedangem lengkan dung.

⁶Delokke dekepe iname nolukíng sim aina agér sim ilenbona Shédí, Kristo Jisuke aadíku yéyin longelo iyin bomang tetengem sim bomgap teteboyé emla ngo berokpe míídung.

⁷Nolum ngokke aapí araso míípang suyardung, ngokke sikepe míínamde noluke legape ngokke mííba suname; kapeila ngo ngiitom tatpona legape pateklo dunggela demangkom ralgela delokke berokbila iduem nolu takam Shédíke yanggong tarongem ngom paabosuto.

⁸Edítko Kristo Jisuke ayang iigalok nolu takamke legape ngo ankídudí Shédí bí hakiipe duusudung.

⁹Delokke si ngokke kumname; noluke ayange aro kénnam lolang eerípe aapí míngkore bojéyape siireppe aido,

¹⁰delomin nolu airuna atíem ullayéne delokke Kristoke longelo deenampe delokke lupe géépenam kamape yéyéne.

¹¹Angun ralnam delokke Shédíme yidgenam legape Jisu Kristo petomke yélen genam aro ségue noluk yénamlo duubomyé.

¹²Bíro kídía, ngom kape itodí de dooying ngiitome goobyaknape ikai, dem nolu kéndope emla ngo míídung.

¹³Delokke ire, roja ekumlokke sontorie[1] delokke abíd kídíe ngokke Kristo kepe pateklo dungge namem berokpe kénbengkai.

¹⁴Ngokke patek duubom sukolok, Ruutumkíng yéna bíro alume pesomape miramyape Shédíke agomem pogong língkai.

¹⁵Sikom arodung; ayokone menam yadnamlok delokke ipééru supe Kristoke legangem poyildung, idakkom ayo konedan aina, aapíem gela pogoodung.

¹⁶Méélamke lubinamsi ngom pateklo menamde ngiitom tatpona legape idung emla kéndola, ayanglok poyil goodung.

¹⁷Kerang kede agí míídulok jonnampe pomape pakla domílo ngokke patek duuduso ngok teyolo ebín motope emla ina kísape mandung.

¹⁸Idakkom de ingkoko iyén? Míngge penam agomde takam bedalo menamlok podokom, arolok podokom Kristoke legangem pogoodung. Delokke dem ngo ashépe míídung. Aropakpe, ngo ashéshedan teteyé,

¹⁹kapeila ngo kéndung noluke kénnamlok delokke Jisu Kristoke Aid igullok kape itodí de ngom mosing yéku.[2]

²⁰Ngo eraprupe mííbomdung delokke míínam sudung, de ngok annying peko bedang kamang idakla miramruyé, delo sidokom delokke turdokom supakkom delokke agínpe Kristome ngok amílso bottepe yidsunayé.

²¹Ngokke pedan turnamde Kristoke delokke sinamde gérname.

²²Ngo amíllok turla duudan tetepe míídumílo, ngo sok are kanarung agérem inaladung. Depe idola ngo ingkuem ulpene? Ngo kénsumang!

²³Ngom annyiso hopan sudung. Ngo turnam sim mepak sugeyéla delokke Kristokíng yélídung, de takamlokke aiyalumdung;

²⁴idakla nolukepe ngo amílpe turla duunamde mííyaru nampe idung.

²⁵Sok legalok luyém, ngo duupope aido emla míídung, delokke ngo noluke unnoti penam legape delokke míngkelo ashéla yédope ngo nolum yébo teteng supoyé,

²⁶delo ngokke nolukíng lekoda dungku kolok Kristo Jisukíng noluke ashénge ngok turku kolok bíísétyé.

²⁷Depe epe ipekom nolu agísue Kristoke ngiitomem are kadope yélangka. Demílomin, ngokke aala nolum kaayém demangkom ngo duumape tatpít petompe idokom ngiitom lokke míngkengem lepong atellok midum atel kísape ikísula, aid atellok edíípe nolu yédope ngo kényéne.

²⁸Noluke miruem pesomapeka; agínpe miram langka, delokke delo bulu moramyé delokke nolu ikumyé emla bulu ansu míísuyé, kapeila Shédímin nolum ikum bonade.

²⁹Kapeila Kristome kumsudope nolum pongkogem bitung, bím arue emla míngke sunam petommang, idakkom bíkke legape adír gedo peteng bitung.

³⁰Supak nolu ngom mimaklo idum sulado. Sikena mimagem kerapekom nolu ngom idope kaato, delokke nolu tatsudung, supakkom imín sutínade ngomino.