Read Alladian 1 JOAN 3 Bible Online

1 JOAN 3 - Alladian bible

1 JOAN 3

¹Ngolu Shédíke ome-oope idorupe emla edítko Abu bí ngolum botteruna ayangem mebitun! Depe ilamin ngolu ngolupe idune! Tani amonge bím kénmang.

²Angong kídía, supak ngolu Shédíke ome-oo kídare delokke ngolu kape iyékudí, dem lengkan biku mangada idakkom edílo bí lenyékudí[6] ngolu bíkke kísape iyéku, kapeila ngolu bím bíruu supe kaayéku dem ngolu kéndung.

³Bíkkímin bí agíe dengkolok, sim mííbomsuna takame deedung kune.

⁴Séko paab idudí bí ayonem betdung; arolok pomílo, paabde ayon kamane.

⁵Idakkom bí ngoluke paab kídarem laabín dokupe emla aato dem nolukom kénsudung. Delokke bíkkíng paab kamang.

⁶Séko bíkkíng duududí bí paab itíla yémang. Séko paab itíla yédudí bí bím kaapete kaamang, kénpete kénmang.

⁷Ome oo kídara amiem yadko sumapeka. Séko aina atíem idudí bí bíkke deenam kísape deene.

⁸Séko paab agérem idudí bí uyulokke, kapeila uyu demin lendak delokkekai paab itíla yéne. Depeila Shédíke Oolok toggade uyu agérem nyokmo kakupe emlamin toktone.

⁹Shédíkíng olat sukuna tanide paab idan tetemayé, kapeila Shédíke amie bíkkíng duudung, bí paab itíla duulamang, kapeila bí Shédí kelok lenne.

¹⁰Sikepemin ngoluke kénnam Shédíke ome-ookídíe delokke uyulokke ome-oo kídare idune. Séko aina agérem imadudí bí Shédíke ome-oomang, bíkke bíruem ayamana dekom bíkkemang.

¹¹Simin noluke kera yalumpe tatnam dooyinge. Ngolu ayabosupe aido.

¹²Agí bíruem petsuna, uyu gooralo duuna Kain kísape imapeka. Bí kapeila bím petton? Legade bíkke agírung iyi isaade aimape idungai delokke bíkke bíro iyi isaade aidungai.

¹³Tani amonge nolum akdu mílokom, ngokke bíro kídía, kaperui emla míípe aimang.

¹⁴Ngolu sinamlokke turkolo aatoku, dem ngolu kénsudung, kapeila ngolu ngoluke bíruem ayang bosudung. Séko ayang madudí bí sinamlo dung.

¹⁵Séko agíke bíruem nedudí bí ami petne, delokke ami petnade duuyarna turnamem paamayé dem nolu kénsudung.

¹⁶Simin ayangde ingkuedí dem kénnane; Jisu Kristo bí ngoluke legape agí turnamem binyok sulíkto. Ngolukom ngoluke bíro legape turnamem binyok sulíkpe aido.

¹⁷Séko sérang atí kídare kadung delokke bíkke bíro lokke pííram sémuem kaadung idola bím ayang sumadudí, Shédíke ayangde kape kísa bíkkíng duuyéne?

¹⁸Ayanam ome-ookídía, agom demangkom nappang petomlok ayange emmape, aro loklang agérlok lengkan laju.

¹⁹Depe imílomin ngolu arolokke emnamdem ngolu kénsuyéne, sikepemin ngoluke Shédíke kangkolo edínge iyéne, delokke ngoluke aange ngolum mepak dokom

²⁰ngolu bíkkíng mííposula duuyéne. Kapeila Shédí ngoluk aapíemte botteyane, delokke bí takamem kényin sudung.

²¹Ayanam angong kídía, ngoluke aange ngolum mepak sumamílo, ngolu Shédíkelo míídíí sunam kadung.

²²Delokke ngoluke konam mipíem ngolu bíkkelok paadung, kapeila ngolu bíkke lulígem igedung delokke ingkue bím mííyum sumodudí dem idung.

²³Delokrongem simin bíkke lulíge; bíkke ngolum políknampe ayang bosunamde.

²⁴Bíkke lulígem igena kídíde bíkkíng dung, delokke bíte bulukíng dung. Delokke sikepemin bíkke ngolukíng duunamem ngolu kénsudune. Sim bíkke deena Aid binamlok ngolu kénsudung.