Read Alladian JOSHUA 9 Bible Online

JOSHUA 9 - Alladian bible

JOSHUA 9

¹Israel kídíke mimaklo ikumnam legí-sigangem, edílo yiibe lolang adi amonglo duuna, Jordan korongke anggodanke roja kídíe lang Among Raadang Siyéngke robeng abulo duuna roja kídíe, delokke línggíng among Lebanonke roja kídíde: emnamde Hittite, Amorit, Kanaan, Hibit delokke Jebusit kídíke roja kídíe tattodí,

²bulu Joshua melang Israelem mimakpe irepbomto.

³Idola Jeriko emla Ai doolungem, Joshuake inamem edílo Gibeon ami kídíe tattodí,

⁴bulu Joshuame yatpe emla mííto. Bulu donam-tíínamlok itala, dekedem gado teyolo bosta angínnalok lang omtak-omraknam, aku ayu gadumlok leemolíkla, mirolok ayoko misatpe ullenla lulígto.

⁵Ami kídíde omsi-ommokunam aku korom leyuglok gela, ege galuk akulok pítgela gíto. Buluke burna etting kídí demteng erengdope lang deemadope bomto.

⁶Bulu Gilgallo Israel kídíke notko ila duudungem, Joshua kíng lang Israel lok miri kídí keralo sikepe posuto, “Ngolu mooteng among lokke aadung. Ngolum bonyingko ibosuika.”

⁷Depe porodem Israel miro kídíde, Gibeon lokke Hibit ami kídídem, “Nolu mongéso duuna ami laate idupe, iname ngolu kape kísa bonying ibosuyén?” emla poto.

⁸Delo bulu Joshuame, “Ngolu noluke agér-anamlo ibipe míídung,” emla popasuto. Idola Joshuate, “Nolu ingko amieke? Ingko lokda nolu aadune?” emla íngkíto.

⁹Delo bulu poyansuto, “RUUTUM noluke Shédíke amín kanamem tatla, ngolu deddína mooteng amonglo lokke aadung. Bíkke Ijipt among belo irisinyo inam takamem ngolu tayyinto.

¹⁰Delok teyolote Jordan sanggodanke Asthrothlo duuna, Bashanke roja Og delokke Heshbonke roja Sihon, dekena Ammon ami kídíke roja kídí teyolo RUUTUMke inamem ngolu tatto.

¹¹Dekedem tatla, ngoluke miro kídíe lang doolung ami kídíe, donam-tíínamem ngolum iru bila nolum kaarík sudope ngolume lulíktung.

¹²Kaatola ngoluke etting kídíem, ngoluke ekumlok gílen duem sikesi igange ila aní alooduai, idola supak ereela deemang alongkai.

¹³Ngoluke ayo gadum kídí simte kaatola, asi-apongem ríklíkdo delo anítuai, idola bedangso bétla omsi-ommolíktung. Ngoluke ege galuk kídí silang, leyug kídar sikom, mooteng bedanglo en-genam legape bétla tuyumsuto.”

¹⁴Depe pobosurongem, Israel kídíde buluke donam-tíínam ayoko bulukíng laaríksuto, idola buluk legangem RUUTUM kíng íngkí-lupo kamato.

¹⁵Joshua, Gibeon ami kídílo bonying ibosula bulum duumoto. Israelke miro takamde bonying ibosunamdem bomgap ayardope togesuyinto.

¹⁶Dekepe bonying agérem ibosurong longe angum méélam delo de ami kídíde buluke ayir-agolo duuna amieke emla, Israel kídíe kéntoku.

¹⁷Dekepe kénlangkula buluke dungko doolung: Gibeon, Khepira Beeroth delokke Kiriath Jearimpe Israel kídíe longum méélam delo enbomto.

¹⁸Idola RUUTUM, Israel ke Shédíke amínlok bonying ila bulume agom binam legape, Israel kídíde bulume petlamato. Sikesok legape, ami kídí tabunge miro kídí teyolo ebín-eson manbomto.

¹⁹Idola miro kídíde poyansuto, “Ngolu bulume RUUTUM Israelke Shédíke amín lok bonying ibosula, agomem bisutobong; iname bulum ngolu atímape ilamang.

²⁰Ngoluke agom bisunam legape bulum turmope aiyé, demamílo Shédíbí ngolum irééyéku.

²¹Iname bulum turmodola, ngoluke legape asi bombila delokke esing nabila imope aiyé.” Dekepe kebang miro kídíde kebangem luto.

²²Delo Joshua bí Gibeon ami kídídem tomamopala bulum luto, “Nolu kape ngolum yatkan? Nolu kape ayir-ago so duudu lateng mootengo lokke amieke emla ngolum agom mekan?

²³Nolu sikepe melí-yatdong agérem inam legape Shédí bí nolume takil sukkatdung. Silo lokke ila yénam daknam loope noluke ami kídíe RUUTUM ngokke Shédíke deena ekum legape asi bombila, esing nabila abílpe iyarla yéyé.”

²⁴Bulu bím poyansuto, “E mite migom, noluke entíng-gítíng takamlo, asi-among takam sim nolu yébomdope, delokke sikeso duuna ami takamem nyokyin modope, RUUTUM noluke Shédíbí Mosi me lulígto. RUUTUMke lulígnampe ato-siro takame ilenkai. Sikepe ilennamem ngolu airupe jikki-rokpakpala dekepe ngolu nome yatto. Ngolu nolum yagorupe peso-rían geto. Ngoluke yénamem noluke keralo mesiisupe emla dekepe ngolu ito.

²⁵Ngolu supak nokke alag aralo duudung. Nok kangkolo ingkuedí aiyéne, dekepe ngolum ilangka.”

²⁶Dekepe mansukolok Joshua bí bulume mopítto. Israel kídíe bulume mokamato.

²⁷Idola delok ayanpe bulume abílpe imola, Israel kídí emlang RUUTUMke deena ekum legape asi bombila, esing nabila idope imoto. RUUTUM me kumpomlo, dekepe buluke teyolo lulíknam agérem silo loope bulu ila duudung.