Read Alladian JEMS 3 Bible Online

JEMS 3 - Alladian bible

JEMS 3

¹Ngokke bírokídíe, nolu alume poyilnape ipe emla míípe aimang, kapeila nolu kénsudung luyil poyilna ngoluke teyolo bisarem igapyé.

²Ngolu takam angu angu bedalo imem sudung. Akone bíkke agom pokolo edílote pomem kamang emmílo bí aropakna tanie, bí agí amílem aipakpe mosing sulayé.

³Edílo ngolu ngoluke míngkelok gíbodope emla guré kídar nappalo lagam bíllík yédí delo buluke amíl tabungem hue hokur ladung.

⁴Demangkom poyii sunape asi jaji kídarem míngkítoka. Si botte ila delokke asarlok goobom dope iduakom, bulum ansoona kangkeng atokolok kaabom dolamino payilode gípekolo gíbodune.

⁵Deke kísape ayosi amíl sokke ansoona ole konko, idakkom si botterupe míísudung. Míngkítoka, bottena moonamem ansoona mesing kolok gupak ladung.

⁶Ayo sikom eme kísadung, amíl olesokke ayosi tani amoso piyyang lerínge. Si tani niiposim ibulbone turnam yékorem emelo melíkbone, delokke agísue doorum líísam amolo emepe rompak kosupene.

⁷Takam angu angu simon sili, kebung pettang, tabí tayo, delokke asilo turna atí takamem tanie yébolado

⁸idola séko tanieteng ayuem nyoge lamang. Si piyyang suséng lerínge, díkkabona moponge.

⁹Ayo soge ngolu ngoluke Ruutum delokke Abume yidna ladung delokke sogei Shédíme gesudope pínam tani kídarem, ngolu pénadung.

¹⁰Nappang atelruu sok yidnam elang péname lendung. Ngokke bíro kídía depe ibo sumapeka.

¹¹Tíína asielang delokke kosana asie sirung atellok lenbo sulayénía?

¹²Ngokke bíro kídía, tapang anede olib ayé éélayénía, demangkom onggur anede tapang ayé ééla yénía? Deemana aside deena asiem lenbo sulamang.

¹³Séko noluke aralo gyan kala milo arodudí? Bím bíkke aina yékorlok, míngíí bosudola agér gérnam gyanlok lengkan sumotoka.

¹⁴Idola nolu nesu posu delokke mikit sorit aapí gedumílo dem bottepe míísu mapeka demangkom aruem menampe pomapeka.

¹⁵Sikena “Gyande” teyong telok kemang idakkom amosokke uyuke adín aapíemin.

¹⁶Legade ingkolo noluke nesu posu delokke mikit sorit em erbomdudí delo angu arang delokke atírumana agérem kaapayé.

¹⁷Idakkom teyong telok tokna gyande kera yalumpe deenam; delokrongem dengepe yébo sulínam, míípe míngor, tolík ilík bosunam, apíípe yaasamnam delokrongem aina ayé éénam, leko aapí genam delokke jégapnam.

¹⁸Denge bokuna, yépo aliem kuujébona kídíde yéjing aliem yidbodoku.