Read Alladian KEBANG RUUTUM KÍDÍ 14 Bible Online

KEBANG RUUTUM KÍDÍ 14 - Alladian bible

KEBANG RUUTUM KÍDÍ 14

¹Longeko Samson bí Timnah doolunglo tokto. Delo bí Philistain mimumko kaato.

²Dem kaarodem bí agí ekumlo ane-abu dem popato, “Timnah belo ngo Philistain mimumko kaato. Bíme ngok mimepe tombilangka.”

³Dem tatla bíkke ane-abude, “No ngoluke ali-atod aralo demangkom ngoluke ami kídí aralo mime bompenam kaamanía? Dínbíng iyodsumana Philistain loge kape no mimum matadun?” emla poyan suto. Idola Samson bí abudem poto, “Bím min ngo mííba yalumdune, ngokkepe bím tombilangka.”

⁴RUUTUM bí Samsonme sikepe imotung emla bík ane-abude kénmato. Kapeila Philistain amilo mimak imín sudope RUUTUM bí bedangem matato. Dekepe ido delo Philistain kídíe Israel teyolo ruutum bomto.

⁵Depe emla Samson bí agíke ane-abu dem gíbola, Timnahlo tokto. Timnah doolung lokke ríkséng ikuem bulu píídopagem, menang asak myomur simyokone ngírla Samsonme monabomto.

⁶Delo menang asak RUUTUM ke Aide bíkkíng aajét bomla delok ralnam delok myomur simyodem sérpansuto. Depe inam dem bí ane-abu dem atí popang sumato.

⁷Depe irodem bí doolung delo gíla mimedem luposula, mimede bím yagorupe mííbamoto.

⁸Longe ayoko irodem, Samson bí nyamran ikupe emla delo toktoku. Bedanglo endungem, bíkke kerangke mokatonam myomur simyo delokke simangem kaape emla gíkénto. Delo bí, simang arang delo atii kana tangut asupko dagdupe kaato.

⁹Tangut atiidem laala, bíkke bedalo endungem dobomto. Bíkke ane-abu dungko delo pííla, ane-abudem bí atii dem bisula bulute doto. Idola myomur simyoke simang aralok ngutlang dem laalento emla, bínyim bí pomato.

¹⁰Bíkke abude mime ekum delo aaduem, Samson bí domanko doboto. Dekena longe delo sikepe yaamé koo kídíe idongko ituai.

¹¹Edílo Philistain ruutum kídíde bím kaatodí, bulu Philistain yaamé koo midum íying angumko Samson kíng duumín gedope lulígto.

¹²Samson bulum kaala lupoto, “Nolum ngo gomruko íngkíyé. Ngokke nyamran ido longe kíníd araso, nolu gomru delokke gomroem pokén biyémílo, ngo mipil miyong nolum kampope sumnam ege kolang galuk asak biyé.

¹³Nolu gomroem pola bimayémílo, nolu ngom kampope sumnam ege íying angum kolang galugem íying angumko bilangka.” Delo, “Aiyé nokke gomruem íngkítoka,” emla bulu poyansula, “Ngolu tatlaju,” embosuto.

¹⁴Delo bí poto, “Dona kolok donameke lento; Ralna kolok tiineke lento.” Longe angumko ilate bulu deme pokénmato.

¹⁵Longe appi delo bulu Samsonke mimedem poto, “Gomro sim popa bidope, no nokke milo sim ségulok ilento. Demamílo, nokke abu ekum sim eme rílíkla, nomte gukamoyé. Nonyi ngolume rukup kape emlangía so tomatone?”

¹⁶Delo Samsonke mimede bík kerang delo miksie-rori ila kabang dola poto, “No ngom ayamanamin, no ngom arope míímanamin, no ngok ami kídíem gomruko potula, deme ngome no popa bimang.” Delo Samson bí, “Dem gomru dem ngo agíke ane-abu emte popang bima laalo, iname deme ngo nomía popa biyén?” emla poyansuto.

¹⁷Idola mimede doman dodo longe kíníd tabudem kaptí-ríítí bomto. Bíkke dekepe ití bomkolok longe kíníd delo Samson bí pobito. Depe pobirodem, mimede bík ami kídar delo, deme popa bitoku.

¹⁸Longe kíníd delokke doonyie uamang adape Philistain ami kídarde Samsonme pokanto. “Ngutlang empemílo tiiyane ingkue? Myomur simyo empemílo ralyane ingkue?” Delo Samson bulum poyan suto, “Nolu ngokke runelok aal gurmangamílo, nolu edílokom ngokke gomruem pokén bilamayai.”

¹⁹Delo ralnamruupe RUUTUM ke Aide Samson kelo aato. Bí Ashkelon doolunglo gíla buluke midum íying angumko petla, buluke ege galugem laabínla, gomruem pokanna ami kídí delo sina kídíke ege galugem bitoku. Depe irodem legí-sigang delokke legape bí marla abu ekumlo gítoku.

²⁰Samsonke mimedem, nyamran delo dunggul mínna angong delo méngpe imoto.