Read Alladian 1 THESALONIKA 5 Bible Online

1 THESALONIKA 5 - Alladian bible

1 THESALONIKA 5

¹Bíro kídía, supak aadíku legangem ngolu atpenam kamang,

²kapeila nolu berokpe kénsudung. Ruutumke aadíku longede kaamolo doppyona kísape aayéku.

³Tani kídíe “Yépodung delokke nyokmayé” emngesula duudungem oogena mime lokke okii kinam kísape, menang asak buluke teyolo nyokdíe pííyé, delokke bulu duksi gepeko kamayé.

⁴Idakkom bírokídí nolu kaamolo duumang depeila de longede doppyona kísape nolum malom aabommayé.

⁵Nolu angun lokke ookídíe delokke longelokke ookídíe. Ngolu kaamo lokkemang demangkom ruruk lokkemang.

⁶Demílo ngolu angu ami kísape iptíla dungesupe aimang, idola ngolu beréé laju delokke agíem mosing sulaju.

⁷Kapeila ipngesuna kídíde, yoh lomin ipnge sudune, delokke tíngírsuna kídíde yoh emmin tíngír sudune.

⁸Idakkom ngolu longe kepe inasi agíem mosing sulaju, míngkeng emlang ayangem nambípe, delokke turkunamlo míínam sunamsim luprope gelaju.

⁹Legade Shédí bí bíkke marlínglo ngolum anngéé suyépe emla melíkmang idakkom ngoluke Ruutum Jisu Kristo kelok turnamem paayékupe emlamin melíktone.

¹⁰Ngolu sidokom, turdokom bíkkíng yébo sudokupe emla bí ngolu kepe sibito.

¹¹Delok legape akone akonem luír bosu langka delokke noluke idunam kísape mipil miyonge írsaa bosulangka.

¹²Bírokídía, noluke aralo agér gérna kídíem, nolum Ruutumkíng yébona kídíem delokke nolum ngiitomna kídíem nolu aipe míngge langka emla ngolu nolum rogudung.

¹³Buluke agér ikolok bulum ayanglok bottepe mínggetoka. Mipile aipe duubo sulangka.

¹⁴Bíro kídía, nolum ngolu pogap líkdung, lubeng pobeng langka, pesonem edíí botoka, ralmanem igultoka, mipilem jémgap bosulangka.

¹⁵Sékoteng imemne imem edo raku madope ralgap langka, idakkom agínpe mipil miyongem delokke akonem remaklok ibosupe emla míílangka.

¹⁶Agínpe ashélangka;

¹⁷Kumyar langka;

¹⁸Takam ai-asanglo yidge ayar langka, kapeila de Kristo Jisukíng nolukepe Shédíke mííbiname.

¹⁹Deena Aid emem imit mapeka;

²⁰polu poor namem tatkipe tatmapeka.

²¹Atí takamem ankí supolangka. Ainem bomgap langka.

²²Atímana mipíem mepaktoka.

²³Yépomona Shédí bí agíe nolum deeyar tete molangka. Noluke tabung aapíe, aide delokke amíle ngoluke Ruutum Jisu Kristoke píídíku longe lope imem kamape duudak langka.

²⁴Ngolum tomna bí aronako delokke bí dem iyé.

²⁵Bírokídía, ngolumte kumbi langka,

²⁶Bírokídí takamem aipe kaarík lurík bosulangka.

²⁷Ngo Ruutumke keralo nolum lukandung, nolu sim sithi sim bírokídí takam tatkolo poribope aido.

²⁸Ngoluke Ruutum Jisu Kristoke yanggonge nolukelo duudak langka.