Read Alladian KEBANG RUUTUM KÍDÍ 10 Bible Online

KEBANG RUUTUM KÍDÍ 10 - Alladian bible

KEBANG RUUTUM KÍDÍ 10

¹Abimelekke sirongem Dodoke oten delokke Puake oo, Tola bí Israelem ipítto. Bí Issakhar opín lokke adi among Ephraim lokke Shamir doolung lokke amikuai.

²Bí Israel lokke kebang ruutumpe takying annyi kolang tagumko yépala sikai. Bík simangem Shamirlo yuto.

³Gilead among lokke Jair bí, Tolake sirongem kebang ruutumpe ila Israelem takying annyi kolang taknyiko yéboto.

⁴Bí oo íying angumko kato. Bulu gado íying angum kolo duula gígo dungai. Gilead amonglo bulu doolung íying angumko kato. Dekedem silo peteng Jairke doolunge emla mandung.

⁵Jairke sirongem bíme Kamonlo yuto.

⁶Lekoda Israel kídíe RUUTUM ke keralo yagorupe paab itoku. Bulu Baal uyu melang Astaroth uyu mime dem delokke Siria, Sidon, Moab, Ammon delokke Philistia kídíke kumnam teyong ami uyu kídíem kumsu goolangkula itoku. Bulu RUUTUM me mepakla kumyimape yétoku.

⁷Depeila buluke teyonglo RUUTUM bí marla Philistia ami kídí lolang Ammon ami kídí aralo yédope kolíkto. Dekede bulum mimaklo ikumla,

⁸Gilead lokke Jordan korong sanggo danke Amorit amonglo duuna Israel tabungem takying kolang dítak píínyikope itung-iréla imoto.

⁹Ammon kídíe delo petom irísumape, Jordan korongem koola, Judah, Benjamin delokke Ephraim opín kídíemte mirolpe roltíbomto. Depeila Israel kídíe yagorupe adír along geto.

¹⁰Dekepe ila Israel kídíe RUUTUM kíng kapgu-rogutoku, “Ngolu Baal uyueme kumla ngoluke agí Shédí nome mepaksula, nok keralo ngolu botterupe paab ito.”

¹¹Depe rogu sulangkula ikukolo RUUTUM bí bulum poyansuto, “Ijipt, Amorit, Ammon, Philistia,

¹²Sidon, Amalek kídíe lang Maon ami kídíe nolum kerang peteng itung-iréla iduem, noluke ngokkíng rogu sulangkula iyém, ngo nolume, buluke alag aralok mopít manía?

¹³Idola nolu ngom mepak geyéla uyu kídíem kumtoku. Depeila ngo nolum mopít yimayé.

¹⁴Noluke ulsunam uyu kídí delo gíla kapgu-rogu sutola. Noluke duuk adíryém bulume mopít motola.”

¹⁵Idola Israel ami kídíde RUUTUM me poto, “Ngolu paab ito. No íngkoko ipe mííyédí, nok míngkorsupe isutola. Idola silo ngolum mopíttoi.”

¹⁶Depe bulu mibo-miying uyu kídídem mepak sugeyéla RUUTUM petomme kumsuto. Depeila Israelke ankí-kenoem bí kaala, kaapak kíramto.

¹⁷Ammon kídíke maglíng kídíde mimak pínla Gileadlo notko iyang bomto. Israel kídí lokke ami kídí deteng lekope dumsula Gilead lokke Mijpah doolunglo notko ito.

¹⁸Dekepe gídumsuko delo ami kídíe lang miro kídíe, “Ammon kídíem mimak imín sudope séko ngoluke kebang ruutumpe iboyén? Séko depe iboyédí, bí Gilead lokke mipil-miyong teyong lokke ruutumpe iyé,” emla manbosuto.