Read Alladian JOSHUA 24 Bible Online

JOSHUA 24 - Alladian bible

JOSHUA 24

¹Shekhem doolung delo Israelke opín-buang takamem Joshua bí laadumsuto. Bí Israelke miro kídíem, maglíng ruutum kídí emlang migom kídí tabungem gogdumsuto. Bulu Shédíke keralo takame lengkan suyinto.

²Delo Joshuabí ami takam kerang delo poto, “RUUTUM Israelke Shédíbí sikepe podung, ‘Konnying-mennying noluke abu kídí, Abraham lang Nahor bulu Euphrates korong kékon elo duula abíd uyu kídarem kumsuto.

³Delo ngo noluke buku Abrahamme Euphrates kékon elok langaala, Kanaan among tabuso gíying gobola, bíme deddína oten ome-uem ruubila,

⁴Isaakme rulenbila, Isaak kíng Jakob melang Esaume rulen bila, delokke Esaume adi among Edomem bíkke yéta amongpe rubila ito. Idola noluke buku Jakob lang bíkke ome-oo kídíe Ijipt amongpe tokto.

⁵Méélam delo, ngo Mosi melang Aaron me melíklang, Ijipt amonglo deddína itung-irénamem ilíkla ito. Delokke ngo nolum deloge laalentoku.

⁶Ijipt lok ngo noluke abu kídíem laalen dokuem, Ijipt kídíe guré sipaying loklang gaarilok bulum monmín geto.

⁷Idola edílo bulu Silíng Siyéng delo ngokke igulem kabbom todí, ngo Ijipt kídí kelang buluke pénsam delo kamuem ilíkla, Ijipt kídíke teyolo asi silungem eelum mola, bulum nyokyin moto. Deme nolu agí amigete kaayinsuto. Dekepe irodem nolu yépol mooruk amonglo deddína longem yégoto.

⁸Dekepe yégorongem, Jordan sanggodan so duuna, Amorit amonglo nolum ngo bomato. Bulu nolum mimakpe iríksuto. Idola noluke aabomdung teteng delo ngo nolum ikummola, buluke adi amongem, nolum laamola bulume ngo nyokmoto.

⁹Depe iro delo, Moab ke roja, Jippor ke oo Balak bí, Israel noluke mirolpe rollenla nolum mimak ila, Beorke oo Balaam mete nolume béngkadope tombomsula ito.

¹⁰Idola ngo Balaamke agomem tatbimato. Delok ayanpe bí noluke teyolo utepooro agomem polatlíkto. Dekepe ngo bíkke alaglok nolume mopítto.

¹¹Depe irongem nolu Jordan korongem koola Jerikolo pííto. Jeriko ami kídí de nolum mimak imínsula, delokke bulukíng makpépe doola, Amorit, Perijjit, Kanaan, Hittit, Girgash, Hibit delokke Jebus ami kídíete mimakpe imínsuto. Idola bulum takamem ngo noluke alag aralo ruuyinlíkto.

¹²Noluke mimakpe gíbomdungem, noluke kerang kerape ngo yirípedínam peso-ríanem melíkla, Amoritke roja annyidem duknyok gemotoku. Dekede noluke ityi-epuk loklang yoksalok imato.

¹³Noluke ngiilíkmangko amongem ngo nolum ruubito. Depe ikolok deke delo nolu dungabomla, noluke lekí-lepakpete manam onggur esing ayélok alang emlang olib esing lokke ayéme dola-tííla nolu iabomkai.’

¹⁴“Dekepeila, supak RUUTUMme pesola, bím míngkesula, jonnamrupe agér ibilangka. Noluke buku kídíke, Euphrates korong kékon elo lang, Ijipt amonglo kumsu-joosunam uyuem mepaklangka. Nolu RUUTUM atel petomme agér ibilangka.

¹⁵Nolu RUUTUMme agér ibilíímamílo, séko memda nolu agér ibipe míídon? Silo noluke míínamem beroktola. Nolu Euphrates korong kékonlo noluke buku kídíke uyu emía, ma, siloke noluke ale tuangko Amorit ami kídíke uyu emía agér ibipe míídun? Idola ngo lang ngokke ekum erang ngolu kepedan RUUTUM petomme agér ibiyé.”

