Read Alladian KEBANG RUUTUM KÍDÍ 15 Bible Online

KEBANG RUUTUM KÍDÍ 15 - Alladian bible

KEBANG RUUTUM KÍDÍ 15

¹Longe ayoko dorongem, Gehuem yikdílo, bénoko bomla Samson bí, bíkke mimedem kangku kolo entoku. Delo bí, “Ngokke mime dungko pírteklo gíyé,” emduem, bíkke ato abude bíme gímo mato.

²Bí Samsonme poto, “No bíme yagorupe akkai emla ngo mííla, bíme nokke angonglo bilattoku. Iname bík ayanpe bíkke bírme aníyana sim no bomlat tokuka, kapeila bím pemílo aníyasi kampuete iyadung.”

³Samson poyansuto, “Si longe si arorupe Philistain kídíem atímang ipaadípe ikai. Idokom ngo imemmang.”

⁴Depe emla bí gílenla ménsurung língko angumko umla, bulume annyi-annyipe taméme ginsutsula, depe ginsutsuko miyong delo merupe ipenamlok éélíkla,

⁵meru kídí deme eme ilíkla, Philistain kídíke minna ali-aam teyolo duggomola eme dugridope ménsurung kídíem taaya líktoku. Sikepe bí isi-sasinam ali-ayé petomlo gurí momape Philistain kídíke gatngonam ali-ayé dagdíína kídí emlang olib esing ríkséng kídíemteng guyinmoto.

⁶“Séko sikepe itone?” emla Philistain kídíke ínggo dodem, Timnah doolung lokke Samsonke ato abude, “Bíkke mimeme bíkke angong kolo bikunam legape sipe ikai,” emla bulum popato. Delo Philistain kídíde gíla mime demlang bíkke edung erang dem emelok ríkato.

⁷Deme kaala, Samson bí bulume, “Noluke sikepe igang legape, noluke teyolo ngo edo ramatete dem ngo mirolpe roltí bomyé,” emla poto.

⁸Depe emla bí bulum yagorupe momín suala buluke aralo amiem bojé rungko mokato. Depe ipala, bí gíla Etam emnam lííreng díítum arang lokke líípík kolo dunggeto.

⁹Philistain kídarde aabomla Judahlo notko ila Lehi doolungem mimak iyabomto.

¹⁰Judah lokke ami kídare bulum, “Nolu ngolum kape mimak iya dune?” emla íngkíto. Delo bulu, “Samson bí ngolum kape kísa pakpe itodí, dekepe ngolute bím iyan sudokupe bím umpe emla aadung,” emla pobito.

¹¹Delo midum éjar angumko Judah lokke amie, Etam lííreng díítum lokke bupík delo gíla Samsonme poto, “No ngolume kape sikeko ipang líkkan? Philistain kídíe ngoluke ruutumpe inam sim no kénmanía?” Bí bulume poyansuto, “Bulu ngok teyolo kape kísa itodí, dekepe ngote bulume iyansuto.”

¹²Bulu Samsonme, “Nome ngolu yééla Philistain kídílo melík dope emla aadung,” emla popato. Samson bulum íngkíto, “Nolu agísue ngome mokamayé emla agomko bisulayén?”

¹³“Aiyé ngolu nom mokamayé. Nom yééla bulukíng melíknam petompe iyé,” emla bulu poyansuto. Depe emla bulu, bíme sotkya aní annyi kolok yééla lííreng díítum delok bomtoku.

¹⁴Edílo bí Lehi doolung deme píítokudí, Philistain kídarde ngomla, bíme dugabomto. Delo RUUTUM ke Aide ralnamrupe bík teyolo aato. Delo bík alagem yéébomna rímode gutung-gungongna siipyak enno kísa remyakla, bík alag delok oletkai.

¹⁵Delo bí kanggo sula aní pakpe yaarona gado lokke sokkor along ko kaala, dem laala, delok bí momín sunala, midum éjarko petto.

¹⁶Depe moka geyéla Samson bí miriko luto, Gado lokke sokkor along lok, ngo apom kope kumto. Gado lokke sokkor along lok, midum éjar amiko petto.

¹⁷Depe lupala bí along dem yoppakto. Depe iko moolop dem Ramath Lehi[4] emto.

¹⁸Depe irodem bí yagorupe asi tíílíngla RUUTUM me kumsuto, “Sikepe botterupe ikumnamem no ngom ruubito. Supak ngo asi tíílínglok sila, dínbíng iyod sumana mibo-miying alag aralo simope míídunía?”

¹⁹Delo Shédí bí Lehilo kobung arungko ilenla, delok asiem bitlenmoto. Samson bí asiem tííla bík ralname angkaku. Dem korong dem En-Hakkore [5] emla mínto. De supakkom Lehi delo kadung.

²⁰Samson bí Philistain kídíke ruutum dodoem, dítak íying annyi kope kebang ruutumpe Israelem yéboto.