Read Alladian 2 TIMOTHI 2 Bible Online

2 TIMOTHI 2 - Alladian bible

2 TIMOTHI 2

¹Ngokke oo no, demílo, Kristo Jisukelo duuna yanggolo edíí langka.

²Delokke takam tatkolo ngokke pogoo namem nokke tatnam atí kídíem luyil lana, ami arolo dekedem bilík langka.

³Kristoke aina sipaying kísape ngolukíng yényi daksuem dongge bosulangka.

⁴Agérlo miríína sipayide bíkke agíem hukum bina ruutumem ashé límodung delokke dekepe inade moomem ami yékollo soyél sumang.

⁵Deke kísa, iman saamanlo pakna dekom, bí niyomem kényin mamílo ikumnam amanem paamang.

⁶Aríklo miríí nade kera yalumpe ali ayém paapodung.

⁷Ngo ingkuem podudí míngíng kítoka, kapeila Ruutum bí nolum kénnamem biyé.

⁸Dabidke odong, Jisu Kristo, sikolokke gerep kaku dem kénsu langka. Simin ngokke pobinam tatpona Ngiitome.

⁹Ngo tatpona Ngiitom sim pogoodung, legade ngokke adírde delokke doppyoona kísape ngom pateklo menamde. Idakkom Shédíke agomem pateklok inyokmang.

¹⁰De lok legape ullennam kídí legape, buluteng turku namem paado kupe, depe emnamde angun ralnamlo duuna Kristo Jisume paado kupe ngo takamem yémgap gedung.

¹¹“Sina tatpenam aro agomko: ngolu bíkkíng simílo, ngolukom bíkkíng duumínyé.

¹²Ngolu donggap gemílo, ngolukom bíkkíng yémínyé. Ngolu bím tomamílo, bíkom ngolum tomayé.

¹³Ngolu míngkelo edíí madokom bí edíng ayardung kapeila bí agíem mepak sukanmang.”

¹⁴Nokke amikídíem sim atíkídí sim lupang ayar bolangka. Agom legape lumín sumapeka emla Shédíke keralo bulum lutoka; de atí are kamang, delokke tatna kídíem mínge tade sumodung.

¹⁵No agíe edítko paklayédí Shédíke kaabape agér gérnape, annying kamape agér inakope delokke Shédíke aro agomem deenampe bomna amipe lengkan sutoka.

¹⁶Deemang aamona delokke mide agomem mepaktoka, kapeila séko bulu delo erapdudí, bulu Shédí kelokke mooteng yayang idungku.

¹⁷Buluke luyilde tarí ríbyang kísape goobyakyé. Delok aralokke Humenoi delokke Philet bínyi idung.

¹⁸Bínyi arolokke gípek sudung. Bulu gerep kupename angka kubong emdung, delokke dekepe bulu ayokonke míngkengem nyokmo dungku.

¹⁹Idakkom Shédíke aro lerííde edíídung. Sikesim siilpe tupkettung. “Séko buludí bíkkepe idune, bí kénsudung”, delokke “Ruutumke amínem arue emla sikarna mipíde berokpe mirul agér lokke gílat sukupe aido.”

²⁰Bottena ekumlo atí sirieke kadung, uun delokke arem petommang, idakla esinge, kédeng peking eke kado; ayokonde amín kana agér legape delokke ayokonde moomem agér legape dung.

²¹Amide lutíl namsok agíem deenampe mesu kumílo, bím deemoyé delokke amín kana agér inana sérang kope iyé. Bím Ruutumke aina agér inanape meruusudung.

²²Yaamépe yédungem milí sodong aapí séguem meto kuka, delokke yéjii namem, míngkengem, ayangem delokke yéponamem mata langka, lekope Ruutumme aapí deenamlok rogunamem bomlangka.

²³Pétkí lukí sunam are kamana mide agom kídarem melangka, kapeila dekede lumín momín sumodung dem no kénsudung.

²⁴Delokke Ruutumke béérade lumín momín superung aimang; dem megeyéla, bí mipilem ayange emla mííperung aido, luyil lape aido, aksémpe aimang.

²⁵Séko bulu bím akdudí, bulum aiyope luyilla, aro kénnamlo gíbopena míílat sukunamem Shédí bí bulum biyé emla míínamsupe aido,

²⁶delokke delo bulu kénsuyéku delokke agí míngkampe imope emla uyu egum lokke duggeyéku.