Read Alladian JOSHUA 23 Bible Online

JOSHUA 23 - Alladian bible

JOSHUA 23

¹Deddína longeko yérongem, gargoona miru kídíke gooralok RUUTUMbí Israelem eetedem bila, delo Joshuabí mijing alongkai.

²Joshuabí Israel kídíke, miro kídíem, abu-abíng kídíem, doolung ruutum kídí emlang migom kídíem tomdumsula bulum poto, “Ngo supak deddína dítakko yéla mijing along kabong.

³RUUTUM noluke Shédíbí noluke legape mimak momínsula, noluke yéta legape angukon mibo- miying opín-buangem kape kísape RUUTUM noluke Shédíbí itodí, deke takamem nolu kaayinsukai.

⁴Sanggodanke Jordan koronglok ilenla, Among Raadang Siyéng eloope edítko ngo mibo-miying ami kídíem ikumbotodí, delokke imape metudí deke takamke asi-amongem ngo noluke yéta legape nolume opín-opínpe asi-amongem oryinbito.

⁵RUUTUM noluke Shédíke togesunampe bí agísue, noluke miru-hogong ami kídardem noluke keranglok monpakbila bulum duggemoyéku.

⁶Depeila Mosike ayon kitablo atnam kídíem aipakpe ansu bomdola igap gelangka. Deke delokke ayon atel koteng igemape imapeka.

⁷Noluke aralo yéyélsuna mibo-miying ami kídí so, nolu ansu-kaasumape yépyam-yéyamla ibosumapeka, buluke uyu kídíke amínem mínmín gemapeka, demangkom uyu kídíke amínlok amkí-pékísula, uyu kídarem kumsugoola imapeka.

⁸Delok ayanpe silo loope kapekísa nolu RUUTUM kíng míngkesula yédudí, dekepe nolu yéyar langka.

⁹Noluke kerang kerangpe RUUTUM bí nolum pemílo miramyana, gaiyana mibo-miying amiem, noluke keralo dakka sulamadope monpak gebidung.

¹⁰RUUTUM noluke Shédíbí agíke togesunamem mesiisula, nolu kepe mimak momín sugape, noluke mipile, miru ami éjarem duggedokupe iladung.

¹¹Dekepe ila RUUTUM noluke Shédíme ayang sukolo nolu an-gap along sulangka.

¹²Nolu míngke sumape, noluke ayir-agong so duuna miying ami kídar so leko bosula, bulum omum-nyameng ibosula iyémílo,

¹³RUUTUM noluke Shédíbí sim ami kídar sim noluke kerang lok monpak bimayé. Delok ayanpe si ami kídar si, noluke legape nolum batjémkuna etku-edape, demangkom obung supeko arungpe, demangkom noluke méélamlo demmín gena banggén kísa nakope, demangkom noluke amiglo duuna tang kísape iyé. Sikena adír si, RUUTUM noluke Shédíke nolum rubinam among gaina sok nolu nyokyinma tetedem katíbomyaryé.”

¹⁴“Supak ngokke sidíe píngkai. Mipil-miyong nolu agí-agí aapísulo, RUUTUM noluke Shédí bíkke agíke togesunam adupe aina ato takamem nolum binamem kényin sudung. Bíkke toge sunamem atel koteng ipíng mape menam kamang. Takamem ibikai.

¹⁵Bí kape kísa atel koteng mepakmape togesunam kídíem ibidudí, delok kísape noluke teyolo bíkke itung-iré emkom bí igapbomyé.

¹⁶Nolume daapongke ayonem bomgapdope emla, RUUTUM noluke Shédíke lulígnamem nolu igemayémílo, delok teyolo nolu angukon uyu kídíem kumsu-joosula agér ibiyémílo delo RUUTUM bí noluke teyolo aklíla, nolum itung-iréla ibomyé. Dekepe iyékuem bíkke gaina among ruubinam sok nolu midum atel koteng turyimape menarupe nolu nyokyinyé.”