Read Alladian 1 JOAN 4 Bible Online

1 JOAN 4 - Alladian bible

1 JOAN 4

¹Ayanam angong kídía, takam Aidem arue emla míímapeka, idakkom bulu Shédíkelo lenna aidedí anguedí ankítoka, kapeila deddína miru kotoki kídíe tani amoso gígongkai.

²Shédíke Aidem kangkén sunane sikepemin: Jisu Kristo bí amíllok aato emna aid mipíde Shédíke.

³Idakkom Jisu bí Shédí kelok lenmang emna aidde angue. Sikesi noluke aadakbong emla tattona delokke supakteng tani gíída so yédubona miru aide.

⁴Ayanam ome-ookídía, noludan Shédíke, delokke bulum nolu ikumto, kapeila tani gíídaso yéna dempemílo, nolukíng duuna aidde botteyane.

⁵Bulu tani amosokke delokke delok legape tani amosokke ledulok podung, delokke tani amonge bulum tatbidung.

⁶Ngoludan Shédí kelokke, delokke sékodí Shédíme kéndudí bí ngolukem tatbidung; idakkom sékodí Shédíme kénmane bí ngolum tatgap bimang. Sikepemin aro Aidemlang mena aidem ngolu kangkén suladune.

⁷Angong kídía, ngolu ayabosu laju, kapeila ayangde Shédí kelok lenne. Séko ayadudí, bí Shédí kelok oname delokke bí Shédíme kéndung.

⁸Séko ayamadudí bí Shédíme kénmang, kapeila ayangdei Shédí bí.

⁹Shédíke ngolum ayang lengkan suname sikepemin: Bí bík Oo atel[7] em tani gíídaso melík subito, depe emnamde ngolu bíkkelok turnamem paadokupe iname.

¹⁰Ayangde sikepemin; ngolu Shédíme ayang kolokmang, idakkom bí ngolum ayang kolokmin bíkke Uem ngoluke paab legape tosak subila asampe binyok[8] sulík dope melíkbito.

¹¹Ayanam angong kídía, Shédí bí ngolum deddíko ayatunade, ngolukom ayang bosupe aido.

¹²Sékote Shédíme kaana kamang; idola ngolu ayang bosumílo Shédí bí ngolukíng duudung delokke ngolu kíng bíkke ayangem apíímodung.

¹³Ngolu bíkkelo dung delokke bí ngolukíng dung emnamdem ngolu kéndung, kapeila bí agíke Aidem ngolukíng bitung.

¹⁴Abue bíkke Uem tani amosokke mosing bokunape melíktung emnamdem ngolu kaasuto delokke kénsuto.

¹⁵Jisume Shédíke Ue emla kangkén nako kadumílo Shédí bí bíkkíng delokke bí Shédíkíng dung.

¹⁶Delokke dekepe iname Shédíkelo ngoluk legape ayange dung emla ngolu kéndung delokke de ayangdei Shédí bí. Séko ayanglo duududí bí Shédíkíng dung, delokke Shédí bí bíkkíng dung.

¹⁷Bisardíku longelo ngolu míídíísudope ayangem ngoluke aralo apíí motung. Kapeila tani amoso ngolu Kristoke yénam kísadung.

¹⁸Ayanglo pesue empeko kamang. Idakkom aropak ayangde pesonam aapí kamomang, kapeila pesodelo ajéng ame ingéénam agome katak sudung. Séko amie pesodudí bí ayanglo apíímang.

¹⁹Ngolu ayadung kapeila bí kerape ngolum ayang getung.

²⁰Akone “Ngo Shédíme ayadung” emdola, agíke bíruem aksunade yadne. Legade bíkke kaasutonam, agí bíruem ayang manade, bíkke kaasu manam Shédíme ayang lamang.

²¹Delokke bí sim agom sim pogap líktung Séko Shédíme ayadudí bí agíke bíruemkom ayarupe aido.