Read Alladian HIBRU 6 Bible Online

HIBRU 6 - Alladian bible

HIBRU 6

¹Demílo, ngolu kerangke eerímana Kristan ngiitom petomlok míírísula duumape, nyokpeko agér lokke bursu langkula Shédíme míngke petom sunam,

²baptis legangem poyilnam, alag leetannam, sikolokke gerep kunam, delokke bisar iyar penam legang takamem míírísula duumape, eeríyana ngiitomlo gílaju.

³Shédí bí tolíkmílo, demin ngoluke ipename.

⁴Legade míngkengem mepakkuna kídíem kape kísa lekoda bursu dokupe langaang yékune? Bulu longeko Shédíke angunlo yéto; teyong lokke amanem pangkí tobong delokke Deena Aid aman tarongem pangkí tobong;

⁵Shédíke agome aronako emnamdem bulu kénsu kaasu tubong delokke yépenamlo pauare pííyé emla bulu ankénsuto.

⁶Dekepe igeyéla bulu buluke míngkengem mepak sutoku! Dekepe ina bulum lekoda bursu yékupe emla langaang langkumang; kapeila[6] bulu lennyinape Shédíke Uem bosi takam kangkolo pansang sudungku.

⁷Arík ina amikepe agérlo aana pedong olíkkolo pedong asilok tííla neyi neyang garsangko kédeng de Shédíke agam biname.

⁸Idakkom taanyum tatké garlenko amode atí are kamang delokke de Shédíke pélík penam amonge, yéyin longelo de rompak pename.

⁹Ngolu depe podungkom, ayanam angong kídía, nolumdan ngo berokdung. Noluke turku kolo pakyana Agome nolukelo dung emla ngolu kéndung.

¹⁰Shédí bí tetene; bí noluke agérem delokke nolu bíkke amiem igulla bím ayangem lengkansula delokke igul ayar namem bí mitpan sumang.

¹¹Ngoluke míínam subom namde berokdope yéyinlope sim mínggap namsim nolu lengkan boyar yépe emla ngolu míídung.

¹²Ngolu nolum ríkso yépe emla míímang, idakla míngkelok delokke yémgaplok pébi sunamem paanem kangge sudope emlamin míídune.

¹³Edílo Shédí bí Abrahamkíng porung subitodí, bí bíkke poruu subinamem ibipe emla pésuto. Bím agíem botteyana kamang kolok bí agí agíe pésuto.

¹⁴Bí sikepe poto, “Ngo nom berokrupe lubéé líkyé delokke otíng oyinem bojépe lenmoyé.”

¹⁵Delokrongem yémgapla toyaname bí pébisunamem paato.

¹⁶Tanie agíem botteyana akonlo pébisudo delokke pébi suduem ingkuem potodí dem aromodo delokke delo akkí lukí penamyang kayimang.

¹⁷Bíkke pébi sunamem paapena kídílo, poruu subiko teyolote pébi sudope bíkke mííbom namem edílokom angupe ikumayé emnamdem Shédí bí berok bilídung.

¹⁸Delo, demílo, agom annyiko kadung, angupe ilamang emnam kolang delokke Shédí bí melamang emnamko kadung. Dekepe iname bíkke ekerna ngolum ngoluke keralo míínam sunamem mebinam sim edíírupe bomgap dope emla botterupe ngolum ermodo.

¹⁹Sim ngoluke míínam sunam sim aidlokke dungkepe, edíírupe bomgap pekope delokke turkepe ngolu bomdung. Si teyong kumkeng ekum lokke líísiklope píídung.

²⁰Ngoluke adumpe, ngoluke kerang pekai Jisu bí delo aradelo angge tobong, delokke agínpe Melkijedekke adulok bí ngoluke miri bottenape iyar gekai.