Read Alladian 2 PITOR 3 Bible Online

2 PITOR 3 - Alladian bible

2 PITOR 3

¹Angong kídía, si ngokke nolum lennyinape binam sithie. Ngo dem annyidem atnamde nolu eerípe deena míídolok míídokupe emnam dem kénsu dokupe emla attung.

²Ngo nolum kerapekai deena kaaluna miri kídíke agom pobitonam kídarem delokke noluke tomlíknam ami kídílo ngoluke mosing bokuna Ruutumkelo pogap líknam ngiitomem mííyar gedope emla míídung.

³Kerayalumpe, nolu sim kénsurupe aido, depe emnamde yéyin longe telo ngiléé solééna amikídíe ngiléé solééla, agíke atímana paab aapí míídulok yéne lenyé.

⁴Bulu sikepe luyé, “Ingkolodí bíkke pébisunam angkuname? Ngoluke abukídíe sinyogoo kabong, pílen ballendak delokke ila takam atíe akampe dung.”

⁵Idakkom kerayalumpe Shédíke agomlok talenge lento delokke among sim moopípe asilokke langusuto delokke amoso asiem pítaksuto, emnamdem bulu inam kootírpe mitpan superung emla idung.

⁶Depe yédu delokke tani amongem asi puumue eelupla nyokmoto.

⁷Delok agom atel delogei bisardíku longelo buluke nyokku peko longem meruu bitung delokke Shédíkíng deenampe nyogap mana ami kídíem petpak dokupe, duusuduna talenglok atí kídíemlang among sim emelo rompak dope meruutung.

⁸Idakkom angong kídía, sim agom sim mitpan sumapeka; Ruutum kepe lootelde dítag éjar kísadung, delokke dítag éjarde longe lootel kísadung.

⁹Ruutumke adolde akonke kénnam adol kísamang; Ruutum bí bíkke pébisunam longem adol momang. Bí akonem emmumpe nyokmo límang, idakkom mipilem míílat sudokupe emla nolukelo lekope hakjémla yébosudung.

¹⁰Idakkom Ruutumke longede doppyona kísa pemino aayékune. Talenge rímlangala nyokyéku, esing elíng takamem emepe rompakyéku,[6] delokke among elang so duuna atí takame nyokyéku.

¹¹Atí takamem nyokmo kumílo, nolu kape kísana amipe iyékun? Nolu deenam pelang Shédíke mííbape yépe aido.

¹²Nolu Shédíke longem kaato sudunade[7] delokke aadíkue menang dakku bonade nolu deenampe delokke deenampe nyogapla duulangka. Delo longe delo emelok among taleng sokke nyokdíkue iyé, delokke esing kídare pamkilok yolgeyé.

¹³Idakkom bíkke pébi sunamem bomdula ngolu among kolang talengko, deena kídílokke ekum anípe ikuna among kolang talengko, kaato sudung.

¹⁴Dekemílo, angong kídía, nolu sim mííbom sudunade, nolu edítko paklayédí takot kamape. géépe lupenam kamadope delokke bíkkíng yépope yébo sudokupe itoka.

¹⁵Ngoluke bíro Paulke nolum Shédíke bím gyan binamlok atnam kísa pakpe noluke Ruutumke hakjémnam dei turkupeko bedasue emnamdem aapílo míngge langka.

¹⁶Sim legang kídí sim atduem bíkom sike pakpe atto. Abíd Dooying kitab olekonem ponam kísape kénmana delokke elu esaana ami kídíe menampe pobi bikepe bíkke kakot kídar delo tatkén lamanam atíe kekom kato.

¹⁷Delok legape, angong kídía, nolu sim legasim kéndu bonade, agíem mosing sulangka, demílomin ayon kamana amikídí ipu silumlok nolum yadla mayéne delokke noluke jégap bomko lokke elu esang kamayéne.

¹⁸Idola yanggolo delokke ngoluke mosing bokuna Ruutum Jisu Kristoke kénnamlo siisa langka. Bíkkíng angun ralname supak lokke ila yépenam lope duuyar daklangka. Amen.