Read Alladian 2 THESALONIKA 1 Bible Online

2 THESALONIKA 1 - Alladian bible

2 THESALONIKA 1

¹Paul, Silbana delokke Timothi, ngoluke Abu Shédíkíng delokke Ruutum Jisu Kristokíng duuna Thesalonika mondolilo salame:

²Abu Shédíke delokke Ruutum Jisu Kristoke ayangelang yéponame nolukíng duudaklangka.

³Bírokídí noluk legape ngolu agínpe Shédíme koyitpe aikai, kapeila noluke míngkenge bojépe siisa yayang idung, delokke noluke akone akonem ayang bosuname gooyang gooyang idung.

⁴Delokke legape Shédíke mondolikídí aralokke noluke yémgap namem delokke taronang takamlo noluke donggap genam ikang darkangem tatla ngolu mííyum sudung.

⁵Si takamsi Shédíke ponkan kupenamem lengkan bidung, delokke ire noluke adír bomsunam, Shédíke yétalo nolum are kanarung amipe sanyé.

⁶Shédí bí raadange; nolum irééna kídíem Shédí bí irééyéku

⁷delokke iréénam kídí emlang ngolumte bí apéé moyéku. Edílo Ruutum Jisu bí ralnarung teyong kotokilo lekope eme dorla teyong telok lenyékudí delo dem atíkídí dem iyé.

⁸Shédíme kénmana kídíem delokke ngoluke Ruutum Jisuke ngiitomem igemana kídíem bí ingééyéku.

⁹Bulum nyokyar pekolo menyok líkyéku delokke Ruutumke keralok delokke bíkke migom ralnam lokke angupe mepakyé.

¹⁰Delo longedelo bíkke deena amikídíe bíkke angun ralnamem yidgeyé delokke bím arue emla míína kídíe irisinyope mííyé. Delo nolumteng totak sudung, kapeila nolu ngoluke lukan bonam ngiitomem arue emla mííto.

¹¹Delok legape ngolu agínpe nolum kumbidung. Nolum are kadope tomlennam adulok nolu yédope ngolu ngoluke Shédíme rogudung. Bíkke pauarlok ainam legape noluke míínamem bí apíí modak langka, delokke míngkeng agérem iyin bidak langka.

¹²Ngoluke sim kumbomnamde ngoluke Shédíke delokke Ruutum[1] Jisu Kristoke yanggong akorlok ngoluke Ruutum Jisuke amínem nolukelo ralgedope, delokke nolum bí ralge bidope emla kumdung.