¹⁶Delo ami tabungde poyansuto, “Ngolu edílokom RUUTUM me mepala angukon uyuem agér ibimayé.

¹⁷Kapeila RUUTUM ngoluke Shédímin, ngolum lang ngoluke abu kídíem abílpe iko Ijipt amonglok laalenkune. Bíkke irisinyo inamem ngolu kaasune. Ngoluke gíko rego mipílo, miru kídíke kerang lok bí ngolum ai kampope gagbomne.

¹⁸Siloke ngoluke ale tuangko among soope, ngoluke gíadung emteng RUUTUM min sikeso duuna Amorit kídíem ngoluke kerang loge mon-gé bila ine. Depe ila ngolu RUUTUM atelme agér ibiyé, kapeila bí ngoluke Shédíe.”

¹⁹Ami kídíem Joshuabí poto, “RUUTUM ke agérem nolu ibilamayépe, kapeila bí deena Shédíko; bí nena Shédíko. Bí noluke imem emlang paabem mesam bimayé.

²⁰Nolu bím mepak supala bík teyolo mirolpe ila, nolum itung-iréyépe. Bí kerape noluke teyolo aiduakom nolum nyokmo yékupe.”

²¹Ami kídíde Joshuame poyansuto, “Ma, ngolu RUUTUM petomme agér ibiyé.”

²²Joshua bulum poto, “Nolu RUUTUM me agér ibipe emla, nolu ulsutung. Delokke hakiipe nolu agísue isukai.” Bulu delo emyansuto, “De aroe, ngolu agísu terenge hakiisupe isukai.”

²³Delo Joshua bí bulum emtoku, “Dekemílo, nolu kelok angukon uyuem mepak sulangka, delokke RUUTUM Israelke Shédíme aroe emla nolu míílangka.”

²⁴Ami kídíde Joshua me poyansuto, “RUUTUM ngoluke Shédí petomme ngolu agér ibiyé. Bíkke lulígem ngolu tatbiyé.”

²⁵Dekepeila delo longe delo Joshua bí ami kídí delo lekope daapongko ibosuto. Dekepe Shekhem delo bí bulum ayon kídí emlang idong kídíem ami kídí legape ibila ito.

²⁶Dekepe ibinam kídídem, Joshua bí Shédíke ayon kitablo atlík bito. Depe atbipala bí botteruna líídungko laala RUUTUM ke deena moolop delo rotne duuna leríng delo dííto.

²⁷Depe irongem bí takam ami kídídem poto, “Si líídung si ngolu takamke hakiipe ikai. RUUTUMke ngolum takamem agom ponam tabungem si tatto. Depeila nolu agíke Shédíke teyolo, yatku madope noluke kaada sukeng hakiipe si líídung si duuyar biyé.”

²⁸Delokrodem, ami takamdem agí-agíke among yétasulo Joshua bí gíyin motoku.

²⁹Dekepe irongem RUUTUM ke agérem ibina Nunke oo Joshua bí sikai. Bík sido delo bík dítage língko kolang takyingko ito.

³⁰Gaash dííte línggíngdanlo duuna adi among Ephraim aralo kana, bíkke agíke yéta amongke doolung Timnath Serah emko delo bím yuto.

³¹Joshuake turdu delo ami kídíe RUUTUM me agér ibito. Bíkke sirong deloteng, Israelke legape RUUTUM ke agér ibinamem kaasuna miri kídíke turdu tetengeme, Israel kídíe RUUTUM me arope míngkesula yétíto.

³²Ijipt among lok Israel kídíke bomkunam, Josephke simang deme Shekhem delo yutoku. Dem moolop dem Jakob bí baldín nogdi língko lok Shekhemke abu Hamorke oo kídíem bila retuai. Depeila dem moolop dem Josephke oten ome-oo kídíe buluke among yéta supe bomyar sukai.

³³Aaronke oo Eleajarte sila, adi among Ephraimlo duuna Gibeah doolunglo bím yuto. De doolungde bíkke oo Phinehas kíng panlíkname.