Read Alladian KEBANG RUUTUM KÍDÍ 13 Bible Online

KEBANG RUUTUM KÍDÍ 13 - Alladian bible

KEBANG RUUTUM KÍDÍ 13

¹Israel kídíe lekoda RUUTUM ke akdope paab itoku. Depeila bí bulume takying appikope Philistain ami rumkílo duumoto.

²Dekepe yédo longe kídí delo Jorah emnam doolunglo Manoah emnam amiko yéto. Bí Dan opín lokke amikuai. Bík mimede ome-oo kamape negenpe yéto.

³RUUTUM ke kotokiko mime delo lengkansula poto, “No negenpe yétíto, idola menarupe no koo gela ooko oyé.

⁴Idola no apong tíímapeka demangkom tíngír sumona abíd asi-apong atí tíímapeka, delokke nyobomnam ato siroem domapeka.

⁵Delokke nok oodem orongem, bík dumídem edílokom ngímapeka. Depeila bím odo longe delokke ila, bíme Najirit [3] amipe Shédí kíng tolíkyé. Bí Philistain amike alag aralok, Israelem mopítkunam agérem ilenboyé.”

⁶Delo mimede bík milolo gíla popatoku, “Shédíke amiko ngokkíng aato. Bí Shédíke kotoki kísape kaala yirí-pedí pe míínamko. Ingko lokdí bí aatone emla ngo íngkímato. Bíte agí amínem posumato.

⁷Idola bí podo, ‘No koo gela ooko oyé. Depeila supak lokke apong tíímapeka demangkom tíngír sumona abíd asi-alang atí tíímapeka delokke nyobomnam ato siroem domape ilangka. Kapeila koode olen lokke ila bíkke sidokuloope Shédí kíng tolíknam Najirit amipe iyé,’ emdo.”

⁸Delo Manoah bí RUUTUM me, “E RUUTUM, koodem orongem, kape kísape isapedí, deme aipe poyil dokupe nokke melíknam amidem lekoda aamo langkuka,” emla kumsuto.

⁹Manoahke kumnamem Shédíbí tatto. Mime delokke aríklo yédungem Shédíke kotokide aatoku; idola delopak bíkke milo Manoah bí kamato.

¹⁰Iname mimede duklangkula milo deme, “Longekon delo ngome lengkan suna amide si aadungku,” emla pobito.

¹¹Manoah bí darepla bík méng delo gímín getoku. Edílo bí ami kerang delo píítodí delo bí, “Ngok mime so luposuna amide noya?” emla íngkíto. “Ngo moko,” emla amide poyansuto.

¹²Manoah bíme ííto, “Edílo nokke agome apííyédí, delo koo delokke yéname lang agér-anam idonge kapekísa iyén?”

¹³RUUTUM ke kotokide poyansuto, “Ngokke potonam tabungem mimede igepe aido.

¹⁴Onggur anelok lenna ato siro tabungem bí dope-tíípe aimang. Bí apong emlang tíngír sumona abíd asi-alangem tíípe aimang. Delok teyolo, bí nyobomnam ato-siroem dope aimang. Ngokke lulígnam tabungem bí igepe aido.”

¹⁵RUUTUM ke kotokidem Manoah bí roguto, “Ngonyi, nok legape bénboko pala imatetedem nome duupodope míídung.” Kapeila de amide RUUTUM ke kotokie emla Manoah bí kénmato.

¹⁶RUUTUM ke kotokide poyansuto, “Nonyi ngome luya podokom ngo nonyike apim-oying atí-siríem domayé. Idola nonyi iperung emla míídumílo, deme RUUTUM kíng romnam amanpe ilangka.” (Manoah bí RUUTUM ke kotokiko emla míímato.)

¹⁷Delo Manoah, RUUTUM ke kotokidem íngkíto, “Nokke agome edílo apíng yédí, delo nome yidgedope, nok amínem pobika.”

¹⁸Bí poyansuto, “Ngok amínem, kape no íngkíkan? De nokke kénpíng-míípíng manampe idung.”

¹⁹Delo Manoah bí bénboko umla delokke ali-ayé amaneke elíng teyolo melígnam deena runggu kolo RUUTUM kíng ipakto. Dekepe ila Manoah kelang bík mime delokke kaadungem RUUTUM bí irisinyonamko ito.

²⁰Edílo deena runggu delokke emede talengpe írsangkadí, eme delok RUUTUM ke kotokide teyong amongpe sangkaku.

²¹Edílo RUUTUM ke kotokide Manoah bínyim, milo-méng kumsuem lengkan suyimatodí delo, “Si RUUTUM ke kotokiko,” emla Manoah bí kénkai. Delo bínyi amonglo gubdola kumsuto.

²²Manoah bí delo bík mime dem, “Ngonyi siyérung; kapeila ngonyi Shédíme kaato,” emla poto.

²³Idola bík mimede, “RUUTUM bí ngonyim mokape míídumílo, bí ngonyike romnam aman emlang ali-ayé amanem toríksumayé. Bí legí-sigang takam sim ngonyime lengkanla, popaala imayé,” emla poyansuto.

²⁴Mimede ooko ola bík amínem Samson emla mínto. Bí siisala, bík teyolo, RUUTUM bí utepooroem ruulíkto.

²⁵Edílo bí Jorah kelang Eshtaolke pénsam lokke Mahaneh-Danlo yétodí, delo RUUTUM ke Aide, bík teyolo bele lento.