Read Alladian KEBANG RUUTUM KÍDÍ 12 Bible Online

KEBANG RUUTUM KÍDÍ 12 - Alladian bible

KEBANG RUUTUM KÍDÍ 12

¹“Ngolum tomsumape kape no Ammon kídíem mimak ikolo gíkane? Depeila ngolu nok dumpong teyolo nok ekumem emepe ríletyé,” emla marla Ephraim ami kídíde Jephthah me lula bulu maglíngem tomdumsuto.

²Jephthah bulum poyansuto, “Ngok ami kídíe lang ngo, Ammon ami kídílo yagorupe akmín-lumín kala nolumte tomsuto. Idola nolu ngolume buluke alag aralok mopítmato.

³Edílo ngo, nolu igulmayé emla kaasukadí, delo ngo agíem mííyiksula, rísuem koola mimak ito. Delo RUUTUM bí ngome ikum dope ruubito. Dekepe irodem supak kape nolu ngome mimak ikupe emla aadune?”

⁴Dekepe Jephthah bí Gilead ami takamem tomdumsula, Ephraim kídíem mimak imínsula, Ephraim kídíem ikumto. (Ephraim kídíe Gilead kídíem sipe lupu-luléto, “Ephraim kela Manasseh aralo duuna Gilead kídí nolu midu- mimaklo runyok gekune.”)

⁵Ephraim ami kídíem duknyok langkumadope, Jordan korong pígo delo Gilead kídíe aabomla dagbomto. Depeila edí-edílodí Ephraim amie korongdem koomodope íngkítodí, delo Gilead kídíde, “Ephraim amikoya no?” emla íípoto. Delo amide, “Ma,” emyém,

⁶Bulu bíme, “Shibboleth,” emnam gompildem pokímoto. Dem agom dem Ephraim kídíe jonnam gomukpe pokénmape, “Sibboleth,” emtuai. Delo aipe pokénmana amidem bulu petto. Depe mimak ido delo, jarying appi kolang jarnyiko Ephraim amiem petto.

⁷Jephthah bí Israelem dítak akkéko kebang ruutumpe yébopala sikai. Bík simangem, Gileadlo bíkke agí doolung sulo yuto.

⁸Jephthah ke méélam delo Bethlehem lokke Ibjan bí Israelem yéboto.

⁹Bí ue íying angumko delokke ome íying angumko kato. Bíkke ome kídídem angukon opín amilo nyamran ilíkla, delokke nyameng íying angumko angukon opínlok oo kídí kepe langaato.

¹⁰Ibjan bí Israelem dítak kíníd kope yéborongem sikai. Bík simangem Bethlehem doolung sulo yuto.

¹¹Ibjan ke sirongem Jebulun opín lokke Elon bí Israelem dítak íying kope yéboto.

¹²Depe yéborodem bí sila, Jebulun among lokke Aijalon doolunglo bím yuto.

¹³Elon ke sirongdem Pirathon doolung lokke Hillel ke oo Abdon bí Israelem yéboto.

¹⁴Gado íying kíníd kolo duula magoona oo íying appi kolang oten íying angumko bí kato. Abdon bí Israelem dítak píínyiko yéboto.

¹⁵Depe yéborodem Amalek kídíke adi amongpe ituana Ephraim among lokke Pirathon doolunglo bí sila, delo bím yuto.