Read Alladian JEMS 2 Bible Online

JEMS 2 - Alladian bible

JEMS 2

¹Ngokke bíro kídía, ngoluke Ruutum Jisuke angun ralnamlo míngkesuna kídare, míngu míírang aapíem lengkan sumapeka.

²Amiko uun lakkab gela delokke kampona ege galukko gela noluke kebalo aado, delokke opan amiko ínpék ínsokna ege galuk genakote aado emmílo;

³demílo nolu aina ege galuk genadem apekrupe anbomdola, “Sina nokkepe aina umkéko” emto, idakkom opan amidem, “No elo dakto langka demangkom ngokke ale ampeng amoso duutola”

⁴emmílo, nolu noluke aralo ingu sirang sula delokke atímana aapílok bisar imanía?

⁵Ngokke bíro kídía, tatgaptola: Tani yékorlokke opanna kídíem, míngkelo miremdope delokke bím ayana kídídem bíkke pébisunam teyong amongem yége dokupe Shédí bí bulum ullen manía?

⁶Idakkom nolu opanem ipusiléé tonamino. Nolum ipusilumna kídar si mirem mangekía? Bulumin nolum bisarko ekumlo holíkne dem kénsu manía?

⁷Nolum bitonam aina amínem bulu atímape lugene nolu dem kénsu manía?

⁸Nolu arope dooyinglo paanam, “Nokke donggongem agíke kísape ayang bosulangka” emnam roja ayonem bomdumílo nolu ainem idung.

⁹Idakkom nolu míngu míírang aapíem lengkan dumílo, nolu paab idung delokke ayone nolum ayonem ipatsune emla géédung.

¹⁰Kapeila séko amie tabung ayonem bomdung idola legang atelkolok tupsu dudí bí ayonem ipéé sunam imemlo doodung.

¹¹Legade, bí atelei, “Méng demangkom milo kasudola, ami ketbo sumapeka” emne delokke “ami petmapeka” emna dekom bímino. Nolu ami méng demangkom milo ketbo sumangkom ami petdumílo, nolu ayonem betnape ikai.

¹²Sadín bina ayonlok bisar ibomnam ami kísape ipe aido,

¹³kapeila yaasam kamana amiem yaasam kamape bisar iyéku. Yaasamde bisar emte ikumne.

¹⁴Bíro kídía, amikone míngkenge kadung idokom agér kamang, de ingkona ainamedí? Sikena míngkede bím mosii ladudí?

¹⁵Bírokon demangkom bírme kone ege galuk gepenam kamape delokke loodíke dopenam kamang imílo,

¹⁶“Gíka langku, nom aiyékupe míílíkdung; dopang gepaala yélangka,” emdola, bíkke tíílíng kenuem kénbi mape inamde, ingkona aiyédí?

¹⁷Deke kísape míngke dekom agér katak sumamílo sina kísadung.

¹⁸Idakkom akone, “No míngkeng kadung, delokke ngodan agérlok idung” emyépe. Ngom nokke ige manam míngkengem lengkantola delokke ngodan ngokke míngkengem nom agérlok lengkanyé.

¹⁹Shédíe atelko dem nolukom arope míídung. Airuudung! Uyuekom arope míídung delokke pesola dan gedung.

²⁰No mide amino, ige manam míngkeng de are kamang dem kangkeng míídunía?

²¹Ngoluke buku Abrahamme, bíkke Oo Isaakme kumko baarilo asampe binyoksupe emla ikolok yéjii nakope sanmanía?

²²Bíkke míngkeng elang bíkke agére lekobosuto, delokke bíkke míngkengem bíkke agérlok apíímoto, dem kaadung.

²³Delo Dooying kitabe sikepe atnamde apíngkai, “Abraham bí Shédíme arorunge emla mííto, delokke dem bím yéjiinape sanketo,” depeila Abrahamme Shédíke angong emdungai.

²⁴Amiem bíkke míngke petomlok imape, bíkke inam saanam lokmin ainakope sandune.

²⁵Dekepakpe, notiipe ina Rahab meteng miru kídíem doomo pala delokrongem bí rego regolo menyok líkku kolok bím yéjii nakope sanmanía?

²⁶Aid kamana amílde sine, dekepe ige manam míngke dekom sine.