Read Alladian 2 PITOR 2 Bible Online

2 PITOR 2 - Alladian bible

2 PITOR 2

¹Noluke aralo luyil poyilna miri kídí kanam kísape amikídí gooralo miru kotoki kídíeke kato. Bulu apan aran ila nyokku nana bedang emkom asoope ilíkla, bulu agíe menape nyoksém nana bedangem laalíksuyé, bulum relenkuna edíísuna Ruutum mekom arue emla mííyi mapete iyé.

²Deddína amie buluke annyinam bedangem matayé delokke aro bedangem luyéé lulééla iyé.

³Buluke kaabo aapílok si mirukídí si buluke míílen sunam dooying ngiitomlok nolum ponomyé. buluke ajénge kerangoo pekai bulukíng duusu dubong delokke buluke nyokdíkue beroksula dung.

⁴Legade teyong kotoki kídí emkom buluke paab iduem bulumte mesammape bisar legape yirí pedínam[1] gumpírlo líkla, Shédí bí doorum líísam[2] among belo melíkto.

⁵Shédí bí konnying mennying kake yénam emkom mesammang, idakkom Shédíme míngke sumana amikídí lomin asi puumuem bomlíktone; bíkke laasing kunam atelde yéjiinam legangem pobona Noah petom delokke midum kínítko.

⁶Shédíme míngke sumana kídílo kapepak iyédí dem kaayii sunape, Sodom emlang Gomorrah taon borona annyiem Shédí bí akla emepe rompak danto.

⁷Bí ayon kamana ami kídíke belum bekam agérem kaala míídírna, aina ami Lotme mosiito.

⁸De aina buluke aralo duuna amide, buluke atímana agér kídarem kaala bí longe koyayang duuge ito.

⁹Delokke dekepe Ruutum Shédíme míngkesuna ami kídíem ikang darkaa lokke kape laasing dokudí dem bí kénsudung, delokke atímana amikídíem bisar díku longelope kape kísa mekandodí demteng bí kénsudung.[3]

¹⁰Séko bulu amíl[4] kaabo mínsu namem matala delokke Shédíke ralnam agérem lupak dudí bulum apekrupe kaayéku. Miram elang kenyége ila, si ami kídísi teyong angun ralna kídíem peso atí kamape lukaa luyééla igot mapete idung.

¹¹Teyong kotoki kídí ete, bulum ralyala pauar kayala idolate sikena ami kídíem Ruutumke keralo lukaa luyéé tope emla imang.

¹²Idakkom si ami kídí si ingkuem luyéé luléé dudí bulu dem kénsumang. Bulu umla petpak dokupe olennam, akor kamana agí míídulok yéna simon silie, delokke simon sili kísape bulukom nyokyéku.

¹³Buluke atímana inampakpe bulumkom atímape iyan suyéku. Buluke yéngame emnamde loyii lope tíngír dobatsula[5] iman isan bosula inamde. Buluke takam yadnam ponam bedangem agínpe bomdula, noluke doman dotkélo dobo sunamde bulukepe annyii supekue.

¹⁴Aapí eluna mime petom kékonlo bulu abídyang kaabomang; bulu paab iyémdí kayimang; bulu aapí edíímana amiem etku batpekolo gíbodung. Buluke aapíem kaabo ayardope terníng bisutung. Bulu Shédíke pégong aralo dung.

¹⁵Bulu jonna bedangem megeyéla, atímana agér inamlok murkong paanamem aipe míína Beorke oo Balaamke bedalok gípek lenkai.

¹⁶Kaaluna miri delokke tumnam agérem itumla delokke tani agompe pobitona, agom kamana simon, gadokone bík imem legape bím lungééto.

¹⁷Si ami kídí simin asi kamana sirunge delokke gumnam asar lokke yabbomnam aapame. Kaamo ruak yalumde bulukepe idung.

¹⁸Legade idung, bulu yidsurunge ila delokke are kamana agom potídung delokke yémemla yéna kídí lokke anípe angu lenkuna ami kídíem kaabo tatbonam tanike yéyasunam paab aapílo yédokupe ponom nomtídung.

¹⁹Bulu agíe nyokku peko bedalo abílpe duudula, bulum sadín biyéku emla pébisudung. Legade ingkue taniem ikum bomdudí bí delokke abílrunge.

²⁰Bulu bulum delokke mosingkuna Jisu Kristome kénlangkula tani gíída sokke atímanam amolokke gínyo gepala lekoda so egumso olík langkula delokke ikum kosu tumílo, yélen empemílo yéyin tesi bulu kepe atí mayayé.

²¹Bulu kepe yéjiinam bedangem kénpala, delokke bulukíng meyon sunam deena ngiitomem gíkur geku pemílo, bulu yéjiinam bedangem kénmangei aiyatuai.

²²Buluke legalo tanike aina ngiitom kídísi arue, “Ekiide agí abatlo aalat sudoku,” delokke “Éékde írbín tokom rapallo nyosudoku.”