Read Alladian KOLOSIA 1 Bible Online

KOLOSIA 1 - Alladian bible

KOLOSIA 1

¹Shédíke mínggílok, Kristo Jisukelo Tomlíknam Paul ngolang ngoluke bíro Timothi,

²Kristokelo deena delokke Kristokíng míngkesuna[1] Kolosialo duuna bíro kídílo salame. Yanggong elang deena delokke ngoluk Abu Shédí[2] kelok yéponame nolukíng duumín daklangka.

³Ngoluke noluk legape kumdungem ngoluke Ruutum Jisu Kristoke Abu Shédíme koyitdung,

⁴kapeila ngolu noluke Kristokíng míngkengem delokke Shédíke ami kídíem ayanamem kéndung.

⁵Edílo aro agome, aro ngiitome, kera yalumpe nolukelo píítodí, delo míínam subomnam legangem nolu tatto. Depe iname, nolukepe teyotelo mesiibinam, noluke míngkeng delokke ayangde noluke míínam subom namlo dung.

⁶Shédíke yanggong aro takamem tatkénla noluke tattí tatgo longe delokke ilangala tani among rego mipílo ngiitome ayém lenmodung delokke bojépe gooyang gooyang imodung.

⁷Nolu sim, ngoluke ayanam yétíng, ngolukepe[3] Kristokíng míngke sunape agér gérbona, Epaphras kelok kénto.

⁸Bí ngolum Aidlok nolum binam ayanam legang emkom poboto.

⁹Sok legalok, longeko noluk legangem tatdo delokke ila, nolukepe agínpe ngolu kumtí bidung. Aidke binam tatkén kangkén nana kénnamem, bíkke míídulok kénnamem nolum bíísét modope emla Shédíkíng kodung.

¹⁰Demílo nolu Ruutumke míínampe duuyé delokke agínpe bím ashémona agérem iyé. Noluke yénamlo aina agérem ila, delokke nolu Shédíke kénnamlo siisayé.

¹¹Nolu takam pauarlok, depe emnamde nolu jémduk gela edíírupe donggap dola, ashéla

¹²teyong angun yétem Shédíke amikídílo tarong binamem nolum[4] arope sanna Shédíme yidge langka.

¹³Kapeila bí ngolum kaamo yétalokke mopí tungku, delokke bíkke ayanam Ooke yétalo ngolum langaang líktungku.

¹⁴Bíkkíng ngolu dorpít sunam emlang[5] delokke imemem maab bikunamem paadung.

¹⁵Bímino kaapa manam Shédíme kaapa sudope gesune; pínam takamlokke obínge.

¹⁶Legade bíkke lokmin takam atíem pítone; taleng emkom delokke among sokkemkom, kaapang namemkom, kaapa manam emkom, roja umké dokom, pauar dokom, yégebona dokom, ruutum ilanana dokom; takam atí siriem bíkke lokmin delokke bíkkímin pítone.

¹⁷Bí takamlokke kerange, delokke bíkke gooralo takam atíe duuyindung.

¹⁸Delokke bímin mondoli tabunglokke dumponge; takamem ruutum bomdope bí kerang delokke sina kídí lokke obíng yalume, atí tabungem bí obíyangkai.

¹⁹Kapeila Shédí bí bíkkíng takame duuyin líknamdem aipe míídung,

²⁰delokke Ookelok amo talengso dungkína atí takamem agílo laadum sutungku, depe emnamde bí krosslo yilíng bídgela amongem yépo motungku.

²¹Longeko nolu Shédí kelokke angutuai delokke noluke atímana ségu sianglok noluke aapílo mirupe duutuai.

²²Idakkom supak lukeng ikeng delokke géépe lupenam kayimape bíkke kangkolo deenampe lengkan dokupe Kristoke agí amíl sigenamlok bí nolum gakrík sutungku.

²³Depe idola, nolu berokpe edíípe míngke suyarpe aido delokke míngkeng appírem pírgappe aido, delokke noluke míínam subom namem elumope aimang. Simin Paul ngokke béérape yébom sudope tani gíídaso daadi takamlo pogong bomnam noluke tatnam ngiitome.

²⁴Ngo noluke legape aréénam sim ashépe míídung, delokke Kristoke legape, mondoli legape ingkuem aré réngge penamem pííram tuadí dem ngokke adínso arééyém rééyin sulíkto.

²⁵Ngom noluke ainam legape sim idope bina Shédí kelok ngom mondoli lokke béérang konpe metung. De agérde ngiitomem apíípe pogoodope inamko.

²⁶De siirum siirum lokke yéruk dakruk ami kídí lokke kénpí mangadanam idakla supak bíkke ami kídílo lengkan binam Shédíke agome.

²⁷Bulukelok Shédí bí kénpí manam angun ralnam miremem mipak kídílo kéndope bulum ullento.

²⁸Depe iname ngo Kristome mipillo pogoodung. Ngolu mipilem Kristokelo milo aro dokupe emla mipilem kénnamlok poyildung delokke lurat poratdung.

²⁹Sim iyindope emla ngokkíng agér gérna Kristoke tolnam ralnam binamlok ngo ankíe sikí ingéé subidung.