Read Alladian 1 PITOR 4 Bible Online

1 PITOR 4 - Alladian bible

1 PITOR 4

¹Delok legape, Kristo bí agí amíllo adír geto bonade, nolu agísuekom dekena aapíem gelangka, kapeila séko agí amíllo adír pangge todí de paab amíllomin igetone.

²Dekepe ikolok, bíkke tani gíídaso yénam attung konem atímana tanike kaabo aapílok yémang, idola dempenem Shédíke míídu lokmin yétone.

³Legade noluke yétonam longem angu ami yékampe deemang aamo, abír ajon, tíngír dobat, iman sooman, tíngír dobatsula miri pokman delokke esing elíngem kumsup sunam yétalo yénamem yéto.

⁴Míngiimape delokke mínge sumape yémíípe buluke yékampe yébo sumado emla atíkon kísarupe bulu nolum míídung, depe ilamin bulu nolum lukaa mankala idune.

⁵Depe idokom turnemlang sinem bisar kuna bíkkíng bulu agí ajéngem dongge sukurupe aiyé.

⁶Legade sikepe ilamin dooyingem supakke sila doona kídí loteng pogootune; depe emnamde bulum taniem tani amíl akorlok, bisar dokupe, idakkom aide Shédíke akorpe duudo kupe emlamin itune.

⁷Atí tabuulok yéyin longe anín dubong. Delok legape aapíe berok sulangka delokke nolu kumgap ladope agíem hakjém gelangka.

⁸Takam lokke mipile eerípe ayang bosulangka, kapeila ayange deddína paabem pokomdung.

⁹Míínyi mííso bosumape akone akonem kanggul mínggul bosulangka.

¹⁰Mipile akonem ingkona igul nana amanem paadudí Shédíke yanggong aralo angu angu amanem edíípe inape aido.

¹¹Séko dooyingem pobodudí bí Shédíke agí nappalok lenna kísape polangka. Séko iguldudí bí Shédíke binam ralnamlok ipe aido, delomin takam atíem Jisu Kristo kelok Shédíme yidge nayéne. Bíkkíng angun ralname delokke pauare duuyar teteng mínyépe. Amen.

¹²Angong kídía, noluke bomram rupe aréé rénggenam legape noluke ankí kénkí rumanam atíkon irisinyo kísape mííla, kapei emla míímapeka.

¹³Idakkom angun ralname lenyékuem nolu ashénge séngéé dokupe Kristoke aréé kolo rémín genamem ashéng bomlangka.

¹⁴Nolum Kristoke amínlok luréé dumílo, noludan gérne, kapeila angunna Aide delokke Shédíke angune nolukíng dung.

¹⁵Nolu adír dumílo noluke adírde ami petnam demangkom doppyong tíísi demangkom angu angu imem legape demang kom ami atíem míngge manape ipe aimang.

¹⁶Depe idokom nolu Kristan kísarupe aréé gedumílo, annyinge emla míímapeka, nolu Kristoke amínem genam legape Shédíme yidge lattoka.

¹⁷Legade Shédíke erang rulok bisar ilendíe simin; delokke si ngolu kelok ilen dumílo Shédíke dooying tatponem igemana kídílokke legange kape iyérudí?

¹⁸Delokke Dooying kitabe podung: “Yéjiina kídíke turku pekode bomram nampe idumílo, Shédíme míngke sumana delokke paabna ami kídíde kape iyékun?”

¹⁹Dekemílo, sékobulu Shédíke míngkampe aréé gedudí bulu agísuem, Pílenna bíkkíng melík sudola aina agérem iyar bomsulangka.