Read Alladian KEBANG RUUTUM KÍDÍ 11 Bible Online

KEBANG RUUTUM KÍDÍ 11 - Alladian bible

KEBANG RUUTUM KÍDÍ 11

¹Gilead lokke Jephthah bí midu-miramkuai, idola bíkke anede notiikuai.

²Bíkke abu Gilead bí, edílo oo kídíem otodí delokke edílo bulu siisala minekadí, delo bulu Jephthahme ekumlok monlento. Monlendola bulu bím luto, “No angukon mime lokke oope itoname, no ngoluke abu lokke ekurangem atel koteng paamín gemayé.”

³Depeila Jephthah bí bíkke bíro kídí delok gínyok gela Tob emnam among kolo duuto. Delo bí midu-miramna amiem ayoko angong igoosula bulu bíkkíng yémín geto.

⁴Longe ayoko irodem, edílo Israelem, Ammon kídíe mimak iya bomtodí delo,

⁵Gilead lokke miro kídíe Tob among delo Jepthahme tompe emla ento.

⁶Bulu bíme, “Ammon kídíem mimak imínsudope, ngoluke mimak ruutumpe no ibolangka,” emla tomto.

⁷Jephthah bulum poyansuto, “Noluke ankí-keno duusim kape ngokkíng angkan? Nolu ngome, ngok abuke ekum lok monpak manía? Nolu ngome yagorupe nela akmatonía?”

⁸Gilead lokke ruutum kídíde poyansuto, “De aroe, idola supak ngolu nokkíng ngébadungku. Kapeila Ammonem mimak imín sudope, Gilead kídíem mimaklo enbola, kebang ruutumpe ibodope emla ngolu nome rogudung.”

⁹Jephthah delo bulum poto, “Nolu ngom ekumlo enbo langkula, Ammon kídíeme mimak imín subodomílo emla míídumílo delok teyonglo RUUTUM bí ngome ikum moyémílo, ngo noluke kebang ruutumpe iboyé.”

¹⁰Bulu, “Ngolu dem elíkdung delokke RUUTUM bí ngoluke pénsame,” emla poyansuto.

¹¹Delo Jephthah bí Gilead kídíke miro kídí delo enmín getoku. Ami kídíe bím kebang ruutum pelang maglíngem yébonape ito. Mijpah doolunglo, RUUTUM ke keralo Jephthah agíke agom-aang gomodem lekoda posi-pomotoku.

¹²Depe irongem Jephthah bí Ammon kídíke rojalo kotokiko melígla sipe emto, “Nokkíng ngolu ingkokoda lumín sutone? Kape no ngok amonglo mimak iyadune?”

¹³Jephthahke kotoki dem Ammon kídíke rojade poyansuto, “Edílo Israel kídíe Ijipt amonglok lentokudí, delo ngokke amongem Arnon koronglok ila Jabbok korong loope delokke Jordan korong emte rotto. Deke deme ngome ai-kampope bilangkuka.”

¹⁴Dem tatla, Jephthah bí Ammon roja delo kotokiem melíg langkula

¹⁵potoku, “Ammon among emlang Moab amongem rotto emnamde aromang.

¹⁶Edílo Israel kídíe Ijiptlok gílentokudí, delo bulu yépol mooruk amonglok gíla, Silíng Siyénglo gíto. Delokke gíla bulu Kadesh amonglo pííto.

¹⁷Delo bulu Edom lokke rojalo kotoki melígla among raadang delok enmodokupe ukumem koto. Idola Edomke rojade ukum bimato. Dekepe Moabke roja demte ukum koduem bíteng, Moab among lok gídope ukum bimato. Depeila Israel kídíe Kadeshlo duuto.

¹⁸Depe irodem bulu yépol mooruk among delok gíla Edom among emla Moab amongem bilgongla, Moab lokke sanggodan lokke Arnon korong rotkon delo pííla notko ito. Idola bulu, Arnon korongem koomato. Kapeila de Moabke rísupe ito.

¹⁹Delo Israel kídíde Heshbonlo duuna Amorit roja Sihonme, agí amonglo menape píísudokupe bíkke among delok gímodope roguto.

²⁰Idola Sihon Israel kídídem elíkmato. Bí bíkke maglíngem aabola Jahajlo notko idola Israelem mimak iyang bomto.

