Read Alladian PHILIPIA 4 Bible Online

PHILIPIA 4 - Alladian bible

PHILIPIA 4

¹Demílo ngokke bíro kídía, edítko nolu ngokke ayanampe idune delokke edítko ngo nolum mííyum sukan! Demílo, ngokke bíro kídía, deddíko noluke yénamem Ruutum kíng nolu edíípe duuyé.

²Eudia delokke Santuki, ngo nonyim rogula podung, Ruutumkelo jonbosula leko bosulangka.

³Delokke míngkesuna ngokke agér gérbo sunam nonyimkom, sim mimekídí sim igulyépe emla rogudung, kapeila dooying ngiitomem pogongkolo, bulu ardarupe ngom gérbosuto, buluke lekope Klementlang ngokke agér gérpé abíd kídíe, buluke amíne turna kitablo dungkai.

⁴Ruutumkelo írgape ashéng langka. Ngo lekoda podung: Ashélangka!

⁵Noluke remel aapíem takamem kénmo langka. Ruutum bí aadak kubong.

⁶Kape imíloi emla mínga sumapeka, idakla noluke kumnam takamlo nolu ingkuem míídudí, dem Shédíkíng rogu langka, agínpe bím yidgenam aapílok kolangka.

⁷Delo tanike kénpíímanam, Shédíke míípo yéponame, Kristokelo noluke aapí ainangem kaabomyé.

⁸Luyinnape, bírokídía, ingkuedí arodune, ingkuedí milo arodune, ingkuedí jiidune, ingkuedí deedune, ingkuedí kampodune, ingkuedí míngge badune, akone aikereng yalumnako demangkom erkí banamko kadumílo dekena atí kídarem mííta bomlangka.

⁹Ingkuem nolu ngokkelok kéntodí demangkom paatodí demangkom tattodí, demangkom kaatodí dem agérlo igelangka. Delo yépobona Shédí bí nolukíng duumínyé.

¹⁰Méélam yalumpe nolu ngom anípe ankíem kílendungku, depeila ngo Ruutum kíng ashérunge idung. Aropakpe, nolu ngom ankí dungai idakla nolu dem lengkandí kamato.

¹¹Ngo pííramdung emla sim agom sim pomang, kapeila ai-asang takamlo kape kísa míírísula duupe aidodí dem kénto.

¹²Ingkuedí pííramlo doodune, dem kénsudung, delokke ingkuedí pííram mane demkom kénsudung. Takam ai asanglo kiidarla yédokom, kenola yédokom, alummape yédokom, pííram séémola yédokom, kape ashépe míírísula yékandodí sim arang atí sim ngo kénto.

¹³Ngom ralmona bíkkelok ngo takamem ilasudung.

¹⁴Idola ngokke aréé tarongem kaabo sunamde nolukepe ainame.

¹⁵Delok teyolo nolu Philipia kídíe berokpe kénsudung, ngokke Ngiitom tatponem kerangoo pekai pogongkape emla Makedonialok gílendak delo, mondoli kídí lokke nolu petommin ngom igulnade; nolu petommin ngokke paanam paamang tarongem paabo sunade.

¹⁶Legade, ngokke Thesalonikalo duuduemte ngokke pííramduem nolumin ngom igulem metí líknade.

¹⁷De ngokke aman mata kolokmang, idakkom noluke isaplo laab paadokupe inamdem ngo kaalídung.

¹⁸Ngo apíípe paape namem paato delokke dem bojé yapete paato. Supak noluke Epaphroditkíng melíknam ngokke paatonam aman si ngokkepe lumsamang. Dekede nampona aman, torík subanam bimande, Shédíme mííyum sumodung.

¹⁹Delokrongem ngokke Shédí bí Kristoke angun ralnam miremlok noluke pííram séémo takamem kaabiyé.

²⁰Ngoluke Shédí delokke Abukíng angun ralname agínpe duudaklangka. Amen.

²¹Kristo Jisukíng míngkesuna takame salamem bidung. Ngokkíng duubosuna bíro kídíe nolum salam bidung.

²²Míngkesuna takame nolum salamem bidung, apekrupe Rojalokke ekum rarung kídíe salamem bidung.

²³Ruutum Jisu Kristoke yanggonge noluke aidlo yémín daklangka. Amen.