Read Alladian HIBRU 1 Bible Online

HIBRU 1 - Alladian bible

HIBRU 1

¹Konnyi mennyingkai kaaluna miri kídí nappalok ngoluke buku kídílo agomem angu angupe potí líkyar dungai,

²idakkom siyum siroke longe kídíso bíkke Oolok ngolum agomem pobitung. Bímin Shédíke among talengem pílenkue delokke pílennam tabusim ruutum bomdope ullíkname.

³Oo si Shédíke angun ralnam asire delokke bíkke ralnam agomlok takamem umbomna, Shédíme gesune. Bí paabem deesu aasu dokupe bedangem mebi geyéla, teyo telo bottena Roja Shédíke lakbíklo dungkaku.

⁴Bí teyong kotoki empenem amíne botteyala bulum penem botteyape yéto.

⁵Kapeila Shédí bí teyong kotokiem séko meteng sikepe pomang: “Nomin ngokke Ue; silo ngo nokke Abupe ikai.” Demangkom sikepekom pomang: “Ngo bíkke Abupe ipe, delokke bí ngokke Oope iyé.”

⁶Idakkom tani gíídaso edílo Shédí bí bíkke Oo obíngem bomatodí, bí sikepe poto: “Shédíke teyong kotoki takame bím kumdak langka.”

⁷Teyong kotoki kídíem poyémdan bí sikepe poto: “Bí bíkke teyong kotoki kídíem asarpe imoto, bíkke béérang kídíem eme meyope imoto.”

⁸Idakkom Oolodan bí sikepe poto: “E Shédía! Nokke roja umkééde agínpe duuyarne, delokke yéjiinamde nokke banggénpe iyé.

⁹No yéjiinamem ayato delokke rulnem kangkito; delokke legape Shédí, nokke Shédí bí ashénam téllok nom nyoola nokke ajonkídí aralok ullento.”

¹⁰Bí sikepeteng poto: “Lendak delo, Ruutume, no among leríngem ríílento, delokke taleng telokke takamde nokke alaglok píname.

¹¹Bulu nyokyéku, idakkom nodan duuyé; bulu ege galuk kísape ínpakyé.

¹²No dekedem sotkya kísape kelsiyéku; delokke bulu angu anguyéku. Idakkom nodan akampe duuyé, delokke nokke dítage nyokyimayé.”

¹³Shédí bí bíkke teyong kotoki kídíem sékometeng, sikepe pomang, “Nokke miruem nokke ale rumkílo mekuma tetengem, ngokke lakbík danlo duutola.”

¹⁴Demílo teyong kotoki kídíde ingkuedí? Bulu Shédíme kumna aid mílíe delokke turkupena kídíem igulpena bíkke melíknam kídíe.