Read Alladian KOLOSIA 3 Bible Online

KOLOSIA 3 - Alladian bible

KOLOSIA 3

¹Kristokíng lekope nolum kiirep tokumílo, demílo, noluke aange Shédíke lakbík umkélo duuna Kristoke dungko, teyong legangem mííbom sulangka.

²Noluke aapíe amosokkem megeyéla, teyong among lokke atíem mata langka.

³Kapeila nolu sito, delokke turnamde Kristo kílang Shédíkelo duulíkdung.

⁴Edílo noluke[11] turnam agíe, depe emnamde Kristo bí, lenyékudí, delo nolukom bíkkelo lekope angun ralnampe lenbo suyéku

⁵Delok legape, noluke tani amo sokke séguem menyok sutoka; de atí kídíde mime milo belumna agér, deemang aamo, mime milo kaabo tatbo, míísi míngo delokke kaabo tatbo, dekede uyu kumsunam kísane.

⁶Sok teyolo Shédíke aklínge píídak.[12]

⁷Sikesok gooralo duudungem, sok ledulok nolukom longeko yétuai.

⁸Idakkom supak nolu agíe sikena atíkídí sim berokpe mepakpe aidung; de idung, marlíng aklíng, ukmín lumín, míngki míngat, lungil lusong, delokke noluke nabbéllok belum bekamna agom lennam.

⁹Noluke yékor dagorlok noluke aku aapíem mepak surongkuem akone akonem yatmín sumapeka.

¹⁰Delokke pílenna bíkkíng gesudope kénnamlok míímo sukunam aní aangem nolu geto kubong.

¹¹Grik demangkom Judai ami, dínbíng iyod sunekom, sumanekom, simon sili kísa yédung adana ami dakkom, abílyang demangkom ruutumyang kamang, idakkom Kristomin takamde, delokke takam lokke ruutum yalume.

¹²Nolu Shédíke amie; bí nolum ayatung delokke nolum bí agíkepe ullen sutung. Demílo berokpe nolu aapílo ayang míípa sunam, ayang igul, remaknam remelnam delokke jémge namem duumope aido.

¹³Akone akonem jonbosula, lupe namko katuakom dem Ruutum kape nolum maab todí dekepe nolukom akone akonem maab bosulangka.

¹⁴Delok takam teyolo ayangem líktem langka, demin bulum takam aro atel bosunamlo gakdum suboyéne.

¹⁵Kristoke yéponamem noluke aapíem ruutum bommo langka. Kapeila nolum yépoko amíl atellok olepe idopemin tomtung kune. Dem yidge langka.

¹⁶Kristoke ngiitomem edíírupe noluke aanglo duumorupe aido. Míngkeng miriem, kumnam joonam delokke deena miriem lubo sulangka; Shédíkelo noluk aanglo yidgenam miriem lubo sulangka.

¹⁷Delokke ingkona atíem nolu idudí, agom dokom, agér dokom, Abu Shédíme Kristo kelok yidge dakla Ruutum Jisuke amínlok takamem polang ilangka.

¹⁸Méng kídía, Ruutumke mííbape agí milolo gyabbo sulangka.

¹⁹Milokídía, noluke méng kídíem ayalangka delokke bulum buumo mapeka.

²⁰Ome oo kídía, noluke ane abuem atí takamlo beleng gelangka, kapeila de Ruutum kepe ainame.

²¹Abukídía, noluke ome-oo kídíem martí bommapeka, bulu míímé supelo.

²²Pakbo kídía, noluke tani amosokke ruutum kídíem takamlo beleng gelangka; delokke dem buluke nolum kangko petomlo delokke kaabayépe emla imape idakkom Ruutum kepe aange jégapla delokke peso gedola ibolangka.

²³Nolu ingko agérem idudí, noluke aange apíípe míídola, tani kepe imape Ruutum kepe ibinam kísape, ilangka.

²⁴Kénsu langka, Ruutum bí agíke amikídíem mebinam amanem nolumkom biyé. Kapeila Kristomin noluke kumbomnam aropak ruutumde.

²⁵Imemna bí bíkke imem ajéngem paasuyéku delokke delo kaaba mííbayanam kamang.