²¹Idola RUUTUM Israelke Shédí bí, Sihon kelang bíkke maglíng teyolo Israele ikumdope rulígto. Depeila Israel kídíe buluke asi-among takam dem yébom aato. Delo among delo duuna Amorit tabunge Israel rumkínglo duuyinkai.

²²Depeila Israel kídíde Amorit kídíke asi-amongem: sokkodan Arnon korong lok ila línggíngdan Jabbok korong loope, delokke sanggodan yépol mooruk lokke ila anggodan Jordan korong loope yébomkai.

²³Depeila RUUTUM Israelke Shédí bímino, bíkke agí amisu Israelke legape Amorit kídíeme monpaktone.

²⁴Depe iname dem asi-amongdem no kape kísa tolayén? Noluke uyu Khemoshke nolum binamdem nolu bomsutopena. Ngolukom RUUTUM ngoluke Shédíke ngolum ruubinam among dem ngolu bomsuyé.

²⁵No Moab roja Jipporke oo Balak mempemílo gaiyanakua? Bí Israelem lumín-momínsula ikíton?

²⁶Dítak língko angum kokai Israel kídíe, Heshbon, Aroer, delokke dei-degong among kídí emlang Arnon korong robenglo duuyon bomna doolung kídíem yébomto. Dekena longe delo kape no asi-among dem langkumaton?

²⁷Ngo nome atímana agér atí imang. Nomin mimak itíla ngome atímape itídune. Kebang ruutumpe ina RUUTUM bí Israel kelang Ammon kídíke lumínem silo kebang baabilangka.”

²⁸Idola Jephthahke agom ponamem Ammonke rojade atí tatbimato.

²⁹Depe irodem RUUTUM ke Aide Jephthahke teyonglo aato. Bí Gilead among tabung emlang Manasseh tabungem gígola Gileadke Mijpahlo píílat sudolangkula Ammonlo ento.

³⁰Jephthah bí RUUTUM ke keralo pésuto, “Ammon kídí teyonglo ngome no ikumdope ruuyémílo,

³¹edílo ngo mimagem ikumla ngok ekumlo pííyékudí, delo ngome kaaríkpe emla angge yalumnadem nokkíng ngo romnam amanpe ilíkyé.”

³²Delo Jephthah bí korong deme koola Ammon kídíem mimak makpe gíto. RUUTUM bí miru ami kídíem bík alag aralo rulígto.

³³Bí Aroer lokke ila Minnith em dunggo bomna doolung takamem tola Abel Keramim loope doolung íying annyiko séngom dope payinto. Sikepe Ammon kídíeme Israele ikumto.

³⁴Edílo Jephthah bí mimak ipala Mijpah doolung, agíke ekumlo píínga tokudí, delo abíde kaaríksumang adape bíkke ome atel de tamburin tapungem ila, paksong soola, bím kaaríksuto. De ome petomde bíkke onampe ito.

³⁵Ome dem bíkke kaarík surodeme, bí agíke ege genameme ankíla bétsula poto, “Eh, ngok omía! No ngok aapíem kimokai. Nopak kape ngok aapíem kimokan? Ngo RUUTUM kelo pésunamko pésuto, dem ngo laalat sulang kumang.”

³⁶Omede poyansuto, “Ngok yayi, nokke miru Ammon kídílo RUUTUM bí edoem rayan sumorongkuem, no RUUTUM kelo ingkona agomko pésutodí, ngok teyolo deme ilíkpenam kope iyémílote itoka.”

³⁷Idola bí abudem agomko roguto, “Yayi nom agomko rogudung. Ngo milo kamape mimumpe sipenade, ngomlang ngokke angong kídíem díítum amonglo ankí-kenoem igong podope poolo annyiko longem bipo langka.”

³⁸Bík rogunamdem elíkla poolo annyiko yégomoto. Milo kamape mimumpe sipenam legangpe bílang bík angong arumde adi amonglo kapgong rínggongla yégoto.

³⁹Poolo annyie gíyinrodem, bí abu kerang delo aatoku. Jephthah bí agíke pésunam tuubupe ito. Milo kénmape mimumpe omede sikai. Sokke ilenla Israel aralo idongko ilenkai.

⁴⁰Dítak mipíke Israel lokke mimum koo kídíe Gilead ami Jephthah ke omem rínggenape longe appiko dada, luyulo magongla yéto.