Read Alladian HIBRU 4 Bible Online

HIBRU 4 - Alladian bible

HIBRU 4

¹Delok legape, bíkke duuno supeko amolo aadíe dunga danade, nolu sékote delo pííram mínna kamadope emla ngolu ansu kénsulaju.

²Legade, buluke inam kísape, ngolukom ngolukíng pobitonam tatpona dooying ngiitome kadung; idakkom buluke tatnam ngiitom dooying de bulukepe are kamanako, kapeila séko bulu tattodí dem bulu míngke sutomang.[4]

³Supak arope míína ngolu, Shédíke bipe emla pébisunam amongem paadung. Si Shédíke ponam kísapakpe idung, “Dekepe ila marlílokke ngo lubeng bito: ‘Bulu edílote ngokke dungkolo aalamayé.’ ” Bíkke asi amongem pílangala pírongem bí sim agom sim poto.

⁴Kapeila regokonlo Longe kínít legangem podola bí sikepe poto, “Delokrongem Shédí bí longe kínít nanalo bíkke agér takam lokke duuno sutoku.”

⁵Lekoda sim agom sim podola bí lukai, “Bulu edílokom ngokke duuno suko amolo aalamayé.”

⁶Kerape tatpona Ngiitomem tatna kídíe duuno supekuem píímang, kapeila bulu arope míngke sutomang. Demílo, delo aala mopenam abíd amie kekom kadungada.

⁷Delok legape Shédí bí Silo emla apekrupe longeko mebitung. Deddína dítag méélam pekai Dooying kitablo bí sim Dabidke nappalok sikepe pomoto; “Nolu Shédíke agomem silo taddumílo aapí angkam gemapeka.”

⁸Legade Joshua bí amikídíem duuno supeko bituamílo, Shédí bí méélam delo longe konko emnam agomem pomayai.

⁹Demílo delo Shédíke amikídí kepe duuno supeko Sabbath emnam longeko dungkai;

¹⁰legade séko duuno supekolo aadudí bulu Shédíke kísape agér ipenamem mepala duuno sudoku.

¹¹Delok legape, buluke míngkeng pííramlok olat kunamem sékote kaayil sumape, kaju ngolu delo duuno supeko amodelo píípe emla raltí bomlaju.

¹²Kapeila Shédíke agomde turne delokke berééne, yogí yogarpe aar kana yoksemteng ratyane. Si aange lang aide tuprík sukolok delokke along elang adíne tupsut sukolok payyarne; aapí ainang lokke mííyi míísangem kaayin kényinne.

¹³Shédíke pínam kídí takamde Shédíke keralokke rusi gepeko kamang. Tabungem kaabedung. Ngoluke legangem bíkke keralo takam si lengkan suyéku.

¹⁴Delok legape, Shédíke agí kerang paklo gíkaana,[5] miri ríne, Shédíke Oo Jisu bí ngolukepe idunade, ngoluke yébomsunam míngkengem edíípe ngolu bomgap laju.

¹⁵Ngoluke miri rínede ngoluke píímang ralmang kuem igulmana amipe imang. Dempenem, ngoluke miri rínede ngolu kísape takam bedalo ikang darkang kosune idola paab imane.

¹⁶Demílo, ngolu kaju míídíísudakla yanggong umkélo rogulaju, delomin ngolu yaasamem delokke ngoluke pííram duem ngolum igulpena yanggongem paayéne.