Read Alladian 1 TIMOTHI 1 Bible Online

1 TIMOTHI 1 - Alladian bible

1 TIMOTHI 1

¹Ngoluke míínam sukeng Kristo Jisu kelang ngolum mosing bokuna Shédíke lulíklok Kristo Jisukelo Tomlíknam, Paul ngo,

²Míngkelo arona ngokke oo Timothi kelo salame: Ngoluke Ruutum Kristo Jisu kelang Abu Shédíke, yanggong elang, yaasam namelang yéponame nokkíng duudaklangka.

³Ngokke Makedonialo gídagem nom ponam kísape, ngo Ephesolo duupong domílo emla míídung. Amieke delo menamlok luyil neke kadung, delokke no bulum dekepe poyil yimadope iperung aido.

⁴Tani yéyon ngiitom delokke abu yéyon dooyingem siktí yimapeka emla potoka. Dekede Shédíke míngkelok agérem megeyéla lunga mínsuko agére.

⁵Lulík bomnamsi, dengomna aang, daadééna aapí delokke míngkeng jégaplok aana ayangde.

⁶Ayokone sikesim mííngaa tadamape igeyéla attíng kamana agom mílílo aabandung.

⁷Bulu ayonem luyil bonape ilíídung, idakkom, ingkuem podudí demangkom ingkuem berokpe mííbomdudí dem kénsumang.

⁸Ngolu kéndung tanie aipe ige namkomílo ayonde aine.

⁹Ngolu simkom kéndung ayondem ami aina legape imang dekom ayonem betna mipat amikídí, mitok solok, deemana paab itína delokke dormolok yémana kídí kepe, agí ane demangkom abuem petsuna ami petna,

¹⁰ami méng imem binakídí kepe, pakne pakbo kogoona, medu yattokna, iru sigoona delokke aina niyomem ipatsuna takam kepemin idune.

¹¹Sok takam sok legapemin deena Shédí bí ngom bíkke angunna ngiitomem pogoodope lulíktune.

¹²Ngom ralnamem bina, ngoluke Ruutum Kristo Jisume ngo koyitdung, kapeila bí ngom míngkeng edíí nakope mííla bíkke agérlo ngom melíktung.

¹³Ngo leko ngiléé soléé nape delokke irisinyo ibonape delokke írmí ormo ina amipe ituakom, ngom yaasamem lengkan bitung kapeila ngo kénmadola delokke míngke sumang adape depe ituai.

¹⁴Jisukíng duuna ayang delokke míngkengem bitaksula, ngoluke Ruutumke yanggongem ngom apíípe bitung.

¹⁵Simin apíípe torík subanam arorupe míípenam agome: Kristo Jisu bí tani amoso paabna kídíem mosing kakupe aato, delok aralokke ngo loorí maya yalumne.

¹⁶Idakkom delok pakke legape bím arope míípena delokke duuyarna turnamem paapena kídí kepe kaayii sukepe idope, paab kaya yalumna ami ngokkíng, Kristo Jisuke yémduk genamem paadope ngom yaasamem lengkantung.

¹⁷Supak turyarna Roja, siyimana, kaapang manam, Shédí atelkíng, erkíname delokke angun ralname agínpe duuyar daklangka. Amen.

¹⁸Ngokke oo Timothi, nokke legangem kerape polu poor agomlo potonam akorlok sim ngiitom sim nokkíng melíkdung. Delok agom kídar delok mimak sérang kísape,

¹⁹míngkengem bomgapdola delokke aapíe berokdola, aina mimagem inalangka. Ayokone dem agom kídardem tomang delokke dekepe ila buluke míngkengem nyokmo dungku.

²⁰Buluke aradelok Huminoi delokke Aleksandar bínyi depe idung, ngiléé soléé em mekunamem kénsudope emla ngo bulum Soitan alaglo melíkdung.