Read Alladian JOSHUA 10 Bible Online

JOSHUA 10 - Alladian bible

JOSHUA 10

¹Jeriko doolung emla delokke rojem kape kísa Joshuabí itodí, deke akampe Ai doolung emla delokke rojem, Joshuake nyokkut monamem Jirusalem lokke roja Adonijedek bí tatto. Sok teyolo Gibeon ami kídíe, Israel kídílo bonying ibosula, Israel gooralo yébosukai emnam emte tatpaato.

²Sikena legí-sigangem tatla, Jirusalemlok ami kídarde yagorupe lomkai. Kapeila Gibeon doolungde roja dobom supeko, doolung lunekuai, delokke Ai doolung empemílo botteyanakuai. Delok teyolo doolung delokke ami kídíde midu-mimaklo amín kanekíai.

³Depeila Jirusalem lokke roja Adonijedek bí, Hibron lokke roja Hoham, Jarmuth lokke roja Piram, Lakhish lokke roja Japhia, delokke Eglon lokke roja Debir bulum kotoki melíkla,

⁴“Gibeon doolungem mimak idope, nolu aala ngome igultoika; kapeila Gibeon ami kídíe Joshua kílang Israel kídílo bonying ibosukai,” emla rogugooto.

⁵Dem rogugoonam dem tatbila, Hibron lokke, Jarmuth lokke, Lakhish lokke lang Eglon lokke, roja kídíde Jirusalem lokke rojadem lekobosula, bulu Amorit roja pilngode buluke maglíng kídíem gíbola, Gibeon dem mimak iyabomto.

⁶Delo Gibeon ami kídíde, Joshuake Gilgallo notko ila duuduem, “Ngolume adi amonglok Amorit roja kídíe mimak iyabomdung, nolu menape aala ngolum mepaksumape igultoika,” emla Joshua kíng rogu aato.

⁷Dem tatla Joshuabí, mimak ijiina kídíem laala, bíkke maglíng takamem gíbola Gilgallok gílenboto.

⁸RUUTUM bí Joshuame poto, “Bulume atí pesomapeka. Bulu sékote nok keralo dakka sulamayé, kapeila nok alag aralo ngo bulume rulígto.”

⁹Gilgallok yoh rubungem enla, Joshua bulume mamam sudupe mimak iyabomto.

¹⁰Gibeonlo bulume RUUTUM bí akén-ayén moyimape, Israel keralo imola, Israel kídíe bulume botterupe ikumto. Israel kídíe bulume Beth Horonpe gína bedang delok monbomla, Ajekha lolang Makkedah loope pamín geto.

¹¹Beth Horon bedang delok buluke Ajekahpe Israel keralok dugge dungkuem, RUUTUM bí botteruna tapílok buluke teyolo gejém moto. Delo longe delo Israel kídí lokke gíníng-yoksa lok pemílo tapílok buluke bojéyang amie siyinkai.

¹²RUUTUM ke Israel alag aralo Amorit kídíem rulíkdo longe delo, Israel daadi takam keralo RUUTUM me Joshua bí kumdola poto, “E doonyi, Gibeon teyolo asoope dakpolangka, E poolo, Aijalon yiibe teyolo dakyalangka.”

¹³Delo opín-buang kídíe agí miru kídí teyolo, edoem rayan suyinkuma teteloope, doonyie asoope dakpobito, delokke pooloe dakyabito. Dekedem Jasherke kitablo atkumla metung. Doonyie longe raadang delo asoope dakpobito, delokke longe abung kokai uamato.

¹⁴Tanike agomem RUUTUM bí tatbila, agínpe ikímanam sikena longeko kato, delokke keralote sikepe ikí hénying kímang. Israel ke makpépe RUUTUM bí mimagem ito.

¹⁵Depe irodem, Joshua bí Israel maglíng takamem gíbo langkula, Gilgal notkope entoku.

¹⁶Makkedah lokke dííte bupík kolo, Amorit kídíke roja pilngode rusisula duuto.

¹⁷Edílo Amoritke roja pilngoe Makkedah lokke dííte bupíkkolo rusisula duunyokdung emla Joshuame pokantodí,

¹⁸delo bí, “Bupíkdem líídung bottenalok lengkappala, ami ayoko dakbom molangka,” emla lulík geyéla;

¹⁹ami kídíem, “Nolu tokí-toyan kamape noluk miruem monmín gela, méélam danlok mimak imín gelangka, delokke bulume agí-agíke doolunglo píngku momapeka; kapeila noluke alag aralo RUUTUM noluke Shédíbí bulume ruulíktung,” emla lulíkto.

²⁰Joshua lang Israel kídíe, buluke milung-abampe ina ami alum rungem petyinto. Buluke lokke sanpenam ami petomeke agí-agí doolung yabgo arasulo píílasutoku.

