Read Alladian HIBRU 13 Bible Online

HIBRU 13 - Alladian bible

HIBRU 13

¹Akone akonem ayabosu ayar langka.

²Mibuem aipe toríksupe namem mitpan sumapeka. Ayokone dekepe mibuem torík sukolok teyong kotoki kídí emteng torík supato.

³Pateklo duuna kídíem, nolu delo duubo suduna kísape, delokke iréénam kídíem, nolu agíe aréé bosuna kísape míípang sulangka.

⁴Omum nyameng inamde takamke míngge pename. Mime milode akone akonem míídíng bosupe aido. Mime milo belum bekam agér inem delokke abír ajon inem Shédí bí bisar yéku.

⁵Panggang dogang mílílo míítí mapeka, delokke nolu ingkuem paadudí delo ashépe míírísula yélangka kapeila Shédí bí sikepe pobitung, “Edílokom nom ngo mepakmayé, edílokom nom ngo melutmayé.”

⁶Demílo miramdola ngolu sikepe polaju, “Ruutum bí ngom igulne; ngo pesomayé. Tanie ngom ingkoko ilayén?”

⁷Shédíke agomem nolum pobina yébona ruutum kídíem kénsu langka. Buluke yéname kape idudí dem ankí langka, delokke buluke míngkengem kangge sulangka.

⁸Jisu Kristo bí melokom, silokom delokke yépenam lokom akame.

⁹Angu angu tatkí manam luyillok nolu bedang lokke angupe imapeka. Ngoluke aange ipak saamo gíídí siipe donam tíínam ayonlok imape yanggolo edíípe aido; séko bulu dem ayondem erbomdudí, bulu delokke igul paamang.

¹⁰Judaikídí lokke kumsuko amolo kumbona miri kídíde kumko baarilo sobo palíknam atíem donyo dungai.

¹¹Miri rínede simon iyyiem Deena yalum amolo paab ipakpe bomado, idakkom agíem notko delokke luyulo rompakdo.

¹²Delokke deke akampe Jisukom bottena doolung luyulo agí iyyilok ami kídíem deemo dokupe emla nyoklík geto.

¹³Demílo, bíkkíng notko luyulo, bíkke annying tarongem gebo sulaju.

¹⁴Kapeila ngolu so amoso dungkí peko doolung kamang, idakkom angkupenam doolung emmin kaatí subomdune.

¹⁵Delok legape, kaju demílo, Jisukelok Shédíme koyit amanem biyar laju depe emnamde nabbéllok Ruutume emla ponbeng sunam ayém éngge laju.

¹⁶Aina agér gérpenam delokke igul bosunamem mitpan sumapeka, dekepe orsunam demin Shédíme ashé modune.

¹⁷Noluke yégebona kídíem delokke bulum yébona ruutumem míngge sulangka. Bulu nolum kaabomne, bulu buluke agér inamem Shédíme lukan subiyéku. Nolu bulum míngge mílomin, bulu buluke agérem ashépe igeyéne; nolu míngge mamílo, bulu buulínge idakla agérem géryé, delokke de nolukepe aimayé.

¹⁸Ngoluke legape kumyar bitoka. Ngoluke berokna aapíe kadurung emla ngolu míísudung kapeila ngolu yénam takamlo aina atíem ilíídung.

¹⁹Ngo agírunge, nolukíng menape yébo sudokupe kumlangka emla nolum ngo pogapdung.

²⁰Bottena mér sobén kaabomna, Ruutum Jisume sinamlokke turyarna daaponglo iyyilok langaang kuna, yépo mona Shédí bí,

²¹bíkke mínggíngem inadope aina agér legape takam, delokke Jisu Kristo kelok ingkuem bí mííba dudí, dem agérdem ngoluke gooralo bí idak langka. Kristokíng angun ralname yépenam takamlope duuyar daklangka. Amen.

²²Bíro kídía, sim ngokke luír poírnam ngiitom sim nolu tatgap langka, legade ngo nolum sithiem andengo pemin atbitone.

²³Ngoluke bíro Timothime pateklok melentoku emnamdem nolum ngo kénmope míídung. Bí menape píídakku, ngo bím gíbosula nolum kaape emla aayéku.

²⁴Nolum yébona takam delokke Shédíke ami takamem salamem bilangka. Itali lokke kídíe buluke salamem melíkdung.

²⁵Nolu takamkíng yanggonge duudak langka.