Read Alladian HIBRU 9 Bible Online

HIBRU 9 - Alladian bible

HIBRU 9

¹Kerang daapode kumsunam niyom kadungai delokke kumsu sukepe tanie monam kumkeng ekume kadung.

²Kumkeng ekumko gomgé pírpansula, aatak gomgélo meru eme nyotla Shédíme binam ettíng mekeng tébulem metungai, dem Deena gomgé emdungai.

³Arayangke gomgéde deeya yalumkue.

⁴Delo uunlok inam namnguna merue dung delokke uunlok mokapnam daapong sonduge delokke tangut alang kana uun aapéyé, amum saana Aaronke banggéne, delokke míngge penam daapongem atkeng líítam annyide dung.

⁵Sonduk teyong delo alap gena mimange Shédíke adumpe duune, alabe taayar bomla dung, de paabem maab kupekue. Idakkom ngolu sok legangem supak pomík bilamang.

⁶Edílo tabungem sikepe leemotodi, delo miri kídíde buluke agérem ipe emla aatak gomgédelo aadung.

⁷Idola miri ríne petome arayangke gomgédelo dítaglo letelko aadung. Kénmalok ami kídíke paab imem sunam legang pelang bíkke agí kepe bí iyyiem bomala delo aadung.

⁸Deena Aide sok leemo takamsok pobitung, aatak gomgéde duudung tetedem Deeya yalumko among bedangem siyya bimang.

⁹Si yéduunam moodíso kaayil sukenge, depe emnamde amanem delokke sobo tarongem bitokom de petom tanike kumsu línana aapí ainangem berok bimang.

¹⁰Dekepe de donam tíínam petome delokke abíd abíd adeng ape pídéé petomeke, aní ayon angku manga dape teyong peelok inam ayon agéreke.

¹¹Idakkom Kristo bí so kasuna[9] aina atíkídí legape miri rínepe aatobong. Bíkke kumko notkode botteyane delokke aroyane; si tani pínam notkomang, depe emnamde tani amoso pílennam notko konmang.

¹²Bí sobén delokke ruo iyyilok aabommang; idakla bí agí iyyiem bisula, dorpít berok dolangkula, Deena yalum gomgé delo takam legape anggebito.

¹³Sobén kídí delokke ruokídí iyyiem delokke romjitnam ruolokke mepiem deemang aamona ami kídílo kungkat dungai, delokke de bulum deemang aamo lokke pídéé dungkuai.

¹⁴Si aruemílo, edítko Kristoke iyyilok pakyape iton! Duuyarna Aidlok bí agíem Shédíkíng sobo arope bisuto. Bíkke iyyie, ngolum turna Shédíme kumdope, emmumna pídéé agérlokke ngoluke aapí ainangem arbínyéku.

¹⁵Sok legalok Kristomin aní daapongem remmonade, depe emnamde Shédíke tomlennam amikídíe Shédíke pébisutonam turyarna ruutum doge penamem paadope emla iname. Sim ilanam legade kapeila kerangke daaponge turdung adape, ami kídíem buluke imem agér lokke mopít dokupe sibiname kato.

¹⁶Aapí míísang legangem luyém[10] sim míílenna lokke sigangem lengkan bipe aidung;

¹⁷kapeila akone simílomin de míísade turdune; dem míílenna ami delokke duudung tetedem de edílokom agérlo aamang.

¹⁸Dekepe ilamin kerang daapode iyyilok ina mangem agérlo aamane.

¹⁹Kerayalumpe Mosi bí ayonlokke ngiitom mipíem ami kídílo luboto. Delokrongem bí gooru delokke sobén kídílokke iyyiem asilok píel supala delokke dem ayon kitablo delokke ami kídílo aríkana esing anne delokke yalína mujalok kungkatto.

²⁰Bí pokai, “Simin Shédíke nolum bomgap langka emla ponam daapong iyyie.”

²¹Deke pakpe bí kumkeng notko delolang kumsu nana atí takamlo iyyiem kuujéto.

²²Arope ayonlok luyém, takam atíem iyyilok pídéésupe aido delokke yilí bídmape maabpeko kamang.

²³Teyong telok inamem kaabomdola iyon sunam atí kídíemkom pídéépe aikai. Dempemílo telok aro atí kídíem bojéyape pídéépe aidung.

²⁴Kapeila Kristo bí tani onam deena notkolo aamang de arope duunalok kaala inam petom emin. Bí teyong among arolo angkai. Supak Shédíke keralo ngoluke legape bí dunggebidung.

²⁵Judai kídíke miri ríne Deenayalum Amodelo dítag mipíke simon iyyiem bomla aado. Idakkom Kristo bí agísuem lennyi lengum bisukape emla teyong amolok aamang.

²⁶Demamílo, Kristo bí tani amongem pídak delokke ila deddíko anngéésuyai. Idakkom supak agíem binyok sukolok paabem mobín dokupe emla yéyindanlo aarum letellok aato.

²⁷Tanie leko sidoku, delokrongem bisarkolo dakyéku.

²⁸Deke kísape takamke paabem gebipe emla leko aato. Bí lennyinape lekoda aayéku, idakkom de paab legapemang, idola bím toyala duuna kídíem mosing kakupe emlamin aayékune.