Read Alladian JEMS 1 Bible Online

JEMS 1 - Alladian bible

JEMS 1

¹Shédí kelang Ruutum Jisuke pakbo Jemske rego takamlo duuna Shédíke ami íying kolang annyi opéélo salame.

²Ngokke bíro kídía nolum atí ikang darkaanam kayémílo de berokrupe ashéng pename emla míísu langka,

³kapeila noluke míngkengem ikaanamde nolum yémgap gemodung dem nolu kénsudung.

⁴Yémge namde berokrupe nolum peebemola atí pííram momadope apíí modung.

⁵Nolu akone kénnamlo pííram dumílo, imemem sanbimape takamem bidarna Shédíkíng bí kope aido, delo bí dem biyé.

⁶Idakkom bíkke koyém bí mííne míngo kamape, arorupe míídola kope aido, kapeila séko mííne míngo dudí siyéng asilo asare nudung nutokna sipyar kísadung.

⁷De amide Ruutumkíng atí siri paayé emla míngkí mangkom aiyé.

⁸Bí aapí annyi gene, bíkke inam agér takamlo mínggap mane.

⁹Kristan opande opan dokom kedon yalumkolo dung emla mííyum supe aido,

¹⁰delokke mirem nadekom Shédíke rumkílo mekunam dem ashépe míísupe aido kapeila miremde siipun kísape dílpak kupene.

¹¹Doonyie saayém baaléyé delo appunde dílpakla delokke kampobone nyokpak dungku. Deke kísape mirem dekom bíkke agérlo nyoktak suyéku.

¹²Séko amie ikangkolo míngkelok donggap gedudí bí gérne, kapeila edílo bí ikangkolo dakdudí delo Shédíke bím ayana kídí kepe pérung subinam turnam dumlubem paayé.

¹³Ikang darkangko kayém sékokom “Shédí bí ngom ikaadung” empe aimang. Kapeila Shédíme atímane ikang lamang delokke bíte sékomete ikaamang,

¹⁴idola mipilem ikaa namsi bíkke kaabonam aapí lokmin imodune.

¹⁵Delokrongem bíkke kaabode duurongem, edílo paabde yémín geyédí de sipekolo gímodung.

¹⁶Ngokke bíro kídía yadko sumapeka.

¹⁷Aina atí takam delokke aropak amande teyong telok kemino, ukyum kísa dage dakkur mape edíína teyong angun lokke Abu lokmin tokdune.

¹⁸Bíkke pínam aralokke ngolu obíng yalumpe idope bíkke aro agom, míísang sulok ngolum turdokupe ullentungku.

¹⁹Bíro kídía! Sim mínggap gelangka, mipile laganpe tatgap gepe aido idakkom agomem lenmope aimang, delokke mení menang marsémpe aimang,

²⁰kapeila tanike marlínge Shédíke mííbanam atíem langaamang.

²¹Delok legape pemek solekna aapíem delokke airumana atíem mepak sugeyéla, nolukelo binam nolum mosing kupena agomem aiyope torík sutoka.

²²Agom petom sim tatla agíem yatsu mapeka. Si ingkuem podudí dem igetoka.

²³Séko bí agomem taddung idakkom ingkuem podudí dem igemang idudí bí arsilo agí mingmuem kaasu geyéla

²⁴delokke bí agíe kaasurongem gídak langkula bí kaasuname kape kísadudí dem menang asak kénsu yimana ami kísadung.

²⁵Idakkom séko bí ingkuem tattodí dem mitpan sumape, sadín bina aropakna ayonem mabomla, delokke matí teteng bomla igedudí de amide Shédíke ayangem paayé.

²⁶Séko agíem dormo amiko emla míísudola, agí ayuem ségappe motum sumadudí bí agísuem yadsudung delokke bíkke dormode are kamang.

²⁷Ngoluke Abu Shédíke tonam, imem kamana aropak dormode si: opan kuem delokke meyéng kídíem buluke arééduem kanggul igul namde delokke agísuem tani adín yénam lokke mosing sunamde.