Read Alladian 1 PITOR 2 Bible Online

1 PITOR 2 - Alladian bible

1 PITOR 2

¹Delok legape kangki míngki bosunam delokke yadmín pomín, pemek solek, nesu posu delokke luki lukar agom kídarem mebo sutolangku.

²Anípe onam ojing kísape deenarung aid anyunem matatola; delomin nolu deenamlok turpeko bedalo siisayéne.

³Supak nolu Ruutum bí ainako emnamdem kénkí pabong.

⁴Tanike are kama nakope mepaknam idola Shédíkelo are kanarung ullennam duuyarna líídung delo aatola.

⁵Duuyarna líídung kísape aatola, aid amanpe bilík supenam deena miripe delokke Jisu Kristokelok Shédíke torík subanam asampe binyok supenam sobope bilík sudope agísuem aid kumkeng ekum mokepe isutola.

⁶Kapeila dooyinge sikepe podung: “Kaasutola ngo Jayonlo are kana líídungko ullentung. Dem ngo Jayon kéényung lokke líídupe langu sutung. Delo séko bím míída suyédí bí annyingdí kayimayé.”

⁷Supak séko nolu arorupe míídudí bulu kepe si líídu si are kadung. Idakkom arorupe míímana kídí kepe, “Mosaana kídílokke are kamang emla ulpaknam líídusi takam lokke dumpoope ikaku.”

⁸Delokke “Líídude taniem tupsumone delokke líírede bulum oletmokune.” Buluke tupsunam legape Shédíke bulum ruunam pakpe bulu poyilem igemang.

⁹Idakkom kaamo lokke bíkke irisinyo angunlo tomlík kuna bím yidnamem nolu pokan kupena noludan roja miri attínge, deena opíne, Shédíke amieke.

¹⁰Kerape nolu Shédíke ami mangai, idakkom nolu supak bíkke amipe ikaku; kerape nolu yaasam namem paamangai, idola supak yaasamem pangkaku.

¹¹Ayanam angong kídía, angu amolo miborupe ila duuk duakom noluke aide mimak ina paab belengem mepak sularungka emla ngo nolum berokpe rogudung.

¹²Noluke mipak gooralo yéname sikepe aipe aido; depe emnamde edílo bulu nolum atí maneke emla gééyédí, bulum noluke aina agérem kangkén kosupe aido, delo dekepe Shédí bí aadíku longe lokom bím yidgeyé.

¹³Aina agér gérna kídíem iuk líkpena delokke atímape ina kídíem ingéé pena Ruutumke melíknam tani gíída sokke ruutum mipíem, botte yalumna roja dokom,

¹⁴demangkom gobornor kídíekom Ruutumke amínpe agíe roge langka.

¹⁵Legade aina agérem ila nolu kénmana mide agom kídíem potumpe aido, si Shédíke mííname.

¹⁶Ruutumsuna ami yékampe yélangka, idakkom noluke sadínem atímanem pokomnape imapeka; Shédíke béérarupe yélangka.

¹⁷Mipilem míngge penamem aipe míngge langka; míngkesuna kídíem bírorupe mííbo sulangka; Shédíme pesolangka, rojem míngge langka.

¹⁸Abíl kídía, aina delokke remagna noluke ruutum petomem emmape kaníína ruutum kídí lokom nolu agíe roge sulangka.

¹⁹Tanie kigíí mape kigenamde míngge rupenamko kapeila bí Shédíme kénsudung.

²⁰Idakkom noluke imem legape nolu demko mokosula delokke dem donggela inamde nolukepe kape kísa are kadun? Idakkom no ainam legape adírgela delokke dem jémgela yédumílo de Shédíkelo mííyum supename.

²¹So min nolum tomlen líktune, kapeila Kristo bí noluke legape adírem dírgela, noluke kaayil sukepe ito, depe emnamde bíkke ledulo nolu mamín gepe aido.

²²“Bí atí paab imangai, delokke bíkke nappalok yadnam ponam atí paamang.”

²³Edílo bulu bím luréé lunyola itodí bí gomkéé gommo luyan sumanako, edílo bím idírtodí bí irít rítyan sumang. Dempenem bí deenampe bisarnalo agísuem melík suto namino.

²⁴Ngolu paablo simin gepala delokke yéjiipe yédokupe emla bí agíe agí amíllo ngoluke paab egedem esinglo gelíkboto, bíkke tarílok nolum ipítungku.

²⁵Legade nolu mér sobén kísape gítelpe gínyok tuai, idokom supak mér kaabomnalo ngééba dungku delokke noluke aidem kaasing mosing dungku.