Read Alladian JOSHUA 11 Bible Online

JOSHUA 11 - Alladian bible

JOSHUA 11

¹Edílo Hajor lokke roja Jabin bí legí-sigang takamsim tattodí, delo bí sim roja kídar sim Israelem mimak idope pín-gosuto; Madon lokke roja Jobab, Shimron kelang Akshaph lokke roja kídíem;

²línggíng danke adi amonglo duuna roja kídíem, Kinnereth sokkoke Arabah among lokke roja kídíem, anggodanke dííte rumkíngke yiibe amonglo duuna roja kídíem, dííte teyong Naphoth Dorlo duuna roja kídíem;

³sanggodanke Kanaan ami kídíem; delokke anggoyang delo duuna Amorit, Hittit, Perijjit kídíem; anggodanke adilo duuna Jebusit delokke Mijpah moole lokke Harmon dííte rumkílo duuna Hibit kídí takamem.

⁴Bulu daadi takamde dumsula, siyéng asi robeng lokke sulli kísa, hanam yimanam maglíngkope ila, deddína guré rébamem lang gaariem aabola,

⁵Israelem mimak ipe emla Merom rojik emko delo notko ito.

⁶RUUTUM bí Joshuame poto, “Bulume atí pesomapeka. Kapeila nyampoke sikena moodílo, ngo bulum takam, moka kayinpala Israel alaglo melíkyé. Nolu, buluke guré kídíem lebya-lakbyadope ila buluke gaari kídíem romyin bilangka.”

⁷Depeila Merom rojik emko delo, Joshua lang bíkke maklíng takam de miru kídídem mamam sudope mimak iyato.

⁸Miru kídí deme RUUTUM bí Israel alag aralo ruulíkto. Israel maglíngde bulum mimak delo ikumla, línggíngdanke Misrephoth Maim lolang Sidon loope, delokke sanggo danke Mijpah yiibe loope gílangkula midum atel koteng turmomape petyinto.

⁹RUUTUM ke políknampe Joshuabí, miru kídíke guré kídíem lebya-lakbyamola delokke gaari kídíem romyin bito.

¹⁰Depe irodem Joshuabí gílat sulangkula Hajor doolungem mimaklo ikumla, delokke rojem mokato. Dekepe ido delo Hajor doolungde takam empemílo amín kayayalumna doolungpe ituai.

¹¹Bulu doolung delokke midum atel kokom turmomape, petyinla doolung dem emepe romto.

¹²RUUTUM me agér ibina Mosike tuubupe, Joshua bí doolung takamem aabomla, deke delokke roja kídíem moka kayinla, midum atel koteng turmomape iyin gooto.

¹³Idola língkum yabgo kumgoosula ina, díítum teyolo duuna doolung kídíem Israel kídíe rompakmato. Dekepe ina Hajor doolung petomem Joshua bí romto.

¹⁴Doolung kídí delokke míínam ekuserang kídí emlang, taro kídíem, Israel kídíe buluke supe bomsii suyintoku. Idola tani emdan midum atel koteng turmomape petyin berokto.

¹⁵RUUTUM bí bíkke agérem ibina Mosime políkto. Mosi bí Joshuame poyan sulíkto. Dekedem Joshua bí igeto. Mosike teyolo RUUTUM ke políknam agér atel koteng iakmape, ato takamem Joshua bí apíírupe ipíng líkto.

¹⁶Sikepe irongem, sim asi-among tabung sim Joshua bí laayinto: línggíngke adi among, Negeb takam emlang deke delokke yiibe kídíem, Goshenke moolop takamdem, anggodanke díítum takam dem, sokkodanke Arabah mopyang abuung demlang Israel lokke díítum takam emlang deke delokke yiibe among takamem;

¹⁷Seirdanpe gíípongpe ikuna Halak díítumlok ila, Harmon dííte rumkínglo duuna, Lebanon yiibelo duuna Baalgad loope laayin gooto.

¹⁸Joshuabí deke delokke roja kídarem, toodí takying ngatkope mimak ibomsula, bulum ikumla moka kayinto.

¹⁹Gibeon among lokke Hibit ami kídí kékonlo, sékote Israelem aapí eetet kadope bonying agér ibosumato. Dekepe ibosumana doolung tabungem Joshuabí mimak iyin bosuto.

²⁰RUUTUMke Mosike teyolo lulíknam adupe, RUUTUM bí agísue deke delokke ami kídíke aapí-aangem tolmola, Israel kídílo mimak idope míímoto. Dekepe bulu mirol aangem gela Israelem mimak iyé tetengem, bulume apíí-píílípe petnyokmola, buluke teyonglo ayang atí kamape bulum nyokyin modope emla dekepe imoto.

²¹Dekepe midu-mimak ido delo, adi among Hibron, Debir, Anab kídí lolang adi among Judah, delokke Israello duuna migo-mimat ami Anakim kídíem, buluke doolungem Joshuabí petnyok-nyokyin gooto.

²²Israel among lo dekena migo-mimat amie turna kaimato. Idola Gaja, Gath delokke Ashdod doolung kídí petomlo, pettung-petngong ako annyi turto.

²³Mosike teyolo RUUTUMke lulígnam tuubupe, asi-among tabungem Joshuabí laayin gooto. Deke takam dem laayin goorongem, opín-buangpe orek-orekpe ipansubila, Israel kídíke yébom kupenam asi-amongpe bulum takam Joshuabí oryinbito. Dekepe irongem asi-among delo midu-mimak kapo yimape ila aapí-aange eetetpe yépotoku.