Read Alladian 2 TIMOTHI 1 Bible Online

2 TIMOTHI 1 - Alladian bible

2 TIMOTHI 1

¹Shédíke mínggílok Kristo Jisukelo duuna pébisunam turnamlok, Kristokelo tomlíknam amipe ina, Paul ngo,

²ngokke oo Timothikelo salame. Ngoluke Ruutum Kristo Jisu delokke Abu Shédíke yanggonge, yaasame delokke yéponame nokkíng duudak langka.

³Aapí si berokrupe longe yohpe nom ngokke kumkolo míípang ayarsunam, ngoluke buku kídíke inam kísape ngokke kumnam Shédíme ngo koyitdung.

⁴Nokke miksiem míípa suyém, ngokke aange apíídope, ngo nom kaalíngkue emla míítídung.

⁵Nokke neku Loi delokke nokke ane Eunik kíng duuna nokke míngkeng jégap namem ngo míípa sudungku. Ngo berokrupe míídung, supakkom de nokkíng dungada.

⁶Sok legalok nom popang bidungku, ngokke alage nokkíng leetan líknamlok Shédíke binam amanem nyokmo mape bomgap langka.

⁷Kapeila Shédí bí ngolum pesona aidem bimang, idakkom pauar kana, ayana delokke agíem mosiisuna aidemmin bidune.

⁸Dekepe iname ngoluke Ruutumke hakiipe ipenamem annyinge emla míímapeka, bíkkepe patek duuna ngomkom annying mapeka. Igeyéla, Shédíke pauarlok tatpona ngiitom legape ngom arééyém réébo sutoka.

⁹Bí ngolum turmo tungku delokke deenampe yénamlo ngolum tomlíktung de ngolu bím atíko ibito emmang idola bíkke agí míídulok delokke yanggolok ngolum mosing tungku. Sim yanggong sim lendak aadak kerango pekai Kristo Jisukíng bitung,

¹⁰idakkom ngoluke turmokuna Ruutum, Kristo Jisuke lengkan sukolok sim supak kaabeng motung. Bí sinamem petto delokke tatpona ngiitomlok turnam emlang siyi manamem angunlo langaa tungku.

¹¹Delokrongem sok ngiitom sok yégebonape, tomlíknam amipe delokke luyil bonape ngom melíktung.

¹²Dekepe ikolokmin ngo sikena adírem paadune. Depe idakkom ngo annyinge emla míímang, kapeila sékom ngo arope míísutodí ngo kénsudung, delokke ngom ingkuem biket tudí dem bí yéyin longe telope bomgap boyé emla kénsudung.

¹³No ingkuem ngokkelok tattodí, dem míngkelok, delokke Kristokíng ayanglok edíípe aina luyilem yilna dokupe bomgap langka.

¹⁴Ngolukíng duuna, Deena Aid pauarlok nokkíng bilíknam aina atí kídíem megap langka.

¹⁵Pugil melang Hermogenme lutaksula Asia amolo duuna mipíde ngom mepaksuto.

¹⁶Onesiporke ekum eranglo Ruutum bí yaasamem lengkan daklangka, kapeila bí leko leko essaape míímodung delokke ngokke patek duunamem annying gemang.

¹⁷Dem megeyéla, bíkke Romlo duudo delo, bí ankípe ngom paamang tetengem matíto.

¹⁸Delok longe delokke legape yaasamem bíkke Ruutum kelok paadak langka! Edítko Ephesolo bí ngom igulton dem peebepe nolu kénsudung.