Read Alladian JOSHUA 4 Bible Online

JOSHUA 4 - Alladian bible

JOSHUA 4

¹Edílo opín-buang tabunge, Jordanem kooyintodí delo RUUTUM bí Joshua me poto,

²“Opín miyonglok midum atelpe ullenla, midum íying kolang annyiko ullen langka.

³Depe ipala Jordan korong raadangke miri kídí dakko delok elínglok íying kolang annyiko bulum joomolangala, noluke agíke notko ipekolo jongkum motoka.”

⁴Delo Joshuabí bíkke ullennam, midum íying kolang annyidem tomdumsula bulum bí lulíkto,

⁵“RUUTUM noluke Shédíke Daapong Sonduk esim gípong geyéla, Jordanke korong raadang elok, Israelke opín-buang miyongem, mííbomdola mipil miyongpe nolu elíng asak pyala agí-agí gordulo joobom langka.

⁶Dekede noluke aralo iyodkope iyé. Yépenamlo edílo noluke ome-oo kídíe, ‘Si elíng kídísi íngkuedí,’ emla ííyéme?

⁷Delo nolu bulum, ‘Edílo RUUTUM ke Daapong Sonduge Jordan asiem kootodí, delo Jordanke asie taapan subila ito. Deme Israel kídíe míípasuge ayardope si elíng kídar si iname,’ emla popabilangka.”

⁸Ami kídíde Joshuake lulíknampe agérem ito. Joshua me RUUTUM ke políknam tuubupe, Israelke opín-buang miyongem mííbomdola, Jordan korong raadang delok elíngem, bulu íying kolang annyiko joobomla, buluke notko ikukolo joonga bomlangkula mekumto.

⁹Jordan korong raadalo, RUUTUM ke Daapong Sondugem joobomla miri kídí dakko delok, laanam elíng kídídem Joshuabí língkumkope kumto. De kumnam língkumde silo loope delo dung.

¹⁰Kerangpekai Joshuame Mosike políknam tuubupe, RUUTUMke Joshuame lulík kolok, Daapong Sondugem joobomna miri kídíde, Jordan korong raadang delo dakya yatíto. Ami kídíde lomla kooto.

¹¹Ami kídí delokke kooyinrodeme, RUUTUM ke Daapong Sonduk delang, dem joona miri kídíde, ami kídíke kaadungem, korong rotkondan delo píímín geto.

¹²Kerapekai Mosike podupe, Reuben, Gad delokke Manassehke opín arotkonde mimak leemo gela, koomín geto.

¹³RUUTUM ke keralo mimak leemo gela, mimak ipena amie éjar íying appiko, Jeriko yiibe rotkondan delo koolento.

¹⁴Delo longe delo, Israel daadi takamke kaangkolo, RUUTUM bí Joshua me botteruna amikope lengkan bito. Delokke ila, Mosime kape kísa míngke sutodí, dekepe Joshua mete ami kídíe, buluke yénam tabunglo míngkesula yéyar gekai.

¹⁵RUUTUM bí Joshua me poto,

¹⁶“Daapong Sondugem joobomna miri kídíem, korong delok gílen langkuka emla lulíkto.”

¹⁷Delo Joshua bí miri kídíem, “Korong delok gílentoku.” emla lulígto.

¹⁸Depe lulíkrodem RUUTUM ke Daapong sondukdem joobomna miri kídíde, korong delok gílentoku. Edílodí buluke ale kídíe, pítílko robeng delo tuangtokudí, delopak Jordan korongke aside kerangke kísa puumupe toktoku.

¹⁹Kerang pooloke longe íyingnana longe delo, ami kídíe Jordanlok aala Jerikoke sanggo danlo duuna Gilgal mooloplo notko ito.

²⁰Gilgal delo Joshuabí, Jordanlok joonam elíng íying kolang annyidem língkumpe kumto.

²¹Bí Israel kídíem poto, “Lunnyi-nyampo edílo noluke oten ome-ue buluke abu kídíem, ‘Si elíng kídar si íngkuedín?’ emla íngkíyéme,

²²delo bulum sipe pobipe aido, ‘Israele pítílpe sim Jordan korong sim gíto.’

²³Kapeila nolu takame kooyinma tetengem, RUUTUM noluke Shédíbí Jordan asieme pítílmoto. Silíng Siyéngem kapekísa pítílmola, ngolum kooyin motodí, delok kísape RUUTUM noluke Shédíbí Jordan korongem ito.

²⁴Nolu, RUUTUM noluke Shédíme agínpe pesola yége ayardope, delokke tani among sokke ami takame, RUUTUM bí botterupe pauar kanako emla kéndope sime ito.”