Read Alladian 1 JOAN 2 Bible Online

1 JOAN 2 - Alladian bible

1 JOAN 2

¹Ngokke ayanam ome-oo kídía, ngokke sim atnamde nolu paab imadope emlamin. Idakkom séko paab idudí ngoluke legape Abuem ngolukepe pobipena ako kadung de idung; Deena ami Jisu Kristo bí

²Bímin ngoluke takam paab adumpe, delokke ngoluke petom kepemang tani tabung sokke paab legang pekom[3] agíe asampe binyoksune.

³Ngolu bíkke ngiitomem igedumílo bím kéndubong, dem pebeepe ngolu kénsudung.

⁴Séko amie, “Ngo bím kéndung” emdola bíkke ngiitomem igemadudí bí mena amie, delokke arode bíkkíng kamang.

⁵Idakkom séko bíkke agomem igedudí Shédíke ayangem aropakpe bíkkíng apíí píílí duumodung. Ngolu bíkkíng duudung emnamde dekepemin ngolu kéndune.

⁶Séko bíkkíng yémíndung emsududí bí Jisuke yénam kísape yéperung aido.

⁷Angong kídía, ngokke nolum atnamsi aní ngiitommang, idakkom noluke kerangoo pekai paanam aku ngiitom komino. Si aku ngiitom simin noluke kobor tatname.

⁸Depe idola ngo nolukíng agom aníko atdungku; sokke aruem bíkkílang nolukíng kaapa tobong, kapeila kaamue gídak delokke aro angune arope ngundubong.

⁹Séko angundung emsudula, agí bíruem kangki kangak dudí bí kaamolo duudung teteng.

¹⁰Séko agíke bíruem angunlo ayang dudí delo bím[4] tupsu mopena bíkkíng atí kamang.

¹¹Idakkom séko agí bíruem kangki kangakla kaamolo duududí delokke kaamolo yédudí bí ingkodanpe gídakdí bí dem kénsumang, kapeila kaamue bím kaapa moyimang.

¹²Ngo sim nolukíng atdung ome-oo kídía: Kapeila noluke paabem bík amínlok mesam bitobong.

¹³Ngo nolukíng atdung yaamé kídía: Kapeila nolu aimanem ikumtobong. Ngo nolukíng atdung ome-ookídía: Kapeila nolu Abu bím kéntobong.

¹⁴Ngo nolukíng atdung, abukídía: Kapeila lendak delokke duuna bím nolu kéntobong. Ngo nolukíng atdung yaamé kídía: Kapeila nolu toldung, delokke Shédíke agome nolukíng dung, delokke nolu aimanem ikumtobong.

¹⁵Tani amosim ayamapeka, tani amosokke atíemte ayange emla míímapeka. Séko tani amosim ayadudí Abuke ayade bíkkíng duumang.

¹⁶Legade tani amosokke atí siri emnamde idung paab aapílokke erbomnam kídí, bíkke kaabo tatbo aapí delokke inam saanam legape yidkím sunam si takam si Abulok toknamang idakkom tani among sokkemin.

¹⁷Tani gíídange nyokdoku, idakkom Shédíke mííbape inade duuyarne.

¹⁸Ayanam ome-oo kídía si yéyin longebong; delokke noluke tatnampe Kristoke mirue aadak kubong, supakteng Kristoke mirue bosiko aadubong. Sokmin ngolu yéyin longe emla kénsu nadune.

¹⁹Bulu ngolu kelokke lenpek sukaku, idakla bulu arope lumílo ngolu kemang. Legade bulu ngolu kíamílo, bulu ngolukíng duumínyai; idola buluke gípek suku namdei bulu sékoteng ngolu kemang emnamdem lengkan sudung.

²⁰Idakkom noludan Deena Aid kelok iyodname, delokke nolu takam aruem kéndung.[5]

²¹Ngokke nolum atnamde nolu aruem kénmang emla atmang, idola noludan kénsudung delokke arolok menam yadnam kamang emlamin atdune.

²²Demílo sékodí mena amie? De idung Jisu bí Messiah mang emna ami demino. Sikena amidemin mirue. Bí Abu melang Oo me arope míímang.

²³Uem arope míímanade Abuem paamang; séko Uem arope míídudí bíkkelo Abu bíkom dung.

²⁴Kerapekai nolu ingkuem tattodí dem bomyar langka. Dekepe imílomin nolukom Oo delokke Abukíng duuyéne.

²⁵Simino bíkke ngolum pébisunam duuyarna turname.

²⁶Ngokke nolum sim atí kídí sim atbom namde nolum yadpe emla antí bomna kídíem ansuyépe emlamin.

²⁷Nolu kepedan Kristo kelo tosak sunam iyodde duusudung; akonem poyil duamang emla míípena kayimang. De tosaknam iyodde nolum takamem kénsu modung, de poyilde arue, menammang. Iname bíkke ponampe, bíkkíng mínggapla duulangka.

²⁸Delokrongem supak ome-oo kídía, bíkkíng duuyar langka, demílomin bíkke aayékuem ngolu míídíísuyé delokke bíkke aadoku delo bíkke keralo annying mayéne.

²⁹Nolu bí yéjiinako emla kéndumílo, aina agérem ina mipil si bíkkelok lenne emnamdem nolu kéndung