Read Alladian 1 TIMOTHI 4 Bible Online

1 TIMOTHI 4 - Alladian bible

1 TIMOTHI 4

¹Aide berokrupe pobidung, méélam yépenamlo ayokon amie míngkengem mepak suyéku delokke yadna aidlo yémín geyé delokke uyu miru poyilkolo gíyé.

²Sikena luyil kídarde menam yadnamlok lenyé, buluke aapí míídude arem bangírnam kísape gudung.

³Bulu omum nyameng inamem akdung delokke aruem kénna delokke arope míína kídílokke yidgedola laarík supenam Shédíke pílen binam donam ayokonem domadope ngiitom laddung.

⁴Legade Shédíke pílennam mipíde aine, delokke yidgedola laamílo lupak penam kamang,

⁵kapeila dem Shédíke agomlok delokke kumnamlok deemo dungku.

⁶No sikesim noluke bírokídílo lengkan bimílo, no Jisu Kristokíng aipe yégebona amipe, aro míngkelo delokke noluke yébosunam aina luyillo siisayé.

⁷Aromana dooyingem delokke eejo mine lupuem mepaktoka, dempenem, agísue deena bedanglok yénom sulangka.

⁸Kapeila amíl gejiinamde anyongko are kadung idakkom deenampe nyogapla yénamde tabunglo are kayadung, de yébomdunam sokke pelang yépenam kepe pébi sunamem bomgapne.

⁹Si apíípe torík supenam aro agomko

¹⁰delokke sok legape ngolu ankípe ralbom sudung de idung, ngolu ngoluke míínam sunamem, turna Shédí bí tani takamem mosing bokuna, delokke apekrupe bím arue emla míína kídíke Ruutum kíng melíkdung.

¹¹Sikesim pogap lugap botoka.

¹²No koo dungada emla amiem kaalo kosu mapeka, idakla agom pokolo, yédu daktoklo, ayanglo, míngkelo delokke deenamlo míngkesuna kídí kepe kaayii sukepe itoka.

¹³Ngokke angkuma tetengem, no agíe ami keralo Dooying poribonamem, pogong lugong delokke luyil poyilem mínggap bomlangka.

¹⁴Mirokídíe lekope nokkíng buluke alag leelík bomnam, nom polu poor agomlok binam, amanem míísam mapeka.

¹⁵Mipile nok yéjiila yénamem kaasudope, no apíípe delo bilíksula, sim atí kídísim kén ge ige bolangka.

¹⁶Nokke yénamem delokke mííbom sunam ayonem kén gap igap langka. Sikesim bomgap igap langka, kapeila depe imílomin, no agíelang tatyana kídíe turyéne.