Read Alladian 2 THESALONIKA 2 Bible Online

2 THESALONIKA 2 - Alladian bible

2 THESALONIKA 2

¹Ngoluke Ruutum Jisu Kristoke angkunam delokke ngoluke bíkkíng dumsu penam legangem: Nolum rogudung,

²Ruutumke longe angka kubong emnamem tatla nolu mínga sumapeka demangkom peso mapeka, kapeila polupoorlok demangkom luyil poyillok demangkom sithilok sok legangem nolum atbitung.

³Depe epe idokom amiem yadko sumapeka, kapeila de longede ebín ebon longe lang ayon kamana mirul[2] amidelok lenmang tetengem aamayé, de amide nyokku pene.

⁴Bí shédí amín tosuna mipídem akyé delokke shédí emkínam demangkom esing elíng kumnam takamem botteyape agíem míísuyé, delokke Shédíke kumkeng ekumlo, ngomoko Shédíe emla agíe duuyan bomyé.

⁵Ngokke nolukíng yédodelo, nolum ngo sim sithi legang kídí sim lubituai, dem nolu míípang suyimanía?

⁶Delokke ingkuem bím doopong modudí dem nolu kénsudung, depe inamde bí aadíku paklo aadokupe emla idung.

⁷Kapeila duunyokna mirul pauarde agér gérlen kabong. Idakkom supak doopong mona bí bím langgé kumang tetengem dekepe iyarpoyé.

⁸Delokrongem ayon kamana mirulde lenyé. Bím Ruutum Jisu agíke nappang ngasang letellok monpak yéku delokke bíkke angkunam asirlok petpak yéku.

⁹Ayon kamana mirulde Soitanke pauarlok aayéku delokke menam yadnam irisinyuem delokke iyodem iyé,

¹⁰delokke nyokpena kídíem yadpena angu angu atímanem iyé. Bulu nyokdak kapeila bulu aruem bomgapla turpe míímang.

¹¹Sok legalok menamem arue emla míídope menana pauarem Shédí bí bulum melík bitung,

¹²delokke depe inamde aruem arope míímape idola mirul agérlo yélíípe yéna takamem nyokmo dokupe emla itung.

¹³Agínpe ngolu Shédíme, Ruutumke ayanam bíro kídí noluk legape koyitrupe aikai. Legade Aid pauarlok delokke noluke aruem míngkelok, kerang yalumpe turdokupe emla Shédí bí nolum ullentung.[3]

¹⁴Ngolu ngoluke Ruutum Jisu Kristoke angun ralnam tarongem paabo sudope emla delo nolum ngoluke ngiitomlok tomlentung.

¹⁵Demílo, bírokídía, edíípe yélangka delokke nappang agom dokom demangkom atkannam dokom ngoluke nolukíng luyil bonamem bomgap langka.[4]

¹⁶Ngoluke Ruutum Jisu Kristo bí agíe ngolum ayana bíkke yanggolok duuyar pena edíngem bina delokke aina míínam sunamem bina ngoluke Abu Shédí bí,

¹⁷noluke aapí ainangem edíímola delokke aina agér agom mipílo nolum ralmo daklangka.