Read Alladian 1 JOAN 5 Bible Online

1 JOAN 5 - Alladian bible

1 JOAN 5

¹Séko Jisu bí Messiah, Shédíke Ue emla arope míídudí, delokke sékodí abuem ayangdune bí uemkom ayadung.

²Sikepemin Shédíke ome-uem ayanamem ngolu kénsudune, dekom Shédíme ayang kolokmang bíkke ponamem tatko lokmin idune.

³Shédíke agomem tatnam demin bím ngoluke ayaname, delokke bíkke políknam kídíde ngolukepe tebeg nammang,

⁴delok legape Shédíke ome-oo mipíde tani amongem ikumdung. Delokke ngoluke míngke lokmin ngolu tani amongem ikumdune.

⁵Tani amongem ikumnade séko? Jisu bí Shédíke Ue emnamdem arue emla míína petom demin.

⁶Simin asi loklang iyyilok aana Jisu Kristo. Bí asi petomlok aamang, asi loklang iyyi lokmin aatone. Delokrongem Aid agísue si arue emla lengkan subitone, kapeila Aidde arue.

⁷Lengkan subonade angumko kadung:

⁸Aidde, aside delokke iyyide; delokke si angum si atel bosudung.

⁹Ngolu tanike pokan subinamem tobo sudung, idakkom Shédíke lengkan subinamde botteyane, kapeila si Shédíke agí uem bisudola lengkan ikan sunam komino.

¹⁰Séko Shédíke Uem arope míídudí bí bíkke aanglo aro lengkanem paatubong. Séko Shédíme arue emla míímadí de amide bím menakope ludung, kapeila bí Shédíke Uem bisudola lengkan sunam legangem arope míímang.

¹¹Delokke simin lengkan name. Shédí bí ngolum duuyarna turnamem bitung, delokke si turnam si bíkke Oolo dung.

¹²Séko Uem paatudí bí turnamem paatung; séko Shédíke Uem paamadí bí turnamem paamang.

¹³Ngokke sim agom kídar sim nolum Shédíke Oo amínlok arope míngkesuna kídílo atnamsi duuyarna turnamem nolu paato dem kénsuyépe emlamino.

¹⁴Simin ngoluke Shédíkíng anínpeko bedangem kénsu pekue; de idung, ngolu bíkke míngkampe atíem komílo dem bí tatbidung; emla ngolu berokpe kéndung.

¹⁵Bí ngoluke konamem taddung; dem arope kéndumílo ngoluke konamem bí bidung emla ngolu kénsudung.

¹⁶Akone bíkke bíruem sipekolo gíbo pemana paab imemko kadumílo, bí kumpe aido delo Shédí bí turnamem biyé. Ngo sipekolo gíbo mana paab legangem lubidung. Sipekolo gíbona paab rung ko kangu sudung. Ngo bím delok legape kumtoka emmang.

¹⁷Imemnam takamde paabe, delo sikolo gíbo pemana paabekom kadung.

¹⁸Séko Shédí kelok olat sudung kudí bí paab itíla yémayé; Shédíkíng olat sukuna amide agíe mosii sudung, delokke atí manade bím ukkí koteng imang.

¹⁹Ngolu Shédíke ome-oo kídíe delokke tani among tabuusi uyu miru gooralo dung dem ngolu kénsudung.

²⁰Ngolu arona Shédíme kéndope emla Shédíke Ue aala ngolum míípe míngor sunamem bitung. Delokrongem ngolu arona bíkkíng delokke bíkke Oo Jisu Kristokíng dung. Simin aropak Shédíde delokke duuyarna turnamde.

²¹Ayanam ome-oo kídía, nolu agísuem mimang kumsu kolokke mootepe mesulangka.