Read Alladian JOSHUA 1 Bible Online

JOSHUA 1 - Alladian bible

JOSHUA 1

¹RUUTUM me agér ibina Mosike sirongem, Mosime igulna Nun ke oo Joshuame RUUTUMbí poto,

²“Ngom agér ibina Mosi bí sikai. Depeila supak, Israel kídí bulum ngokke bisupenam asi-among elo, Jordan korongem koola gídope, nolang ami kídí takame irung sulangka.

³Ngokke Mosi ke keralo togesunam tuubupe, noluke ale tuangko moolop takam dem ngo nolum bito.

⁴Noluke among sime, sokko danke yépol mooruk lokke ila, línggíng danke Lebanon dííte loope, delokke sanggo danke korong roone Euphrates lok ila, Hittit ami kídíke asi among tabung emte ibom langaala anggo danke Among Raadang Siyéng loope iríyé.

⁵Joshua nokke turdu tetedem, sékokom nome ikummayé. Mosi kelo ngo kape kísa yémín getodí, delok kísa nokkíng ngo duumín geyé. Nom ngo edílokom mepak sumayé, delokke nokkíng agínpe ngo yéyar mínyé.

⁶Aapíe edíípe mínggapla miramlangka. Kapeila buluke buku-nekuem, ngokke bisuyé emla togesunam asi-among delo, bulu yébom dokupe no bulum gíboyé.

⁷Aapíe edíírupe mínggapla míídíí sulangka. Ngok agér ibina Mosike nolum binam ayon kídí tabungem, berokpe igelangka. Noluke gítíng-yétíng takamlo, ai-kamporudope ayon kídí delokke lakbík pelang lakképe pele-pelkurla imapeka.

⁸Noluke kumsuko takamlo, ayon kitap sime pori ayardope mínggap gelangka. Sime longe yohpe pori ayarlangka, delokke ayon kitap so atnam takamem atel koteng mepakmape, iyar gedope mínggap gelangka. Depe imílo noluke gítí-yétínglo, nolu ai-kampola arda bosuyé.

⁹Aapíe edíírupe mínggapla míídíí sulangka emla ngokke lulík namem míípa sulangka. No ingkolo yégoyédí, deke takamlo RUUTUM nokke Shédí ngo, nokkíng yémín gedung, depeila no aapíe amé mapeka delokke pesomapeka.”

¹⁰Delo Joshua bí, RUUTUM kídíem notko miyonglo gígomola, sikepe pogomoto.

¹¹“RUUTUM noluke Shédíke nolum asi-among binamem nolu dungabomdope, longum araso nolu Jordan korongem kooyé. Depe ila nolu donam-tíínam irusulangka.”

¹²Joshua bí, Reuben opín emlang, Gad opínem delokke Manasseh ke opín arot konem poto,

¹³“Jordan korong sanggodan sokke, asi-amongem noluke yébom penampe, RUUTUM noluke Shédíbí biyé emnamem, RUUTUM me agér ibina, Mosike nolum popa binamem nolu míípa sulangka.

¹⁴Iname, so among so noluke mime, ome-oo kídíe lang, simon sili kídíe duuyé. Idola Shédíke abíd Israel kídíem, asi-among binam elo bulu dungabomma tetengem, mimak lemo gena noluke sipaying kídíe, Jordan korongem koobo sula, anggodan elo abíd Israel kídíem, igul kolo enmín geyé.

¹⁵Edílo RUUTUM noluke Shédíbí, Israel opín-buang takamem, ai-kamporupe asi-among binam elo duuyin moyédí, delo nolu RUUTUM me agér ibina Mosike nolum tolík binam, Jordan korongke sanggodan asi-among so aalat sulang kula, siidum dengepe duulangkuka.”

¹⁶Bulu Joshuame poyansuto, “Ngolu nokke pokampe ato-siro takamem iyé. Nokke lulíkko rego takamlo ngolu gíyé.

¹⁷Ngolu Mosike agom-aangem kape kísa tattodí, delok kísape nokke agom-aangemte tatyé. Mosike teyolo kape kísa RUUTUM nokke Shédíbí katodí, deke kísape nokkíng bí yéyar míndak langka.

¹⁸Nokke ruutum yétaem séko bulu mirupe iyédí, demangkom nok lulíknam agomem tatmayédí, deme petpakpe aido. Aapíe edíírupe mínggapla míídíí sulangka.”