Read Alladian HIBRU 12 Bible Online

HIBRU 12 - Alladian bible

HIBRU 12

¹Delok legape, ngolu kepedan, ngoluke lamku keralo deddína hakii mílíe dung. Demílo ngolu ngolum itumna atí takamem, delokke ngolum yétgapla duubomna paabem mepak laju, delokke ngoluke keralo duuna ngoluke dukkí supenamem mínggap bomlaju.

²Ngoluke amige, ngoluke míngkengem apíímona leríng, ashéngem keralo mebinam krosslo yémgap gena, annyingem donggena, delokke Shédíke lakbík umkélo dungkuna, Jisukíng kanggap laju.

³Bí kape kísa yéton dem míngkítoka; edítko paabna amikídí irééyém bí donggetone! Dekepe iname noluke aapí ainange mínggo míínyola delokke elu mapeka.

⁴Noluke paabem imín sukolo yilíng bídma roríngada.

⁵Delokke nolum Shédíke oope míísudola luír poír namem nolu mitpan sutoku. Bí sikepe potuai: “Ngokke ua, Ruutumke ijon namem mínggap langka, delokke edílo bí luyédí nokke ainange buumapeka,

⁶kapeila Ruutumke ayang namem bí ijondung. Delokke bíkke oope tonam mipíem bí ingéédung.”

⁷Yényi yésuem terníng kísape míídola yémgap langka: Shédí bí nolum oo kísape idung. Legade séko abue agí uem lumanako kadun?

⁸Mipile ngiitom luyilem paadung iname, nolu ngiitom luyil manampe idumílo, nolu demílo doom eke delokke oo aro mangeke.

⁹Delok teyolote ngolum ijon saajonna tani abue kasudung delok legape ngolu bulum mínggedung. Dekemílo ngoluk aidke Abuem edítko dempenem pagyape donggela yépe aiyéne.

¹⁰Ngoluke tani abukídíe buluke mííbape anyongo legape lusii mosiinape díídu modung; idakkom Shédíke ngolum díínam monamde ngoluke aipenam legape, bíkke deenam tarongem paamín gedope emla iname.

¹¹Irít morítla idolo ngolu ashémape buulínge ido. Méélam lodan depe idokom, míímosuna amikídí kepe yéjing aliem gaddoku delokke yépo ayém píldoku.

¹²Delok legape noluke mekem lakpongem delokke miin lebíngem remmo sutokuka.

¹³Lebaane lebaa madokupe; “Noluke ale bedangem ijon sulangka.”

¹⁴Edítko paklayédí ami takamem yépope yébosupe delokke deenampe yépe emla rallangka; deenamlok imamílo sékoteng Ruutumme paalamang.

¹⁵Sékoteng Shédíke yanggongem menyok madope delokke ebín lenna delokke takamem bulmona ramki appírem pírlen momadope kanggap langka.

¹⁶Sékoteng abír ajon imadope, demangkom dorum atellok bíkke ruutum yége nana obíng tarongem kosuna nyogap mana Esau kísape imadope kanggap bomlangka.

¹⁷Nolu kéndung, méélam dem, edílo bí ruutumem yégedope lubéé kosupe míítuadí; delo bím lupakto; legade bí ada tayia emla miksi bíttokom angukonpe ipeko bedang kayimang.

¹⁸Nolu Israel ami kísape, Sinai díítelo eme dorkolo, ruruge buying ila gumkolo

¹⁹Bikul tapung rímdudem delokke bottepe ngomdudem anpaanam kísa imang. Edílo ami kídíe agomem tattodí, bulu lekoyang tatku madope roguto,

²⁰kapeila bulu sikepe hukum binam agomem doolang geyimang. “Simonkone dííte sim tunak yékom bím gepetpe aido.”

²¹Ai-asang dem kaaname pesorunge ikaane, Mosikom, “Ngo pesuem dan gedung” emla pobomsukai.

²²Idakkom noludan turna Shédíke bottena doolung dungko, teyong Jirusalem, Jayon díítelo aato. Nolu ashérupe duuna éjar teyong kotoki duupomlo,

²³teyong amolo amínem atlíknam obíyalum mondolilo aato. Takam amiem bisarna, aidlok yéjiina amikídíem apíí mokuna, Shédíkíng nolu aato.

²⁴Nolu aní daapongem pobona Jisukíng delokke Abelke iyyiem aiyape pobina iyyi kuujéng namlo aato.

²⁵Demílo kénsu langka, agom pobina bíkke agomem tatmape imang pelangka. Séko bulu amoso teyong agomem pobinamem tatmape itodí, bulu dugge peko kamang. Teyong telokke agomem pobina amiem tatbi mamílo, ngolurange dugge pekoyang kamang!

²⁶Dekepe idodelo bíkke agome among talengem ngento, idakkom supak bí sikepe pésutung, “Lekoda ngo among petom emmang idakla talengemkom ngenyé.”

²⁷“Lekoda ngo” emnam agomde pílennam atí kídíem ngenyé delokke laapakyé emnamem jonnampe lengkandung, delokke delo ngenla maname duuyé.

²⁸Delok legape ngolu ngenla manam amongem paatu bonade, yidgelaju, delokke míngke sudola delokke pesodola kaabape Shédíme kumlaju,

²⁹kapeila ngoluke Shédí bí gunyokna eme.