Read Alladian KEBANG RUUTUM KÍDÍ 1 Bible Online

KEBANG RUUTUM KÍDÍ 1 - Alladian bible

KEBANG RUUTUM KÍDÍ 1

¹Joshuake sirongem, RUUTUM me Israel kídíe íngkísuto, “Ngoluke aralok Kanaan ami kídíem mimak imínsupe sékoda kerayalumpe gígeyén?”

²RUUTUM bí poyansuto, “Judah opínde gígeyé. Kapeila asi-among dem ngo buluke alag aralo yébodokupe bito.”

³Delo Judah erangde buluke bíro Simeonke opíndem, “Ngolum among panlíkko delo Kanaan kídíem mimak imín sukolo enmín getola, ngolute nolume magpépe ibosuyéku,” emla rogukolok Simeonke opínde bulukíng enmín geto.

⁴Edílo Judah erangde mimakpe ibomtodí, delo RUUTUM bí Kanaan ami emlang Perijjit amiem Judah erangke alag gooralo rulíkto. Bejek emko delo éjar íying amiem bulu petto.

⁵Delo mimak delo bulu Adonibejekme Bejeklo kaaríksula, mimak imínsula, Kanaan kídí emlang Perijjit kídíem ikumto.

⁶Adoni-bejek bí dugnyok getuai. Idola bulu monmín gela bím umla bíkke lene-lakneme tekpakto.

⁷Delo Adoni-bejek poto, “Lenem lang lakne tekpaknam roja íying kíníde ngokke tébul rumkínglo dopit-doyidem títadungai. Buluke teyolo ngo kape kísa itodí delokke eduem Shédí bí ngome iyan sudungku.” Bulu bíme Jirusalemlo aabotoku. Delo bí silíkkai.

⁸Judah ami kídíde, Jirusalem emte mimakpe aabomla laato. Bulu ami kídíem yoksalok pakala, doolungem emepe ríto.

⁹Depe irodem, Judah ami kídíde abíd adi amonglo duuna, Negeblo duuna delokke anggodan dííte lebelo duuna Kanaan ami kídíem mimak imín sukolo ento.

¹⁰Kerape Kirath Arba emnam Hibronlo duuna Kanaan ami kídíem mimakpe iyabomla Sheshai, Ahiman delokke Talmai bulum ikumto.

¹¹Delokke bulu Kiriath Sepher emlate mínnam Debir doolunglo duuna kídíem mimakpe aabomto.

¹²Delo Kaleb bí poto, “Kiriath Sepherem mimak iabomla ikumna amidem ngokke ome Aksahme mimepe biyé.”

¹³Kalebke aní, Kenajke oo, Othniel doolungdem laato. Depeila Kaleb bí agíke ome Akhsahme bíkkíng nyamran ilíkto.

¹⁴Mime delokke milo ekum delo aado longe dem, abulok aríkko kodope Othniel [1] manbomto. Dekepeila mime delokke gadolok oidodem edílo Kaleb bíme, “Nok legape íngkoko ngo ibiyén?” emla íngkídodem,

¹⁵Mimede poyansuto, “Ngom ayangsula atoko bilangka. Negeblo ngome no amongko panbirodem, sirung kídíemte no ngome bilangka.” Delo línggíng kemlang sokkoke sirung kídíemteng bíme Kaleb bí bito.

¹⁶Mosike ato abu lokke otíng-oyin Kenit ami kídíde Kejur doolung Jeriko lok, Arad anínke yépol mooruk Negeb amonglo Judah ami kídílo lekope duubosupe emla byakto.

¹⁷Judah ami kídíde Simeon kídílo lekope gíbosula Jepathlo duuna Kanaan amiem mimak iyabomla doolung dem nyokmoto. Depe ila deme Hormah emla míntoku.

¹⁸Judah ami kídíde Gaja, Ashkelon delokke Ekron doolung kídí demlang deke delokke dei degong kídíemte laataksula langgooto.

¹⁹RUUTUM bí Judah ami kídílo yémín geto. Bulu adi among lokke doolung kídíem laayin gooto. Idola yiibeke ami kídíem monpak kíramto. Kapeila bulu aremlok monam guré gaari kato.

²⁰Mosike pokam pakpe, Hibron dem Kalebme bito. Bí Anakimke oo angumem monpakto.

²¹Idola Benjamin ami kídíde Jirusalem lok Jebus ami kídíem monpak lamato. Silo loope bulu Benjamin ami kídílo lekope Jirusalemlo duudung.

²²Dekepe ido longe kídí delo Luj emlate mínnam Bethel doolung dem Ephraim elang Manasseh ami kídíde mimak ipe ento.

²³Delo RUUTUM bí bulum igulto. Kerape bulu doolung delo magroem gígemoto.

²⁴Bulu doolung delok amiko lendupe kaala bím íngkíto, “Doolung elo kape kísa imíloi aalayéne? No ngolum bedangem pobimílo ngolu nom atí imayé.”

²⁵Delo bí bulum lenkan bito. Depeila ami demlang bíkke edung erang kékonem, doolung delokke ami abídem bulu petyinto.

²⁶De amide méélam dem Hittit ami kídí duupomlo, dungamínla doolungko ilentoku. Doolung delokke amínem Luj emto. De amínde silopeteng dekepe duudungada.

²⁷Manasseh opínde: Beth Shan, Taanakh, Dor, Ibleam, Meggido emnam doolung kídí kelang deke delokke ayirlo duuna doolung kídíke ami kídíem monpakmato. Depeila Kanaan ami kídíde asi- among delo duuyar tetengkai.

²⁸Edílo Israel ami kídíde milu-mibampe itokudí delo bulu Kanaan ami kídíem abíl kísape agér imoto, idola bulum monbín aloomato.

²⁹Ephraim opín deteng Gejerlo duuna Kanaan ami kídíem monbín mato. Depeila bulu Gejerlo lekope duuyél bosuto.

³⁰Jebulun opín deteng Kitron lolang Nahalallo ami kídíem monbín mato. Depeila buluke aralo Kanaan ami kídíe duubí-duuyél sula Jebulun kídíem abíl kísape agér ibila dungkai.

³¹Asher opín deteng Akko, Sidon, Ahlab, Akhjib, Helbah, Aphek delokke Rehob emnam doolung kídíke ami kídíem monbínmato.

³²Bulu monpak manam legape delo dungkusuna Kanaan ami kídí delo lekope duubí-duuyélsula duubosukai.

³³Naphtali opín deteng Beth Shemesh kelang Bethanath doolunglo duuya suna Kanaan ami kídíem monbínmape lekope duubosukai. Idola Kanaan ami kídíem bulu abíl kísape agér imoto.

³⁴Dan ami kídíem Amorit ami kídíde yiibelo tokmomape adi amonglo saalat motoku.

³⁵Amorit kídíde Aijalon delokke Shaalbim doolunglo lang Heres díítumlo duuyarto. Idola Ephraim elang Manassehe, dem ami kídí dem buluke rumkínglo mela abíl kísa agér imoto.

³⁶Amorit kídíke among rísude Selalok línggíngpe saalangala Akrabbim gééjongpe bootoku.