Read Alladian HIBRU 2 Bible Online

HIBRU 2 - Alladian bible

HIBRU 2

¹Delok legape ngolu ngéélat kumadope, ingkuem ngolu tattodí ngolu ralbompe aido.

²Legade teyong kotokike agomde arodumílo, delokke ipéé sunam delokke beleng gemang kolok paaba sunam ingééyém paatumílo,

³kape kísa ngolu turku penamem aro míímadula, ingéé pekolokke duknyok gelayéne? Ruutumke kerapekai pokan bitonam turkupeko sim bíkke agomem tatna kídílok aruem lengkan bito.

⁴Shédíkom angu iyodlok delokke irisinyo iyodlok aruem lengkan bito delokke deena Aid amanlok bíkke mínggípe dem orlíkto.

⁵Ngoluke pobom dunam, angkupena amosi teyong kotoki alag lomang.

⁶Idakkom amikone Dooyinglo lubinam amongko delo kadung: “Shédía, nokke míítí bomnam tanide ingkokone, de tanike ue ilate no bím ankí bomdunía?

⁷Teyong kotoki kídíem anyongko rumkí yadope[1] no bím píto; no bím angun ralnam delokke bottena amín dumlubem luplíkto,

⁸delokke bíkke ale rumkílo, atí takamem meto.” Shédí bí takam atíem ruutum bomdope taniem píto, emnamde berokpe bí atí tabungem lutak sudung. Depe idokom yéduso atí takame bíkke gooralo duudope ngolu kaapa mangada.

⁹Idakkom teyong kotoki kídíem anyongoko amé yadope pínam, supak amín botte nemlang angun ralnam dumlubem lublíknam Jisume ngolu kaadung kapeila Shédíke yanggolok bí mipil legape sinamem kénpe emla bí sigeto.

¹⁰Takamem pílenna delokke kaabomna Shédí kepe, Jisume aropak atung aréélok, oo alungem bojéko angun ralnamlo langaadope emla inamde ijiidung.

¹¹Taniem deemokuna delang deedope píkunam kídíde erang atele. Delok legape Jisu bí bulum bírue emnam em annyimang.

¹²Bí Shédíme podung, “Ngo nokke amínem ngokke bíro kídílo lukanboyé. Duusum keralo nom yidgenam miriem rínggeyé.”

¹³Delok rongemteng, “Ngo bíkkíng ngokke edíngem díílíkyé.” Bí sikepekom podo: “Sina ngo, delokke Shédíke ngom binam kookídíe.”

¹⁴Koo kídíe adín delokke iyyilok lenna tanipe iname, Jisukom bulu kísape imín geto. Bíkke depe inamde, sinamem yébomna uyuem bíkke sige kolok petpak dokupe emla bí sim ito,

¹⁵delokke agí turnamem, sinamem pesokolok abílpe mesuna kídíem dorpít dokupe iname.

¹⁶Kapeila berokpe bíkke igulde teyong kotokiem imang, idokom Abrahamke otíng oyin kídí emmin bí igultone.

¹⁷Delok legape atí takamlo bík bíro kísa idope píto. Shédíke legape agér gérkolo, yaasamna delokke arona miri rínepe idopekom píto. Delokke tani kídílokke paab[2] emte sigebila repít dope píto.

¹⁸Kapeila bím ikaa darkaaduem, bí adír gename, ikaa darkaanam kídíem bí igul ladung.