Read Alladian JOSHUA 20 Bible Online

JOSHUA 20 - Alladian bible

JOSHUA 20

¹Dekepe irongem RUUTUM bí Joshuame lulígto,

²“Israel ami kídíem sipe polangka, ‘Ngokke nolum Mosime podope emla popanam, duusi suko doolung kídí legangem ilenlangka.

³Imem kotírpe amikone ami akonem mokanamko kayémílo, bí dekena doolunglo duusisula edo rakupena keranglok ipít sulado.

⁴Bí dekena doolung kolo duggela, doolung delokke yabgo aatak kebang ipom delo, doolung miro kídíem bíkke legí-sigangem aipe popa subipe aido. Delo doolung de bím doolung eyabem sitya bila bí doolung arang delo duusi sulado.

⁵Ami dem edo rayan sukupe emla matana doolung de, delo píímín geyémílo, doolungde bíkke alag aranglo amidem edílokom melíkpe aimang. Amidem bulu mopít biperung aido, kapeila bí aklíla demangkom iperung mííla sinadem ikamang. De kénmape imem kotírpe ito.

⁶Bí doolung delo miri írneke simang tetedem delokke kelíng-kebange aroem lengkanmang abungem duutípope aiyé. Sikena atíko karong petomem amide agíke doolung sulo aasuladoku.’ ”

⁷Depeila bulu, Jordan korong anggo danlo, Naphtalike adi amonglo duuna Galil Siyéng robengke Kadesh doolung demlang, Ephraimke adi amonglo duuna Shekhem delokke Judahke adi amonglo duuna Hibron dem ullento.

⁸Jordan korong kelang Jerikoke sanggo danlo duuna yépol mooruk adi amongke aralo duuna Reuben kídíke moole lokke doolung Bejer dem delokke Gad amonglo duuna Gilead mooleke doolung Ramoth dem delokke Manasseh amonglo duuna Bashan mooleke Golan doolung dem ullento.

⁹Sikesi, Israel kídí kelang bulu kelo duumín gena mibo-miying kídíke duusi sugepeko doolung kídíe. Séko amiedí imem kotírpe amiko mokayédí, bí so doolung kídí so duksi anggela, bím edo rayan sukupena alaglok duksisula dungge lado. Aipakpe kelíng-kebangem imatete delo bím atí mokalamayé.