Read Alladian HIBRU 5 Bible Online

HIBRU 5 - Alladian bible

HIBRU 5

¹Miri ríne mipíem tanilok ullendung delokke Shédíme kumgalo amanem bibodope delokke paab legape sobo panamem bige bodope melíktung.

²Atí kénmana kídíem delokke gínyoknem remagoope ibo suladung, kapeila bí agí eteng ralmangko gooralo dung.

³Dekepe ila bí paab legape delokke tani kídíke paab legape agíem binyoksuto.

⁴Sékoteng míngge penam sim agísulo laalík sumang. Aaronme inam kísape bí Shédíke tomlennam amipe iperung aido.

⁵Dekepe Kristokom miri rínepe ila nana angun ralnamem agísue paasumang. Idakla Shédí bí sikepe poto: “No ngokke Ue; silo ngo nokke Abupe ikai.”

⁶Delokrongem bí rego konlo sikepe poto: “Melkijedekke idolok, no miripe iyarne.”

⁷Jisu bí tani amoso yédungem kumto delokke kabbom sudola roguto delokke bím sinam lokke mopít kuna bíkkíng miksiem dílíkto, delokke bím tatbito kapeila bí pesodola roguto.

⁸Bí Shédíke Oope ilate, bíkke agomem tatbila aréé anyogeto.

⁹Bím apíídope irongkuem, bím beleng gena kídí takam kepe bí turyar peko lerípe ikaku.

¹⁰Delo Melkijedekke yéyonlok Shédí bí bím miri rínepe imotoku.

¹¹Ngolu bojépe sok legangem popename kadungai igeyéla noluke tatpat lamanam legape pomík binyiidung.

¹²Arolok luyém supak nolu luyil bopenape idungai, idakkom akonem Shédíke agom aro leríngem luyil kosutípe aikai. Nolu tolna apim dopoo mape anyunlok tíípo langka;

¹³séko bulu pimsilok dola demangkom anyunlok tííla, ojiipe idung adadí bulu yéjiinam legangem luyilem aipe kénpímang.

¹⁴Idakkom tolna apimde kénbeesuna kídíke, ayi aimangem terníng ila kénpan sunamem ralbomla yéna buluke.