Read Alladian 1 THESALONIKA 2 Bible Online

1 THESALONIKA 2 - Alladian bible

1 THESALONIKA 2

¹Bíro kídía, ngoluke nolum kangang namde asammang, dem nolu kénsudung.

²Nolu kéndung, ngolu kerape Philipilo adíre ito delokke ngolum lupu luyééla ito, idakkom ngoluk Shédíke igulkolok deddíko akna gooralote ngolu ngiitomem nolum mínge sumape pobito.

³Kapeila ngoluke rogude menamlok demangkom deemana míídulok imang, demangkom ngolu yatpe emla imang.

⁴Dempenem, ngolu Shédíke ngiitomlo gyaplíkna amipe idolamin podungane. Ngolu taniem mííbayépe emla imang idakkom ngoluke aangem ikaana Shédí memin mííbayépe emla idune.

⁵Nolu kéndung, ngolu edílote koyit luyit imang, demangkom ngoluke ato anyo kaabo aapíem polumsupe imang. Shédí bí ngoluke hakiipe duusudung.

⁶Tani yidnamem ngolu mamang, nolu kelok dokom demangkom akon kelok dokom yidnamem matamang.

⁷Kristoke tomlíknam amipe yéname ngolu nolum tebeg mopeníai, idola ojingem ane usaanam kísape, ngolu noluke gooralo asoope yéto.

⁸Ngolu deddíko nolum ayaname, Shédíke ngiitom petommang idakla ngoluke turnam yénam tarong emkom nolum orsupe emla ngolu essaarupe mííto, kapeila nolu ngolukepe ayaru nampe yéto.

⁹Bírokídía, berokrupe nolu ngoluke ankípe ingéé sunamem delokke ebínpe ibom sunamem kénsudupe, ngolu nolukíng Shédíke ngiitomem pobo dungem, séko meteng tebegem míídír sumo límang emla longe yohpe ngolu agérem isuto.

¹⁰Edítko noluke arope míngkesuna gooralo ngo deenampe yéjiila delokke imem kamape yétudí nolu hakiisupe isudung, delokke Shédíte dem kéndung.

¹¹Legade ngolu nolum mipilem abue agí ome-ookídíem kape idudí dekepe ibosuto dem nolu kénsudung.

¹²Ngolu nolum ermoto, ngolu nolum ngiito, delokke agí yétemlang angun ralnamem tarong paabo sudope nolum tomlenna, Shédíme mííbadope ipena turnamlo yélangka emla ngolu nolum poyil ayardung.

¹³Delokrongem ngolukom Shédíme yidge ayardung kapeila, ngolukelok tattonam Shédíke agomem noluke paaduem, nolu dem tani agompe laarík sumape, idakla si aropak nolukíng arope míngkesuna kídílo agér gérna Shédíke agomem arorupe toríksuto.

¹⁴Noluke legape, bíro kídíe Judialo Kristokíng duuna Shédíke mondoliem kangge sunape ikai. Nolu kape noluke agí doolung amikídílok adírem paatodí deke pakpe mondoli kídí dekom Judai ami kídílok adírem paato.

¹⁵Bulumin Ruutum Jisume, delokke kaaluna miri kídíem petne delokke ngolumte monpak kune. Bulu Shédíme iyakdung delokke ami takamem mirolpe idung.

¹⁶Bulum turpekolo langaang pena ngiitomem Mipak gooralo pogoo penamem bulumin ngolum itumpe emla itíne. Sikepe bulu agínpe buluke paab egedem apompe gekum sudung. Méélam yalumpe Shédíke marlínge buluke teyolo angkai.[3]

¹⁷Ngolu kepedan, bíro kídía, edílo ngolum anyongko nolu kelokke langu sutokudí (ngoluke mííduem emmape, idakla migí petomem langusuto kudí) depe ikolok edítko nolum ngolu menyok suton delokke edítko nolum lekoda kaarík sudokumílo emla ngolu raltítone!

¹⁸Legade ngolu nolukíng aalíng tokuai apekrupe, Paul ngo agíe dem raltítuai idakkom Soitane ngolum ikumto.

¹⁹Kapeila, Ruutum Jisuke aadokulo bík keralo ngoluk míínam sunam, ashéng demangkom erbom bomkeng ngoluke angun dumblube ingkueda? De nolu manía?

²⁰Arode nolumin ngoluke angun elang ashénge.