Read Alladian KOLOSIA 2 Bible Online

KOLOSIA 2 - Alladian bible

KOLOSIA 2

¹Ngo edítko nolukepe delokke Laodikialo duuna legape, delokke ngok ríksu kímanam takam legape ngo ebínpe ibom sududí dem nolum kénmo tuamang emla míídung.

²Ngokke míínamde buluke aange erappe aido delokke ayanglok atel bosupe aido. Demílomin buluke míípe míngor aapíe miremyéne. Depe ikolok Shédíke kénpímanam, depe emnamde Kristo agíme[6] kényéne.

³Bíkkíng ngunkí manam takam gyan kumsung elang kénnam ekurange dung.

⁴Ngokke sim pobom sunamde idung ayokone tatpo kaapo pétkum geyéla nolum yatpelo emla podung.

⁵Kapeila ngo agí amíle nolukelo duuma dokom, aide nolukíng dung delokke nolu kampope yédudí delokke noluke Kristokíng míngkenge edítko edíídudí dem ngo tatlíng kaalídung.

⁶Demílo, supak nolu Kristome ruutumpe torík sutonade, bíkkíng yéyar langka,

⁷bíkkíng appírem pírgap langka, bíkkíng noluke yénamem siisa langka, delokke noluke míngkenge edííyalangka. Delokrongem yidnamem erab bomlangka.

⁸Kristokíng leríngem ríímape, tani amosokke yédu dakbyang ayon isaplok míírí sunam agí kamana kénnam agomlok yatnyok kupenamem kaasutoka,

⁹Kapeila Kristo kíng teyongke akor, adung am takame duuyin sudung.

¹⁰Takam ralnam kelang yége daggenake dumpoope ina Kristo kelok nolum apíípe bitung.

¹¹Bíkkíng nolu paab séguem[7] tulu sugeyéla, tani alaglok adínlo iyod sumape, idakla Kristoke igenam iyodem imín gelangka.

¹²Legade edílo nolu baptis laasutodí, delo nolum Kristokíng yutak sutuadí, delokke baptis idodelo bím sinam lokke kiirep kuna Shédíke pauarlo míngke sukolok nolumkom Kristokelo lekope kiirep toku.

¹³Nolu aidlok luyém longeko sila duutuai kapeila nolu paab[8] ito delokke Ayon kamana mipakpe yétuai. Idakkom Shédí bí supak nolum[9] Kristo kelok turkolo langaa tungku; Shédí bí ngolu takamke paabem ayang bitoku.

¹⁴Ngolum mirolpe ila delokke akla atdung attok bomnam ayonem bí mepaktoku; bí dem lenggé geyéla krosslo pítnyok líkto.

¹⁵Delokrongem delo kross delo Kristo bí aid ruutum pauar delokke ruutum ila monam kídí lokke agísuem mopít sutoku;[10] bí ikumna maklíng yonkolo yon ge bolangkula takam amie kaaman dokupe ibotoku.

¹⁶Delok legape, noluke donam tíínam demangkom gíídí sipe demangkom poolo karsing adeng ape demangkom Sabbath gíídí peelok séko meteng noluke teyolo ayon ilík momapeka.

¹⁷Si atí takam si méélam angkupena telokke abír ayue; aropakpe de Kristomino.

¹⁸Menamlok lebíng koníla teyong kotokiem kumtísula apekrupe inakídíem noluke amanem inyok kosu mapeka. sikena amide bí ingkuem kaatodí delo eeríyape míídung delokke bíkke adín aapíe bím are kamana míídulo ngasa modung.

¹⁹Bí amíllokke dumpoope ina, Kristome gaggap namem mepakdung. Kristoke gooralo takam amíl si siisala sokke tuprík sukolok delokke amíl taronglok hodum sudung, delo Shédíke míngkampe si parla siidung.

²⁰Nolu Kristokelo lekope sito delokke tani gíídaso duuna uyu gooralokke lenpek sutoku. Demílo kapeila nolu supaklope tani amosokke yénam kísape yédune? Sikena ayonem kapeila nolu igedune.

²¹“Sim ukkí mapeka”, “Dem dokímapeka”, “Dem dan inak mapeka” emnam ayonem kapeila bomdu dadane?

²²De takam atí kídíde, kerape agér katuai, supak agér kayimape ina, tani míísotlok polík ilík sunam ayone delokke luyile.

²³Sikena ayon kídísi kaaname arope kumnam joonamlok kénnarung kísape lengkan sudo delokke agísuem menamlok ansoope mesudo, delokke bulu agí amílem tosing sumape yédo, idakkom bulu atímana agérlokke amílem mosing sulamang.