Read Alladian HIBRU 8 Bible Online

HIBRU 8 - Alladian bible

HIBRU 8

¹Ngoluke pobom sunam si simoko: Teyong telo Roja umké lakbík danlo dungkuna ngoluke miri ríneko kadung.

²Bí Deeya yalumna amolo miri rínepe idung, de tanike imanam, Ruutumke ilíknam notko arolo idung.

³Miri ríne takamdem Shédíkelo aman bidola delokke sobo palík bodope emla melíkdung, delokke dekepe ngoluke miri ríne dekom atíko biman superung aikai.

⁴Bí tani amoso duutuamílo, miripe imayai, kapeila so ayonke pobinam aman bina tanie kadubong.

⁵Buluke miripe inamde aropakpe kanggesula iname delokke teyong telokke abír ayo goorange. Mosikom deke nakuai. Edílo notkuem mopepak itodí delo Shédí bí bím “Berokrupe kénsu langka, nokke inam takamde díítelo nom lengkan bitonam adu paklok iperung aido.”

⁶Idakkom supak Jisume miri agér binamde abíd kempemílo botteyane, de Shédí kelang delokke bíkke amilo ibosunam aiyana daapong kísape dung, kapeila si aiyana atíem bipe emla pébi sunamlok lerínge idung.

⁷Legade kerangke daapode bulmang amílo, anípe daapong ikupenam kamangai.

⁸Idakkom Shédí bí tanikídí bulnamem kaala sikepe poto,[8] “Israel opín kídí lolang delokke Judahke erang kídílo, ngokke aní daapongem ibosudi, moodíe píídubong emla Ruutum bí podung.

⁹Si Daapong si ngokke buluke buku kídílo ibosutonam daapong kísamayé ngokke bulum alaglok gaklen langkula delokke Ijipt lok gílendoku kísamang. Ngokke bulukíng daapong mosunamlo bulu míngke sutomang, delokke dekepe ila ngo bulum ankímang.

¹⁰Supak simin ngokke bulum ipenam daaponge; Israel ami kídíem ibo supename aapena longelo, emla Ruutum bí podung. Ngokke ayonem buluke aapílo líkyé delokke dem buluke aapí ainalo atlíkyé. Ngo buluke Shédípe iyé, delokke bulu ngokke amipe iyé.

¹¹Bulu akone akonem poyil luyil penam kayimayé demangkom akone bíkke doolung kídíem ‘Ruutumme kénlangka’ empenam kayimang, kapeila améyalumna lokke ilangala botte yalumna loope, bulu takam ngom kényé.

¹²Legade ngo buluke atímangem maabyé delokke buluke imemnam tabungem ayala santí biyimayé.”

¹³Aní daapongem lulangala, Shédí bí kerangke daapongem akumoto; delokke akupe ina atíde menape nyokyéku.