Read Alladian 2 PITOR 1 Bible Online

2 PITOR 1 - Alladian bible

2 PITOR 1

¹Jisu Kristoke béérang delokke tomlíknam, Simon Pitorke, ngoluke kísape Shédíke yéjiinam bedalok delokke Mosing bokuna Jisu Kristo kelok gaina míngkengem pangkuna kídílo salame.

²Shédí kelang ngoluke Ruutum Jisuke kénnamlok yanggong elang delokke yéponame nolukelok parlen daklangka.

³Ngolum agí angun ralnam loklang ailok tomkuna ngoluke bíkkelok kénnam turnam legape míínam delokke deenampe nyogapla yénam mipíem ngolum bíkke teyong pauarlok bitung.

⁴Sike sogei bí bíkke bottena delokke gairuna pébi sunamem ngolum bitung; depe emnamde bulukelok nolute teyong akorem kormín gedope delokke atímana kaabo aapílok lenna tani gíída sokke belumna agérlokke mooteng dokupe emla iname.

⁵Sok legang pakpe noluke míngkelo ainamem idum sudomílo emla rallangka, delokke ainamlo kénnamem;

⁶delokke kénnamlo agíem mosing sunamem, delokke agíem mosing sunamlo élgap namem; delokke élgap namlo deenampe nyogapla yénam;

⁷delokke deenampe nyogapla yénamlo bíro kumsu kísape ayang bosunam, delokke bíro kumsu kísape ayang bosunamlo, ayangem ralbom langka.

⁸Legade nolu sim minyo aapí sim geyar lamílo dekede nolum Ruutum Jisu Kristoke kénnam yétalo mekem delokke pííram momayé,

⁹idola akone sikesim kamín gemamílo de kaato tatto sumane delokke mingmane; delokke bí paab lokke arbín tonam legangem mitpan sudungku.

¹⁰Delok legape, ngokke bíro kídía, nolum tomnamem delokke ullennamem berokpe kénbeng sulangka. Legade nolu sikesim imílo nolu edílote olet kumayé,

¹¹delokke Mosingkuna Ruutum Jisu Kristoke duuyarna teyong amolo aayékuem edíípe yamrík kosuyé.

¹²Dekepe ila, nolu supak arolo edíípe duula dekedem kénsu duakom, ngo sikesim nolum lupang biyar yéku.

¹³Ngok turdung tetengem, nolum aapílo míípang kunamde ngokke agére emla ngo míídung;

¹⁴kapeila ngoluke Ruutum Jisu Kristo bí ngom berok bitunade ngo sim nyokkupenam amíl sim mepak sulayéku emla ngo kénsudung.

¹⁵Ngokke sirongem sim takam sim nolu kénsu ayarla yéladope ngo edítko pakyédí ralbiyé.

¹⁶Nolum ngoluke Ruutum Jisu Kristoke pauar emlang angku penam legangem pobonamde ngoluke agí míísu kénsulok ponam dooyimang; idakkom ngolu agíe bí boronako emnamem agí amiglok kaasuto.

¹⁷Legade “Si ngokke airupe mííyum sunam, ngokke ayanam Ue,” emla bottena angun ralnamlok agompe lenbina Abu Shédí kelok bí botte namemlang angun ralnamem paato.

¹⁸Ngolu deena dííte teyong delo bíkkíng yémín geduem teyodelok agom ponamem ngolu agíe tatsuto.

¹⁹Delokrongem kaaluna miri kídí lokke agom kídare berokyape pobinamem ngolu paadung, noluke aanglo píange karla delokke roh pune saama tetengem, kaamo aralo angun ngunnam kísape nolu sim tatgap igaptoka.

²⁰Leríí yalumpe Dooying kitablo polu poor agomde kaaluna miri kídí lokke míísu agommang, dem nolu tatkén superung aido.

²¹Legade polu poor agomde edílokom tanike míísu posulok lenmang, idakkom Deena Aid duulup kolokmin tanie Shédíkelok agomem pogedune.