²¹Delo Israel maglíng takame Makkedahke mimak notko delo Joshua kelo píílat suyintoku. Depe irongem sékote Israel mirupe agom pona kamato.

²²Delok rongem Joshuabí, “Bupík delo líídung longkapnam kídíem lobín langkula, delokke dem roja pilngo dem ngok kerang so bomalangka,” emla lulíkto.

²³Delo bulu, Jirusalemke, Hibronke, Jarmuthke delokke Lakhish kelang Eglonke roja kídí pilngodem aaboto.

²⁴Edílo roja pilngodem aabotodí, delo Joshua bí, bulum aabona maglíng ruutum tatko lolang Israel miri kídí takam tatkolo, bulum takam tomdum supala bulum poto. “Roja kídí sokke alíng kídíso, noluke ale kídíem ilíktoka.” Depe pokolok bulu aala buluke alíng kídílo ale tujémlíkto.

²⁵Delo Joshua bí bulum poto, “Nolu aapí-aange améla pesomapeka. Aapí-aange ralla miga miramlangka. Noluke mimak imín supenam miru kídílo sikepemin RUUTUM bí iyéne.”

²⁶Depe emla Joshua bí roja kídídem mokala, esing pilngo kolo pakto. Buluke simang kídíem yume adeng loope daktímoto.

²⁷Doonyi uadelo Joshuake polík kolok, simang kídídem jooyilangkula, buluke kerangke bupík ruunyok geko delo simang kídídem yoplík geyéla, bupík delokke arung nappangdem kerangke kísa líídung bottena kídílok longkaptoku. Dekede silo loope delo kadung.

²⁸Joshua bí delo longe delo Makkedah doolungdem laato. Doolung delokke roja demlang mipil-miyong ami kídíem petyin berokto. Midum atel koteng bí turmomato. Jeriko rojem bí kape kísa itodí, deke kísapakpe bí Makkedah roja demte bí ito.

²⁹Delokrongem Joshua lang bíkke Israel maglíngde Makkedah lokke gíla Libnah doolungdem mimak aabomto.

³⁰RUUTUM bí doolung delokke rojem lang ami kídí takamem Israel kídíke alag aralo melíkto. Joshuabí doolung delokke ami atel koteng turmomape takamem petyinto. Jeriko rojem kape kísa itodí, deke kísape bí doolung delokke rojemte ito.

³¹Delok rongem Joshua lang Israel maglíngde Libnah lokke gíla Lakhishdem mimak iyabomto. Bulu rego mipílo dagbomdola mimak iyato.

³²RUUTUM bí Lakhish doolungdem Israel alaglo melíkla, Joshuabí loonyinana delo doolung deme laato. Libnahlo bí kape kísa itodí deke akampe ami atel koteng turmomape doolung delokke ami takamem petyinto.

³³Depe ido delo Gejer doolung lokke roja Horam bí, Lakhishdem igulpe aato. Idola bulumteng Joshua ikumla midum atel koteng turmomape nyokyinmoto.

³⁴Delok rongem Joshua lang Israel maglíngde Lakhish lokke gíla Eglon dem mimak iyabomto. Bulu rego mipílo dagbomdola mimak iyabomto.

³⁵Bulu longe ateleme doolung dem laala Lakhishem kape kísa itodí deke pakpe doolung delo midum atel koteng turmomape takamem petyinto.

³⁶Delok rongem Joshua lang Israel maglíngde Eglon lokke Hibron dem mimak iyabomto.

³⁷Bulu doolung demlang ayir agongke doolung kídídem laala, doolung delokke rojem lang ami takamem petyinto. Eglonlo inam kísa midum atel koteng bulu turmomape doolung dem apíírupe nyokyinmoto.

³⁸Delok rongem Joshua lang Israel maglíngde gílat sulangkula Debirdem mimak iyabomto.

³⁹Bulu doolung demlang ayir-agongke doolung kídídem laala, midum atel koteng turmomape petyinto. Bulu apíírupe nyokyinmoto. Bulu Hibron doolung kelang Libnah doolungke rojem lang ami kídíem kape kísa itodí deke pakpe Debir demte ito.

⁴⁰Dekepeila Joshua bí asi among takamem laayinto. Bí adi among emlang sokkodan Negeb amongem delokke yiibelo duuna among takam emlang delokke roja kídíem ikumyin geyéla, midum atel koteng turmomape ngakína yar-yardem nyokyinmoto. Sikesim RUUTUM Israelke Shédíke pokam pakpe iyin goto.

⁴¹Joshua Goshen among takam lok ila Gibeon loope, delokke Kadesh Barnea lok ilangala Gaja loope, Israel gooralo laayin aato.

⁴²RUUTUM Israelke Shédíbí Israel legape mimak ibokolok, mimakpe gírum letellok sim roja kídí takam simlang asi-among tabusim ikum goola yébomto.

⁴³Sikepe irodem Joshua lang Israel maglíngde buluke notko doopomlo enlatsutoku.