Read Alladian 1 THESALONIKA 4 Bible Online

1 THESALONIKA 4 - Alladian bible

1 THESALONIKA 4

¹Luyinnape, bíro kídía, nolu supakke yénam kísape, Shédíke mííbape yépenamem nolum poyilto. Ngolu supak nolum Ruutum Jisukelo dekepe yéyar tetepe aido emla rogudung delokke pogap líkdung.

²Ruutum Jisuke ralgenam ralnamlok ngolu ingkona poyilem nolum bitodí dem nolu kénsudung.

³Si Shédíke mííname, nolu deenampe yépe aido; nolu abír ajon ibo sunamem mepak langka;

⁴nolu mipile deenamlokke míngge banam bedanglok yédope agí amílem[5] mosing sunamem kénpe aido.

⁵Shédíme kénmana Mipak ami inam kísape mime milo kaabo tatbo mínsula yémapeka,

⁶delokke sikena atílo sékoteng agíke Kristan repe sinyingem imembosu mapeka demangkom ipusilumpe emla erbom mapeka. Ngolu kerapekai nolum luto subinam kísape, sikena paab kídí takam legape Ruutum bí taniem ingéé yéku.

⁷Kapeila Shédí bí ngolum deemang yépe emla tommang, idakkom deenampe yéyépe emlamin tomtune.

⁸Delok legape, séko sim ngiitom sim tatmadudí bí taniem emmape idola nolum Deena Aid bina Shédí memin lupak sudune.

⁹Supak bíro kumsu ayang kísana legangem ngolu nolum atkan penam kamangai, kapeila Shédí bí nolum agíe akone akonem ayang bosulangka emla ngiitomtung.

¹⁰Delokrongem aropakpe, Makedonia tabung lokke bíro kídíem nolu ayadung. Depe iduakom, bírokídía, dem pakyape ibosuyépe emla ngolu nolum pogapdung.

¹¹Ngoluke lubinam kísape yépope yéla, noluke agí agérem ila delokke nolu agí alaglok isupe emla mííbom sulangka;

¹²demílomin noluke loodípe yékorlok angu amikídíem langaang yéne delokke nolu sékokíteng míída sumayéne.

¹³Bíro kídía míínam subomnam kamana, moomem ami kídílokke ankí kísape imadope, sikaana kídílokke aro legangem nolum ngo kénmo mape menge límang emla míídung.

¹⁴Jisu bí sipala gerep kaku emla ngolu kéndung, delok kísape Jisukíng simin gena kídíemkom Shédí bí bíkkíng langaa yéku emla ngolu arope míídung.

¹⁵Ruutumke pobinampe ngolu nolum podung ngolu turdung adana kídísi, Ruutumke píídíkuem sina kídíem berokpe kerang yamayé.

¹⁶Kapeila Ruutum bí agíe teyong kotoki ruutumlo lekope, Shédíke tomnana bikul tapungem bomlangala, teyong telok tokyéku delo Kristokíng sina kídíe kera yalumpe, darepyéku.

¹⁷Delokke méélampe, ngolu turdung adana delokke méélamna kídíem taleng telo Ruutumme kaarík dokupe doomuglok yétsang bomyéku. Delokke dekepe ngolu Ruutumkíng duuyar bosuyéku.

¹⁸Delok legape mipilem sok agom kídísok edíí ludíng bosulangka.